Արժևորում, ոգեշնչում և համագործակցություն․ ԵՊՀ-ում ամփոփվեցին կորեերենի դասընթացի արդյունքները

Ողջույնի խոսքով հանդես եկավ ԵՊՀ միջազգային հարաբերությունների ֆակուլտետի դեկան, պ.գ.թ., դոցենտ Տիգրան Եփրեմյանը՝ շեշտելով լեզվամշակութային կրթության նշանակությունը ժամանակակից աշխարհում։ 

«Մեծապես կարևորում ենք նմանօրինակ նախաձեռնությունները, քանի որ լեզվի ուսուցումն այն կամուրջն է, որը միավորում է տարբեր մշակույթներ։ Կորեերենի դասընթացի միջոցով մեր ուսանողները ոչ միայն լեզվական գիտելիքներ են ձեռք բերել, այլև ծանոթացել են հարուստ մշակութային ժառանգությանը։ Սա մի գործընթաց է, որը խորացնում է մեր երկրների փոխադարձ ըմբռնումը և նպաստում է միջազգային համագործակցության ամրապնդմանը։ Հուսով եմ՝ այս ճանապարհը շարունակական կլինի, և է՛լ ավելի շատ ուսանողներ կմասնակցեն այսօրինակ ծրագրերին»,- նշեց դեկանը։

Միջոցառման պատվավոր հյուրն էր Նոր Զելանդիայի Օքլենդի համալսարանի արվեստի և կրթության ֆակուլտետի կորեագիտության/ասիագիտության դոցենտ Չանգզու Սոնգը, որը խոսեց կորեերենի գլոբալ տարածման միտումների և Հայաստանի հետ մշակութային փոխգործակցության հեռանկարների մասին։

Ցերեկույթի մշակութային հատվածը վերածվեց կորեական արվեստը ճանաչելու ինքնատիպ հարթակի. ԵՊՀ ուսանողները հանդես եկան կորեական հեքիաթի հիման վրա բեմադրված ներկայացմամբ, արտասանեցին կորեերեն բանաստեղծություններ, կատարեցին ավանդական երգեր և պարեր՝ ցուցադրելով ձեռք բերած լեզվամշակութային գիտելիքները։ Ստեղծված ջերմ և ոգևորիչ մթնոլորտը վկայում էր ուսանողների ներգրավվածության և նվիրվածության մասին։

Միջոցառման ավարտին ուսանողներին դասընթացին մասնակցելու և արձանագրած հաջողությունների համար ԵՊՀ միջազգային հարաբերությունների ֆակուլտետի անունից շնորհվեցին ավարտական վկայականներ՝ նպատակ ունենալով խթանելու և արժևորելու ուսանողների լեզվական կրթությունն ու կորեական մշակույթի, պատմության վերաբերյալ նրանց գիտելիքները։ 

Հավելենք, որ միջոցառմանը ներկա էին Հայաստանում կորեերեն դասավանդողների ասոցիացիայի անդամներ, դասընթացը վարող դասախոսները, հյուրեր։ Նախաձեռնությունը միտված էր նաև Հայաստանում Կորեայի մասին իրազեկվածության բարձրացմանը, կրթամշակութային կապերի ընդլայնմանը։