«ԵՊՀ տնտեսագիտական դպրոց» ծրագիրը Տնտեսագիտության և կառավարման ֆակուլտետի ավանդական և սպասված նախաձեռնություններից է, որի շարունակականությունը և տարեցտարի ընդլայնվող մասշտաբները վկայում են՝ բուհական կրթության արդյունավետությունը իրապես պայմանավորված է մասնագիտական գիտակցված ընտրությամբ։
Տնտեսագիտության և կառավարման ֆակուլտետում ընթացիկ տարվա փետրվարի 28-ին և մարտի 1-ին կայացավ «ԵՊՀ տնտեսագիտական դպրոց» ծրագրի 2025–2026 ուստարվա գարնանային շրջափուլը։ Երկօրյա հագեցած ծրագրի շրջանակում Երևանի և մի շարք մարզերի շուրջ 40 ավագ դպրոցների, քոլեջների և վարժարանների մոտ 120 աշակերտներ ծանոթացան ֆակուլտետի կառուցվածքին, կրթական ծրագրերի առանձնահատկություններին և մասնագիտական զարգացման հնարավորություններին։
Ծրագրի կարևոր բաղադրիչ էին մասնագիտական ինտերակտիվ դասընթացներն ու բիզնես խաղերը, որոնց միջոցով մասնակիցները ներգրավվեցին տարբեր մասնագիտական քննարկումներին, փորձեցին կայացնել բիզնես գործընթացներին առնչվող և կառավարչական բնույթի տարբեր որոշումներ։ Այս ձևաչափը հնարավորություն տվեց մասնագիտական տեսական գիտելիքները կապելու իրական տնտեսական միջավայրի հետ՝ օգնելով աշակերտներին ինքնուրույն գնահատել մասնագիտության նկատմամբ իրենց հետաքրքրությունն ու համապատասխանությունը։
Ծրագրի ընթացքում մասնակիցները ծանոթացան նաև համալսարանի պատմությանը, ակադեմիական ավանդույթներին և ձևավորված կորպորատիվ արժեքներին՝ կազմելով ամբողջական պատկերացում ոչ միայն մասնագիտական, այլև ինստիտուցիոնալ միջավայրի մասին։ Սա կարևոր նախապայման է մասնագիտություն ընտրելիս, քանի որ բուհի ընտրությունը պայմանավորված է ոչ միայն կրթական ծրագրերի բովանդակությամբ, այլև արժեքային և մշակութային համապատասխանությամբ։
Մասնագիտական կողմնորոշումը պետք է լինի գիտակցված, հիմնված լինի գիտելիքի, փորձառության և արժեհամակարգային ինքնորոշման վրա։ ԵՊՀ տնտեսագիտության և կառավարման ֆակուլտետը, շարունակելով բարձր որակավորում ունեցող տնտեսագետներ, կառավարման և ֆինանսների ոլորտի մասնագետներ պատրաստելու իր պատասխանատու առաքելությունը, ծրագրի միջոցով հաստատում է իր ակտիվ դերակատարումը նաև նախաբուհական կրթական միջավայրում։ Թեև ծրագիրը ժամանակային առումով կարճաժամկետ է, սակայն դրա ազդեցությունը համակարգային և երկարաժամկետ բնույթ ունի. այն նպաստում է մասնագիտության գիտակցված ընտրության մշակույթի ձևավորմանը և «բուհ–դպրոց» ինստիտուցիոնալ համագործակցության ամրապնդմանը։
ԵՊՀ տնտեսագիտության և կառավարման ֆակուլտետի դեկան դոցենտ Կառլեն Խաչատրյանի փոխանցմամբ, «ԵՊՀ տնտեսագիտական դպրոց» ծրագրով ԵՊՀ տնտեսագիտության և կառավարման ֆակուլտետը արձագանքում է ժամանակի կարևորագույն մարտահրավերներից մեկին՝ մասնագիտական կողմնորոշման որակին։ Տարիներ շարունակ բուհ և մասնագիտություն ընտրելու գործընթացը հաճախ պայմանավորված է եղել մակերեսային պատկերացումներով կամ սոցիալական միտումներով։
