Հոգեբանության գիտահետազոտական կենտրոն

2022 թ. ԵՊՀ-ում հիմնադրվել է փորձարարական հոգեբանության գիտահետազոտական լաբորատորիայի ընդլայնված վերակազմավորումը՝ Հոգեբանության գիտահետազոտական կենտրոնը, որի հիմքում Անձի և մասնագիտական գործունեության հոգեբանության (հիմնադրվել է 2006 թ.) ու Անձի և սոցիալական միջավայրի գիտահետազոտական լաբորատորիաներն են (հիմնադրվել է 2011 թ.)։ 

Կենտրոնի ղեկավարն է հ․գ․դ․, պրոֆեսոր Հրանտ Միքայելի Ավանեսյանը։

Կենտրոնի գործունեությունը միտված է՝

• հոգեկան առողջության, հոգեբանական բարեկեցության և անվտանգության ոլորտներում արդիական մեթոդների կիրառմամբ համակարգված և բազմափուլ հոգեբանական հետազոտություններ կատարելուն,
• ստացված արդյունքների հիման վրա հոգեբանական գնահատում կատարելուն,
• խորհրդատվության չափորոշիչների և գործիքակազմի ստեղծմանը։

Կենտրոնը հետազոտական նոր աշխատանքների միջոցով նաև ներդնում է տեսական ու գործնական արժեք ունեցող տվյալներ ակադեմիական և հանրամատչելի հարթակներում, ինչպես նաև ապահովում է հետազոտությունների արդյունքների կիրառելիությունը մարդկային գործունեության տարբեր ոլորտներում (կրթություն, առողջապահություն, գործարարություն, ռազմական ոլորտ, սոցիալ-մշակութային ոլորտ և այլն)։

Կենտրոնի հետազոտական ուղղություններն են՝ մեթոդաբանություն, հոգեֆիզիոլոգիա, կոգնիտիվ գիտություններ, անձը իրական սոցիալական (COVID-19, հետպատերազմյան իրավիճակ) և մասնագիտական գործունեության միջավայրում։

Կենտրոնը զբաղվում է նաև ամբողջ աշխարհում կիրառվող և բարձր արդյունավետություն ունեցող մեթոդների տեղայնացման գործընթացով։

Կենտրոնի ենթակառուցվածքի՝ Անձի և սոցիալական միջավայրի գիտահետազոտական լաբորատորիայի աշխատանքն ուղղված է անձի արժեքային կողմնորոշումների դրսևորման առանձնահատկությունների ուսումնասիրությանն ու սոցիալ-հոգեբանական այլ գործոնների հետ վերջինիս փոխկապվածության դուրսբերմանը և սոցիալ-հոգեբանական գործոնների ուսումնասիրմանը։ Լաբորատորիայի վարիչն է հ․գ․դ․, դոցենտ Նարինե Գագիկի Խաչատրյանը։ 

2023թ․ «Հեռավար լաբորատորիաներ-2023» ծրագրի շրջանակում ստեղծվեց և հոգեբանության գիտահետազոտական կենտրոնի կազմում սկսեց իր գործունեությունը «Հանրային գործընթացների հոգեբանական ուսումնասիրություններ» գիտական խումբը, որի ղեկավարն է հ․գ․թ․ Սոնա Հովհաննեսի Մանուսյանը։

Կենտրոնը համագործակցում է տեղական և միջազգային տարբեր կազմակերպությունների հետ՝ ապահովելով հետազոտական արդի գործիքակազմ և արդյունքների կիրառելիություն գործունեության տարբեր ոլորտներում։