ԵՊՀ տնտեսագիտության և կառավարման ֆակուլտետի դեկան, դոցենտ Կառլեն Խաչատրյանի նախաձեռնությամբ մեկնարկած «ԵՊՀ տնտեսագիտական դպրոց» ծրագրով ԵՊՀ տնտեսագիտության և կառավարման ֆակուլտետը արձագանքում է ժամանակի կարևորագույն մարտահրավերներից մեկին՝ մասնագիտական կողմնորոշման որակին։ Տարիներ շարունակ բուհ և մասնագիտություն ընտրելու գործընթացը հաճախ պայմանավորված է եղել մակերեսային պատկերացումներով կամ սոցիալական միտումներով։ 

Մասնագիտության ընտրությունը երիտասարդի կրթական և մասնագիտական ճանապարհի կարևորագույն որոշումներից է։ Այդ փուլում տեղեկատվության պակասը կամ մասնագիտության վերաբերյալ մակերեսային պատկերացումը կարող են հանգեցնել ոչ լիարժեք կամ չհիմնավորված ընտրության։ ԵՊՀ տնտեսագիտական դպրոցը միտված է լրացնելու այդ բացը: Ծրագրի կարևորագույն արդյունքը ոչ միայն նոր գիտելիքն է, այլև մասնագիտության գիտակցված ընտրության մշակույթի ձևավորումը։  

Ծրագիրը, կրթական նախաձեռնություն լինելուց բացի, երկարաժամկետ մարդկային կապիտալի ձևավորման կարևոր ներդրում է, որը հնարավորություն է ընձեռում ապագա դիմորդներին ծանոթանալու մասնագիտության բովանդակությանը, կիրառական նշանակությանը և մասնագիտական աճի հեռանկարներին։ Այն ոչ միայն մասնագիտական կողմնորոշման և գիտելիք փոխանցելու հարթակ է, այլև մտածողություն ձևավորող և համալսարանը դպրոցականներին հասանելի, ճանաչելի դարձնող միջավայր։ 

ԵՊՀ տնտեսագիտության և կառավարման ֆակուլտետը, շարունակելով բարձր որակավորում ունեցող տնտեսագետներ, կառավարման և ֆինանսների ոլորտի մասնագետներ պատրաստելու իր պատասխանատու առաքելությունը, ծրագրի միջոցով հաստատում է իր ակտիվ դերակատարումը նաև նախաբուհական կրթական միջավայրում։ Թեև ծրագիրը ժամանակային առումով կարճաժամկետ է, սակայն դրա ազդեցությունը համակարգային և երկարաժամկետ բնույթ ունի. այն նպաստում է մասնագիտության գիտակցված ընտրության մշակույթի ձևավորմանը և «բուհ–դպրոց» ինստիտուցիոնալ համագործակցության ամրապնդմանը։