ԵՊՀ 6-րդ մասնաշենքի (Սև շենքի) դահլիճում տեղի ունեցավ առաջինկուրսեցիների դիմավորման հանդիսավոր արարողությունը:
Ներկաներին ողջունեց և շնորհավորական ուղերձով հանդես եկավ ԵՊՀ տնտեսագիտության և կառավարման ֆակուլտետի դեկան, դոցենտ Կառլեն Խաչատրյանը:
«Սիրելի՛ առաջինկուրսեցիներ, այսօր յուրահատուկ օր է։ Սեպտեմբերի 1-ը միշտ եղել է նոր սկզբի խորհրդանիշ։ Այսօր ձեզ համար այն ոչ միայն հերթական ուսումնական տարվա մեկնարկ է, այլև կյանքի նոր շրջափուլի սկիզբ։ Դուք այստեղ եք, որովհետև համարձակվել եք երազել և այդ երազանքի հետևից գնալ։ Դուք հաջողել ու դարձել եք ԵՊՀ տնտեսագիտության և կառավարման ֆակուլտետի ուսանող, որտեղ սկսելու եք ձեր մասնագիտական, գիտական ու անձնային զարգացման ամենակարևոր ճանապարհը։
Երևանի պետական համալսարանն ավելի քան մեկ դար եղել և մնում է Հայաստանի կրթական ու գիտական կյանքի սիրտը։ Այս պատերի ներսում կրթվել ու դաստիարակվել են Հայաստանի քաղաքական, գիտական, մշակութային և տնտեսական վերնախավի ներկայացուցիչները։ Տնտեսագիտության և կառավարման ֆակուլտետը ևս՝ իբրև ամբողջի մի մաս, ունի հարուստ ավանդույթներ։ Այն պատրաստել է տնտեսագետների և կառավարիչների մի քանի սերունդ, որոնք այսօր ղեկավարում են պետական կառույցներ, խոշոր բիզնեսներ, միջազգային կազմակերպություններ։ Դուք դառնում եք այդ ավանդույթի մի մասնիկը:
Համալսարանական տարիների ամենակարևոր ձեռքբերումներից են նաև նոր ծանոթությունները, կապերը, որոնք ուղեկցելու են ձեզ ողջ կյանքի ընթացքում։ Ակտիվ եղեք, ապրեք ակտիվ ուսանողական կյանքով, մասնակցեք ուսանողական կառույցների աշխատանքներին, միացեք տարբեր ծրագրերի, հանդես եկեք նախաձեռնություններով։ Ձեր կողքին նստած ուսանողը վաղը կարող է դառնալ ձեր գործընկերը կամ լավագույն ընկերներից մեկը»:
Վկայակոչելով Սթիվ Ջոբսի, Թոմաս Էդիսոնի, Միքայել Արամյանցի և Մանթաշյանցի օրինակները՝ դեկանն իր խոսքում ընդգծեց նաև, որ հաջողության հասնելու ճանապարհին վճռորոշ են համառությունը, ռիսկի դիմելու պատրաստակամությունը և սեփական տաղանդների բացահայտումը: Կարևորելով ուսանողական տարիների դերը կարիերայի ամուր հիմքեր դնելու գործում՝ դեկանը հորդորեց առաջինկուրսեցիներին հնարավորինս արդյունավետ օգտագործել համալսարանի ընձեռած հնարավորությունները, առավելագույնը ստանալ դասախոսներից և գիտակցել, որ այն, ինչ պետք է սովորեն ուսանողական տարիներին, հետագայում ժամանակի սղության, կենտրոնացվածության պակասի կամ անբավարար ռեսուրսների պատճառով դժվարությամբ կամ շատ ավելի մեծ ջանքերով է հնարավոր վերականգնել: Իսկ ֆակուլտետի պրոֆեսորադասախոսական կազմն ու ղեկավարությունը անում են հնարավոր ամենը, որպեսզի ուսանողները ստանան մրցունակ կրթություն։
