ԵՊՀ տնտեսագիտության և կառավարման ֆակուլտետում նոյեմբերի 15-ին կայացավ «ԵՊՀ տնտեսագիտական դպրոց» ծրագրի 2026-2027 ուսումնական տարվա աշնանային շրջափուլը, որն այս անգամ ևս համախմբել էր տնտեսագիտությամբ, կառավարմամբ և ֆինանսներով հետաքրքրված բազմաթիվ դպրոցականների։
Ծրագրի նկատմամբ հետաքրքրությունը տարեցտարի աճում է՝ ընդգրկելով Հայաստանի տարբեր կրթական հաստատությունների սովորողների։ Այս անգամ նախաձեռնությանը մասնակցում էին Հայաստանի շուրջ 50 ավագ դպրոցների 150 աշակերտներ։ Մասնակիցների զգալի մասը ներկայացնում էր նաև մարզերի ավագ դպրոցներն ու քոլեջները, ինչը վկայում է նախաձեռնության աշխարհագրության ընդլայնման մասին։
«ԵՊՀ տնտեսագիտական դպրոցը» ԵՊՀ տնտեսագիտության և կառավարման ֆակուլտետի ապագա դիմորդների մասնագիտական կողմնորոշմանն ուղղված կարևոր նախաձեռնություններից է։ Դրա նպատակն է դպրոցականներին հնարավորություն տալ ավելի վաղ փուլում ծանոթանալու տնտեսագիտության, կառավարման և ֆինանսների ոլորտներին, բացահայտելու իրենց հետաքրքրություններն ու կարողությունները և մասնագիտության ընտրությունը կատարելու առավել տեղեկացված ու գիտակցված ձևով։
Մասնագիտական կողմնորոշումը երիտասարդի կրթական ճանապարհի կարևորագույն փուլերից է։ Մասնագիտության ընտրությունը ենթադրում է ոչ միայն ապագա աշխատանքի մասին պատկերացում, այլև սեփական հետաքրքրությունների, նախասիրությունների և կարողությունների գնահատում։ Հետևաբար, հատկապես կարևոր է, որ աշակերտները դեռևս դպրոցական տարիներին հնարավորություն ունենան անմիջականորեն ծանոթանալու տարբեր մասնագիտական ուղղություններին, դրանց բովանդակությանը և կիրառական նշանակությանը։ Այս առումով «ԵՊՀ տնտեսագիտական դպրոցը» յուրօրինակ հարթակ է, որտեղ տեսական պատկերացումները լրացվում են գործնական առաջադրանքներով և ինտերակտիվ աշխատանքով։
Օրվա ծրագիրը մեկնարկեց պաշտոնական բացման արարողությամբ։ Մասնակիցներին ողջունեց ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանը՝ հորդորելով աշակերտներին ակտիվորեն ներգրավվել ծրագրի աշխատանքներին, հնարավորինս շատ հարցեր տալ և օգտվել նոր գիտելիքներ ձեռք բերելու, մասնագիտական նախասիրությունները բացահայտելու ու ֆակուլտետի կրթական միջավայրին ծանոթանալու հնարավորությունից։ Նա ապագա դիմորդներին խորհուրդ տվեց մասնագիտության ընտրության հարցում անպայման հետևել սրտի ցանկությանը՝ միաժամանակ հիշեցնելով, որ հաջողության հասնելու համար լավ մասնագետ լինելուց առաջ կարևոր է նախևառաջ վստահելի, նվիրված և լավ մարդ լինել։
Բացման արարողությանը հաջորդեցին տնտեսագիտության, կառավարման և ֆինանսների տարբեր ուղղություններին նվիրված դասընթացներն ու գործնական աշխատանքները։ Աշակերտները հնարավորություն ունեցան ծանոթանալու բիզնես գաղափարների գեներացման, մենեջմենթի և մարքեթինգի, միջազգային բիզնեսի, տնտեսական կանխատեսումների ու վերլուծությունների, ինչպես նաև բիզնեսի ֆինանսավորման աղբյուրների առանձնահատկություններին։
