Նոր հորիզոններ շարունակական կրթության ոլորտում. ԵՊՀ շարունակական կրթության կենտրոնի մոտեցումները

- Տիկի՛ն Խառատյան, ի՞նչ հիմնական ուղղություններով է աշխատում ԵՊՀ շարունակական կրթության կենտրոնը։

- Կենտրոնի աշխատանքը կարելի է բաժանել մի քանի հիմնական ուղղությունների։ Առաջինը ԵՊՀ դասախոսների և ուսումնաօժանդակ անձնակազմի վերապատրաստումն է, ինչը նպաստում է ԵՊՀ-ում կրթության որակի բարձրացմանը։ Մենք մշակում ենք տարբեր ձևաչափերով ծրագրեր՝ դասախոսների մասնագիտական, դասավանդման, հետազոտական, ինչպես նաև «փափուկ» հմտությունների զարգացման համար, այդ թվում՝ կատարվում է լեզուների ուսուցում, հաղորդակցական կարողությունների բարելավում և այլն։

Երկրորդ՝ կրթական առաջարկի ձևավորում ԵՊՀ-ից դուրս՝ տարբեր տարիք ու հետաքրքրություններ ունեցող խմբերի համար։ Օրինակ՝ քաղաքացիական ծառայողների, այլ համալսարաններում դասավանդողների, ուսուցիչների համար և այլն: 

Բացի դրանից՝ մշակվում և իրականացվում են մասնագիտական վերապատրաստման կարճաժամկետ ծրագրեր, որոնց նպատակն է արձագանքել ոլորտային նոր պահանջներին։ Օրինակ՝ վերջին շրջանում համագործակցել ենք ԵՊՀ աշխարհագրության և երկրաբանության ֆակուլտետի հետ՝ մշակելով և իրականացնելով ՀՀ քաղաքաշինության կոմիտեի կողմից հաստատված «Ինժեներային երկրաբանություն» մասնագիտական շարունակական զարգացման ծրագիրը գործող ինժեներային երկրաբանների համար:

- Ուսանողները հնարավորություն ունե՞ն մասնակցելու կենտրոնի առաջարկած ծրագրերին։

- Շարունակական կրթության կենտրոնը, կարևորելով ոչ ֆորմալ կրթության զարգացումը, ուսանողների համար մշակում և իրականացնում է ոչ ֆորմալ կրթություն։ Այս համատեքստում հարկ է ընդգծել, որ ս․թ․ հուլիսի 7-11-ը տեղի կունենա միջազգային ամառային դպրոց՝ «Օրենքը և կոնֆլիկտը Հարավային Կովկասում» թեմայով, որի շրջանակում կքննարկվեն միջազգային իրավունքին և տարածաշրջանային կոնֆլիկտներին առնչվող հարցեր։ Գրացի համալսարանի (Ավստրիա) հետ գործակցությամբ կազմակերպվող միջազգային դպրոցին կմասնակցեն թե՛ Գրացի, թե՛ ԵՊՀ ուսանողները։ Սա ուսանողների համար կլինի հետաքրքիր փորձառություն ոչ միայն կրթական, այլև մշակութային շփման առումով։

- Նշեցիք, որ կենտրոնը կազմակերպում է հանրային միջոցառումներ։ Կարո՞ղ եք օրինակներ բերել։

- Նման միջոցառումներ անցկացնում ենք մեր նախաձեռնած «Ազատ ունկնդիր» հարթակի շրջանակում: Մասնավորապես, կազմակերպում ենք բաց դասախոսություններ, գրքերի շնորհանդես-քննարկումներ, հանդիպումներ թե՛ հայաստանյան, թե՛ արտասահմանյան հեղինակավոր մասնագետների հետ։ Ի դեպ, այս միջոցառումները հասանելի են բոլորին։

- Կենտրոնն ունի՞ այնպիսի ծրագրեր, որոնք նախատեսված են դպրոցականների համար։

- Քանի որ ուսումնառությունը ցկյանս առնչվում է տարիքային բոլոր խմբերին՝ մեզ համար կարևոր է նաև դպրոցականների հետ աշխատանքը։ Ունենք հետաքրքիր ծրագիր՝ «Բնագիտությունը զվարճալի՜ է. տե՛ս, շոշափի՛ր, փորձի՛ր» բնագիտական աշխատարանը: Այն, տեսականից զատ, դպրոցահասակներին ընձեռում է բնագիտական փորձարարական/գործնական փորձառության հնարավորություն՝ հետաքրքրություն ձևավորելով գիտության նկատմամբ։ Արցախից բռնի տեղահանված երեխաների համար հատուկ մշակեցինք Բնագիտական ամառային ճամբարի ծրագիր, որն անցյալ տարի տեղի ունեցավ Բյուրականում, իսկ այս տարի իրականացվում է Ծաղկաձորում։ Ծրագիրն ընդգրկում է բնագիտության, արվեստի և մշակութային բաղադրիչներ։

- Ինչպե՞ս կգնահատեք դասախոսների համար նախատեսված վերապատրաստման ծրագրերը։

- Դասախոսների մասնակցության մակարդակը վերապատրասման դասընթացներին բավականին բարձր է, քանի որ վերապատրաստման արդյունքները հաշվարկվում և ազդում են հետագա ատեստավորման վրա։ Սա մեզ հնարավորություն է տալիս վերլուծելու արդյունքները և շարունակաբար կատարելագործելու մեր ծրագրերը։

- Ո՞րն է կենտրոնի ապագայի տեսլականը։

- ԵՊՀ շարունակական կրթության կենտրոնի առաջնահերթություններից է բազմազան, բայց կայուն ծրագրային առաջարկների ապահովումը։ Նպատակ ունենք ոչ ֆորմալ կրթությունը դարձնելու առավել հետաքրքիր ուսանողների համար, ինչպես նաև շարունակելու բարձր որակով և թիրախային վերապատրաստման ծրագրերը դասախոսների համար։ Կենտրոնը նաև ընդլայնում է իր հետազոտական ուղղությունները․ յուրաքանչյուր տարի հայտարարվում են հետազոտական մրցույթներ։ Օրինակ՝ այս տարի ուսանող-դասախոս համատեղ թիմերը հետազոտելու են Հայաստանի ուսումնառու քաղաքները «Դի-Վի-Վի Ինթերնեյշնալ»-ի հայաստանյան գրասենյակի և ՇԿԿ համագործակցության շրջանակում։

Մեր հեռահար նպատակներից է դառնալ մեծահասակների ոչ ֆորմալ կրթության կարևոր հանգույց Հայաստանում։