ԵՊՀ այցի շրջանակում Ղազախստանի Աբայի անվան ազգային մանկավարժական համալսարանի պատվիրակները հանդես են եկել «Ժամանակակից մասնագետի թվային իրավասությունները» խորագրով բաց դասախոսությամբ, որը նախատեսված էր Ժուռնալիստիկայի ֆակուլտետի բակալավրիատի ուսանողների համար:
Դասախոսությամբ հանդես են եկել մանկավարժական գիտությունների դոկտոր, պրոֆեսոր, գիտության դեպարտամենտի տնօրեն Աբսատովա Մարֆուգան և մանկավարժական գիտությունների թեկնածու, պրոֆեսոր, մանկավարժության ամբիոնի վարիչ Կոլումբաևա Շոլպանը։ Արժանահիշատակ է, որ Աբայի անվան ազգային մանկավարժական համալսարանը «QS World University Rankings 2025»-ում զբաղեցնում է 671–680 հորիզոնականը:
Դասախոսության ընթացքում ներկայացվեցին թվային հմտությունների կառուցվածքային բաղադրիչներ՝ տեղեկատվական գրագիտություն, թվային հաղորդակցություն և համագործակցություն, կիբեռանվտանգություն և թվային հիգիենա, ինչպես նաև թվային ստեղծագործականություն:
Քննարկման առարկա են դարձել նաև «Google»-ծառայության առավելությունները՝ «Google Docs»-ը, «Google Forms»-ը, «Google Presentation»-ը, «Google Sites»-ը, «Padlet» հարթակի հնարավորությունները, «Online Test Pad»-ի, «Simpoll»-ի գործունեության արդյունքների գնահատման ռեսուրսները, «LearningApps»-ի մասնագիտացված առաջադրանքների մշակման գործիքները և այլն:
Ներկայացված թվային ծառայությունները գործիքային էկոհամակարգի մաս են կազմում։ «Google Docs»-ի, «Google Forms»-ի, «Google Presentations»-ի և «Sites»-ի նման առցանց հարթակները նպաստում են ուսուցման վերարտադրողական մոդելից կառուցողականի՝ կոնստրուկտիվիստականի անցմանը, որում սովորողները ոչ միայն պասիվ են օգտագործում տեղեկատվությունը, այլև համատեղ կառուցում են գիտելիքներ: Առցանց «Padlet» գրատախտակը և «LearningApps» տիպի գործիքները թույլ են տալիս կազմակերպել ուսուցումը փոքրածավալ նախագծերի, ինտերակտիվ առաջադրանքների և տեսողական սցենարների ձևաչափով, ինչը ուժեղացնում է մոտիվացիան և աջակցում ուսուցման բազմամոդալությանը (տեսողական, բանավոր, շարժողական (կինեսթետիկ)): «OnlineTestPad» և «Simpoll» հարթակներն ապահովում են ձևավորող գնահատում՝ թույլ տալով տվյալ նյութի յուրացմանն ու կրթական գործընթացի շտկմանը:
Նշանագիտության տեսանկյունից թվային կրթական հարթակները հանդես են գալիս որպես բազմամակարդակ նշանային համակարգեր, որոնցում գիտելիքը ներկայացվում է ոչ միայն տեքստի, այլև տեսողական, պատկերագրական, տարածական և ինտերակտիվ կոդերի միջոցով։ «Google» ծառայությունների ինտերֆեյսերը՝ «Padlet»-ը և «LearningApps»-ը, ձևավորում են «տեսողական քերականության» հատուկ տեսակ, որտեղ իմաստը ստեղծվում է տեքստի, պատկերի, հիպերհղման և գույնի համադրության միջոցով:
Այս գործիքների օգտագործումը նպաստում է համակցված (մուլտիմոդալ) գրագիտության զարգացմանը, քանի որ սովորողներն ուսումնառության շնորհիվ ի վիճակի են լինում մեկնաբանելու և ստեղծելու հաղորդագրություններ տարբեր խորհրդանշական ձևերով: Նշանագիտության տեսանկյունից կարևոր է նաև այն, որ թվային հարթակները ձևավորում են նոր կրթական խոսույթ, որում ուսուցումը հասկացվում է որպես նշանների, ինտերֆեյսերի և սոցիալական պրակտիկայի փոխազդեցության գործընթաց, այլ ոչ թե որպես տեղեկատվության գծային փոխանցում:
Հանդիպման ավարտին մասնակիցները կարևորեցին հատկապես դասախոսության գործնական ուղղվածությունը, թվային գործիքների կիրառական բնույթը և դրանց անմիջական կիրառելիությունը ինչպես ուսումնական, այնպես էլ մասնագիտական ապագա գործունեության մեջ։