«Սիրելի՛ ուսանողներ, դուք ճիշտ ընտրություն եք կատարել և ընտրել եք ողջ աշխարհում մեծ պահանջարկ վայելող մասնագիտություններ։ Սիրե՛ք ձեր մասնագիտությունը, սիրե՛ք այն աշխատանքը, որ կատարում եք։ Մենք օգնելու ենք ձեզ՝ տեսնելու տնտեսագիտության, կառավարման, ֆինանսների ողջ հմայքն ու գեղեցկությունը։ Մենք ամեն բան անում ենք ֆակուլտետում արդար, արդյունավետ, հարմարավետ կրթական միջավայր ձևավորելու համար։ Մաղթում եմ, որ ձեր ուսանողական տարիները դառնան ձեր կյանքի ամենագունեղ, ամենահետաքրքիր և ամենաարդյունավետ շրջանը։ Շնորհավորում եմ ձեզ Սեպտեմբերի 1-ի կապակցությամբ: Բարի գալուստ ԵՊՀ տնտեսագիտության և կառավարման ֆակուլտետ»,- իր խոսքը եզրափակեց դեկանը:
Առաջինկուսեցիներին ողջունեցին նաև ֆակուլտետի դեկանի տեղակալ, դոցենտ Վարդան Ալեքսանյանը, դեկանի տեղակալ, դոցենտ Նարինե Միրզոյանը, Տնտեսագիտության և միջազգային տնտեսական հարաբերությունների ամբիոնի վարիչ, դոցենտ Գրիգոր Հայրապետյանը, Կառավարման և գործարարության ամբիոնի վարիչ, դոցենտ Աննա Հակոբջանյանը, Ֆինանսահաշվային ամբիոնի վարիչ, դոցենտ Գնել Սահակյանը և Տնտեսագիտության մեջ մաթեմատիկական մոդելավորման ամբիոնի վարիչ, դոցենտ Ալվարդ Խառատյանը՝ հորդորելով լավ սովորել և չվախենալ դժվարություններից:
Ուսանողներին շնորհավորանքի ջերմ խոսք հղեց նաև ԵՊՀ տնտեսագիտության և կառավարման ֆակուլտետի ուսանողական խորհրդի նախագահ Բենիկ Բալայանը՝ խորհուրդ տալով օգտվել համալսարանի ընձեռած բոլոր հնարավորություններից և ամեն ինչ անել ի նպաստ հայրենիքի բարօրության և զարգացման։
«Մենք բոլորս ընդունվել ենք ԵՊՀ տնտեսագիտության և կառավարման ֆակուլտետ՝ սովորելու և գիտելիքներ ձեռք բերելու նպատակով, և ֆակուլտետը տալիս է այդ հնարավորությունը: Մեզ մնում է կառչել այդ հնարավորությունից: Գիտելիքը մեր ամենամեծ զենքն է, բայց այսօրվա աշխարհում նաև կարևոր է ոչ միայն այդ գիտելիքը, այլև այդ գիտելիքը կյանքի կոչելը»:
Արդեն 3-րդ կուրսի ուսանող Բանիկ Բալայանը կոչ արեց գալիք տարիներն օգտագործել սեփական ուժեղ կողմերը բացահայտելու, թույլերը հաղթահարելու և ամեն օր ավելի ու ավելի զարգանալու նպատակով: Ընդգծելով հաղորդակցության և ծանոթությունների կարևորությունը՝ ուսխորհրդի նախագահը բոլոր առաջինկուրսեցիներին ևս մեկ անգամ հրավիրեց դառնալու ամենաակտիվ ուսանողական կառույցի անդամ:
Բարի գալուստ ԵՊՀ, բարի գալուստ մեր մեծ, համերաշխ ընտանիք: Թող այս ընտանիքում իրականանան Ձեր բոլոր երազանքները: Շնորհավորում ենք բոլորիդ Երևանի պետական համալսարանի առանցքային ֆակուլտետներից մեկի ուսանողը դառնալու կապակցությամբ: Բարի երթ և կանաչ ճանապարհ։