Ծրագրի կարևոր բաղադրիչներից էր բիզնես խաղը, որի ընթացքում մասնակիցները հնարավորություն ունեցան ներգրավվելու գործնական իրավիճակների քննարկման և առաջադրված խնդիրների լուծման գործընթացում։ Նման ձևաչափը նպաստում է ոչ միայն նոր գիտելիքների ձեռքբերմանը, այլև վերլուծական մտածողության, թիմային աշխատանքի, որոշումների կայացման և ստեղծագործական մոտեցումների զարգացմանը։
Օրվա ընթացքում ձևավորված ինտերակտիվ միջավայրը հնարավորություն տվեց աշակերտներին լինելու ոչ միայն ունկնդիր, այլև ակտիվ մասնակից։ Նրանք կարողացան հարցեր ուղղել, քննարկել իրենց հետաքրքրող թեմաները, արտահայտել սեփական տեսակետներն ու ներգրավվել տարբեր առաջադրանքներում։ Այսպիսի անմիջական շփումն օգնում է ավելի հասկանալի դարձնելու տնտեսագիտական գիտելիքների կիրառական նշանակությունը և բացահայտելու այն մասնագիտական հնարավորությունները, որոնք կարող են դառնալ ապագա կրթական ու աշխատանքային ուղու հիմքը։
Նախաձեռնության առանձնահատկություններից մեկն այն է, որ այն մասնակիցներին հնարավորություն է տալիս ծանոթանալու ոչ միայն առանձին մասնագիտություններին, այլև բուհական կրթության միջավայրին։ Ապագա դիմորդները պատկերացում են կազմում ԵՊՀ տնտեսագիտության և կառավարման ֆակուլտետի կրթական ուղղությունների, ուսումնական գործընթացի և մասնագիտական զարգացման հնարավորությունների մասին։ Այսպիսով՝ դպրոցականների համար այցը վերածվում է համալսարանական կյանքին ավելի մոտիկից ծանոթանալու փորձառության՝ օգնելով նրանց պատկերացնելու իրենց ապագա ուսանողական առօրյան։
Հատկանշական է, որ 2024-2026 թվականների ընթացքում «ԵՊՀ տնտեսագիտական դպրոց» ծրագրին արդեն մասնակցել է ավելի քան 1200 աշակերտ Երևանի և Հայաստանի տարբեր մարզերի ավագ դպրոցներից ու քոլեջներից։ Մասնակիցների այս ընդգրկումը և ծրագրի նկատմամբ շարունակաբար աճող հետաքրքրությունը վկայում են նախաձեռնության պահանջվածության և մասնագիտական կողմնորոշման գործում դրա կարևորության մասին։
Ծրագրի ավարտին մասնակիցներին հանձնվեցին հավաստագրեր, ինչպես նաև խաղարկվեց «Ակտիվ մասնակից» մրցանակը՝ առանձնացնելով օրվա ընթացքում առավել ակտիվ ներգրավված աշակերտին։
«ԵՊՀ տնտեսագիտական դպրոցը» ԵՊՀ տնտեսագիտության և կառավարման ֆակուլտետի՝ նախաբուհական կրթական միջավայրի հետ կապերի ամրապնդմանն ուղղված հետևողական աշխատանքի կարևոր բաղադրիչ է։ Ծրագրի իրականացմանը ակտիվորեն ներգրավված են ֆակուլտետի չորս ամբիոնների պրոֆեսորադասախոսական անձնակազմի ներկայացուցիչները, ինչպես նաև ուսանողական կառույցների անդամները։
Ֆակուլտետը շարունակելու է զարգացնել այս նախաձեռնությունը՝ ընդլայնելով դպրոցների և քոլեջների հետ համագործակցությունը և ապագա դիմորդների համար ձևավորելով այնպիսի միջավայր, որտեղ մասնագիտական ընտրությունը սկսվում է գիտելիքից, փորձառությունից և սեփական հնարավորությունների բացահայտումից։