Ծրագիրը կրթական նախաձեռնություն լինելուց բացի՝ երկարաժամկետ մարդկային կապիտալի ձևավորման կարևոր ներդրում է, որը հնարավորություն է ընձեռում ապագա դիմորդներին ծանոթանալու մասնագիտության բովանդակությանը, կիրառական նշանակությանը և մասնագիտական աճի հեռանկարներին։ Այն ոչ միայն մասնագիտական կողմնորոշման և գիտելիք փոխանցելու հարթակ է, այլև մտածողություն ձևավորող և համալսարանը դպրոցականներին հասանելի, ճանաչելի դարձնող միջավայր։
Ծրագրի իրականացումը հնարավոր է դառնում ֆակուլտետի պրոֆեսորադասախոսական անձնակազմի և ուսանողական կառույցների՝ Ուսանողական խորհրդի և Ուսանողական գիտական ընկերության ակտիվ ներգրավվածության և կազմակերպական հետևողական աշխատանքի շնորհիվ, ինչը հնարավորություն է տալիս ապահովելու ծրագրի բովանդակային հագեցվածությունը:
Բովանդակությամբ և ուղղվածությամբ լինելով աննախադեպ՝ «ԵՊՀ տնտեսագիտական դպրոց» երկօրյա ծրագիրը իրականացվում է ԵՊՀ տնտեսագիտության և կառավարման ֆակուլտետի նախաձեռնությամբ և ԵՊՀ ընդունելության և դիմորդների հետ տարվող աշխատանքների կենտրոնի աջակցությամբ: Գարնանային և աշնանային շրջափուլերով ծրագիրը համախմբում է 11-րդ և 12-րդ դասարանների աշակերտներին։
Ծրագրի ռազմավարական նշանակությունը պայմանավորված է նրանով, որ մասնագիտական ընտրության փուլում հաճախ առկա է անբավարար տեղեկատվություն և տնտեսագիտության ուղղությունների վերաբերյալ մակերեսային պատկերացում։ «ԵՊՀ տնտեսագիտական դպրոցը» միտված է լրացնելու այդ բացը՝ ապահովելով անմիջական շփում ակադեմիական միջավայրի հետ և ներկայացնելով կրթական ծրագրերի կառուցվածքը, միջազգային շարժունության հնարավորությունները, ինչպես նաև աշխատաշուկայում մասնագիտական գիտելիքների և հմտությունների իրացման հեռանկարները։ Ըստ այդմ՝ նախաձեռնությունը լուծում է ոչ միայն տեղեկատվական, այլև որակական խնդիր՝ նպաստելով մասնագիտության գիտակցված ընտրությանը և նվազեցնելով մասնագիտության փոփոխության ռիսկերը։
Ամփոփելով նշենք, որ ծրագրի հերթական շրջափուլը ևս մեկ անգամ արձանագրեց մի շարք էական միտումներ։ Նախ՝ նկատվում է տնտեսագիտության նկատմամբ աճող հետաքրքրություն՝ պայմանավորված ինչպես ոլորտի արդիականությամբ, այնպես էլ դրա բազմագործառույթ կիրառական հնարավորություններով։ Երկրորդ՝ ակնհայտ է փորձառական և ինտերակտիվ ուսուցման ձևաչափերի նկատմամբ բարձր պահանջարկը, ինչը համահունչ է ժամանակակից կրթական միջավայրի և նոր սերնդի ուսուցման առանձնահատկություններին։ Երրորդ՝ աշակերտների ակտիվ ներգրավվածությունը և հարցադրումների խորությունը վկայում են, որ մասնագիտական ընտրության պատասխանատվությունը հետևողականորեն աճում է՝ դառնալով գիտակցված և ինքնուրույն որոշման արդյունք։ Ծրագիրը հետագա շրջափուլերում կշարունակի ընդլայնել իր աշխարհագրությունը՝ ներգրավելով ավելի մեծ թվով դպրոցներ և աշակերտներ Հայաստանի հեռավոր մարզերից։
