ԵՊՀ տնտեսագիտության և կառավարման ֆակուլտետի տնտեսագիտության և միջազգային տնտեսական հարաբերությունների ամբիոնի վարիչ Գրիգոր Հայրապետյանը միջազգային հարաբերությունների ամրապնդման և փորձի փոխանակման նպատակով ս.թ. դեկտեմբերի 7–13-ը գերմանական ակադեմիական փոխանակման ծառայության արևելյան գործընկերության («DAAD Eastern Partnership») շրջանակում աշխատանքային այցով Գրայֆսվալդի համալսարանում էր (Գերմանիա)։
Այցի շրջանակում Գրիգոր Հայրապետյանը հանդիպել է Գրայֆսվալդի համալսարանի իրավունքի և տնտեսագիտության ֆակուլտետի ընդհանուր տնտեսագիտության, աճի, կառուցվածքային փոփոխությունների և առևտրի ամբիոնի վարիչ Սուսաննե Սորետցի հետ։ Հանդիպման ընթացքում քննարկվել են երկու ֆակուլտետների միջև համագործակցության զարգացման հնարավորությունները համատեղ հետազոտությունների կատարման, դասախոսների և ուսանողների շարժունության մեխանիզմների մշակման ուղղություններով։ Պայմանավորվածություն է ձեռք բերվել փոխանակելու և դիտարկելու երկու ֆակուլտետների կրթական ծրագրերի դասընթացների կառուցվածքը՝ համադրելիությունն ապահովելու և ակադեմիական շարժունության գործընթացն արդյունավետ կազմակերպելու նպատակով։
Հանդիպման ընթացքում Գրիգոր Հայրապետյանը ներկայացրել է ֆակուլտետի վեց կրթական ծրագրերը (երեքը՝ բակալավրիատի, երեքը՝ մագիստրատուրայի), որոնք այժմ միջազգային ծրագրային հավատարմագրման փուլում են: Հաշվի առնելով, որ հավատարմագրման գործընթացն իրականացնող կազմակերպությունը գերմանական է, կողմերը քննարկել են համագործակցության այն ձևաչափերը, որոնք կարող են նպաստել տվյալ գործընթացի արդյունավետ իրագործմանը։
Այցը բացառիկ հնարավորություն էր օտարերկրյա գործընկերներին հրավիրելու 2026 թվականի հոկտեմբերի 7–9-ը Երևանում ԵՊՀ տնտեսագիտության և կառավարման ֆակուլտետում կազմակերպվող «Փոխակերպվող տնտեսություն. «կանաչ» վերափոխում, ինստիտուտների որակ և արժեքի ստեղծում» խորագրով միջազգային 3-րդ գիտաժողովին, որն արդեն զգալի հետաքրքրություն է առաջացրել մի շարք գործընկեր համալսարանների շրջանում։
Պայմանավորվածության համաձայն՝ գարնանը Գրայֆսվալդի համալսարանի ներկայացուցիչները կայցելեն Երևանի պետական համալսարան՝ քննարկելու Տնտեսագիտության և կառավարման ֆակուլտետի հետ համագործակցության հետագա քայլերը:
Այցի ընթացքում Գրիգոր Հայրապետյանը մասնակցել է նաև Գրայֆսվալդի համալսարանի միջազգային գրասենյակի կազմակերպած մշակութային միջոցառմանը և համալսարանի գործունեությանը նվիրված տեղեկատվական հանդիպմանը։
