Բացահայտելով կենսաբանության աշխարհը. ԵՊՀ-ում կայացավ «BioExpo-2026» ցուցահանդեսը

ԵՊՀ կենսաբանության ֆակուլտետի, ուսանողական խորհրդի և ուսանողական գիտական ընկերության համատեղ նախաձեռնությամբ կազմակերպված այս տարվա ցուցահանդեսի մասնակիցների շարքը համալրեցին նաև նոր կազմակերպություններ՝ ներկայացնելով կենսաբանությանն առնչվող մասնագիտական գործունեության տարբեր ուղղություններ։

«BioExpo»-ի նպատակներից էր նաև դպրոցականների մասնագիտական կողմնորոշմանն աջակցելը։ Ցուցահանդեսի ընթացքում ԵՊՀ կենսաբանության ֆակուլտետի ամբիոնները ներկայացրին իրենց գործունեությունը, կրթական ծրագրերն ու գիտահետազոտական ուղղությունները։ Դպրոցականները հնարավորություն ունեցան ծանոթանալու կենսաբանության տարբեր ոլորտներին և պատկերացում կազմելու դրանցում մասնագիտական գործունեության հնարավորությունների մասին։

Ցուցահանդեսը կարևոր է նաև ֆակուլտետի ուսանողների և շրջանավարտների համար, քանի որ նրանց հնարավորություն է տալիս ծանոթանալու կենսաբանության ոլորտում առկա մասնագիտական ուղղություններին, աշխատաշուկայի պահանջներին և գործատուների ակնկալիքներին։ Կենսաբանության ոլորտի մասնագետները կարող են գործունեություն ծավալել գիտահետազոտական կենտրոններում, ախտորոշիչ լաբորատորիաներում, կենսատեխնոլոգիական և բնապահպանական կազմակերպություններում, ինչպես նաև սննդի անվտանգության և հարակից ոլորտներում։

Առանձին տաղավարներով ցուցահանդեսին մասնակցեցին կլինիկական ախտորոշիչ լաբորատորիաների, բնապահպանական և սննդարդյունաբերական կազմակերպությունների, կենսատեխնոլոգիական ընկերությունների ու ոլորտային այլ կառույցների ներկայացուցիչներ։ Այցելուները հնարավորություն ունեցան անմիջականորեն շփվելու նրանց հետ, տեղեկանալու մասնագիտական գործունեության առանձնահատկություններին և ծանոթանալու ոլորտում առկա հնարավորություններին։

Գործատուների հետ անմիջական շփումը ուսանողներին օգնեց ավելի լավ պատկերացնելու աշխատաշուկայի պահանջներն ու մասնագիտական զարգացման հնարավորությունները։ Միաժամանակ, նման հանդիպումները հիմք կարող են դառնալ համալսարանի և ոլորտային կազմակերպությունների հետագա համագործակցության, այդ թվում՝ ուսանողների մասնագիտական պրակտիկայի կազմակերպման և աշխատանքի հնարավորությունների ընդլայնման համար։

Ցուցահանդեսը դարձել է ԵՊՀ կենսաբանության ֆակուլտետի ավանդական նախաձեռնություններից մեկը։ Մասնակիցների շրջանակի ընդլայնումը հնարավորություն է տալիս ավելի լայնորեն ներկայացնելու կենսաբանության ոլորտի բազմազան ուղղություններն ու դրանցում առկա մասնագիտական հեռանկարները։

Վեցերորդ տարին անընդմեջ անցկացվող «BioExpo»-ն շարունակում է կապել կենսաբանական կրթությունը գիտական գործունեության և մասնագիտական իրականության հետ։ Այն դպրոցականներին օգնում է կողմնորոշվելու մասնագիտության ընտրության հարցում, ուսանողներին՝ ծանոթանալու ոլորտի պահանջներին ու զարգացման հնարավորություններին, իսկ գործատուներին՝ հանդիպելու ապագա մասնագետներին։ Այսպիսով, ցուցահանդեսը նպաստում է այնպիսի միջավայրի ձևավորմանը, որտեղ գիտելիքը լրացվում է գործնական փորձով, իսկ կրթական և գիտական ներուժը վերածվում է մասնագիտական զարգացման հնարավորության։

COP17-ին ընդառաջ ԵՊՀ-ն կարևորում է գիտության և համագործակցության դերը կենսաբազմազանության պահպանության գործում։ Այս գաղափարների շուրջ է ձևավորվում նաև «BioExpo-2026»-ը՝ միավորելով կրթությունը, նորարարությունն ու բնության պահպանությանն ուղղված նախաձեռնությունները։