ԵՊՀ ֆիզիկայի ինստիտուտում բացվեց նոր, ժամանակակից լսարան

ԵՊՀ ֆիզիկայի ինստիտուտում ավարտվել է «Իմ քայլը» հիմնադրամի կողմից իրականացվող «Quanta» քվանտային և մեզոսկոպիկ ֆիզիկայի՝ մեկուկես տարի տևողությամբ մագիստրոսական ծրագրի համար նախատեսված լսարանի վերանորոգումը։ Ժամանակակից ուսումնական միջավայրում ուսանողները հնարավորություն կունենան հարստացնելու գիտելիքներն ու կատարելու գործնական աշխատանքներ։ Լսարանի բացման արարողությանը ներկա էին «Իմ քայլը» հիմնադրամի գործադիր տնօրեն Աննա Հակոբյանը, ԵՊՀ ռեկտոր Հովհաննես Հովհաննիսյանը, պրոռեկտորները, ֆակուլտետի ուսանողները և պրոֆեսորադասախոսական կազմի ներկայացուցիչները։

2025-2026 ուսումնական տարվանից «Quanta» քվանտային և մեզոսկոպիկ ֆիզիկայի մագիստրոսական ծրագիրն իրականացվում է Երևանի պետական համալսարանի հետ համատեղ՝ հնարավորություն տալով ուսանողներին ստանալու մասնագիտական բարձրակարգ կրթություն քվանտային և մեզոսկոպիկ ֆիզիկայի ոլորտում։

Ծրագրի շրջանակում բացված նոր, գերժամանակակից լսարանը ստեղծվել է այնպես, որ ուսանողները կարողանան ուսումնասիրել և զարգացնել գործնական հմտությունները՝ օգտագործելով ժամանակակից տեխնոլոգիաներ, որոնք համահունչ են ծրագրի կրթական չափորոշիչներին։ Ապահովվել են անհրաժեշտ պայմաններ ուսուցման համար, ինչպես նաև ստեղծվել է հարմարավետ միջավայր գիտական քննարկումների, թիմային աշխատանքների և նորարարական գաղափարների իրականացման համար։

ԵՊՀ ռեկտոր Հովհաննես Հովհաննիսյանը նշեց, որ արդիականացված լսարանը ոչ միայն կնպաստի ծրագրի հաջող իրականացմանը, այլև կստեղծի պայմաններ գիտական նախագծերի և հետազոտությունների համար։

«Ստորագրելով փոխըմբռնման հուշագիր հիմնադրամի հետ՝ մենք սկսել ենք համագործակցությունը և այսօր արդեն տեսնում ենք դրա գործնական արդյունքները։ Այսօրինակ ստեղծագործական և ոգեշնչող միջավայրում ուսումնառությունը պատասխանատվություն է պահանջում՝ միաժամանակ ոգեշնչելով ստեղծարարության ու նոր գաղափարների ձևավորման»,- ասաց ԵՊՀ ռեկտորը՝ ընդգծելով, որ մագիստրոսական ծրագրի շրջանակում ակնկալվում է ոչ միայն ուսանողների թվի աճ, այլև նրանց գիտելիքների ու հմտությունների մակարդակի բարելավում ու կատարելագործում։

«Իմ քայլը» հիմնադրամի փոխտնօրեն Թալին Թօփալաքեանը նշեց, որ հիմնադրամը սկզբում աջակցում էր ուսանողներին արտերկրի առաջատար համալսարաններում կրթություն ստանալու համար, սակայն նրանց չվերադառնալու միտումը խթանեց նոր մոտեցման ձևավորումը։ Այս համատեքստում նա մատնանշեց․ «Այդ նպատակով 2022 թվականին մեկնարկեց «Quanta» քվանտային և մեզոսկոպիկ ֆիզիկայի մագիստրոսական ծրագիրը՝ ներգրավելով արտերկրի առաջատար համալսարանների անվանի դասախոսների, որոնք համագործակցեցին տեղի մասնագետների հետ։ Ծրագրի արդյունքում արդեն ունենք շրջանավարտներ, որոնցից շատերը ներգրավված են ոլորտում, ունեն գիտական հրապարակումներ և շարունակում են կրթությունը միջազգային առաջատար կենտրոններում։ 2025–2026 ուսումնական տարվանից ծրագիրն իրականացվում է Երևանի պետական համալսարանի հետ համատեղ, և համագործակցության զարգացման շրջանակում կարճ ժամանակում հիմնովին վերանորոգվել է նաև այս ժամանակակից լսարանը»։

«Quanta» ծրագրի գիտական ղեկավար, դասախոս Հայկ Սարգսյանի խոսքով՝ ծրագրի շրջանավարտներն արդեն մոտ երեք տասնյակ գիտական աշխատանքների համահեղինակներ են, որոնցից մի քանիսին անդրադարձ է կատարվել մամուլում՝ որպես կարևոր արդյունքների։ Նա նաև ընդգծեց, որ ծրագրի երիտասարդ մասնակիցներն աչքի են ընկնում բարձր ակտիվությամբ, իսկ պրոֆեսորադասախոսական կազմը՝ միջազգային առաջատար չափանիշներին համահունչ, բարձր վարկանիշ ունեցող մասնագետներով։

ԵՊՀ ֆիզիկայի ինստիտուտի տնօրեն Խաչատուր Ներկարարյանը փաստեց, որ նման նախաձեռնությունները նպաստում են միջուկային, քվանտային և մեզոսկոպիկ ֆիզիկայի ոլորտներում կրթության որակի բարձրացմանը՝ միաժամանակ խթանելով համալսարանում նորարարական միջավայրի զարգացումը։

Ներկաները վստահություն հայտնեցին, որ նորաբաց լսարանը կդառնա արդյունավետ ուսումնական միջավայր՝ նպաստելով ծրագրի զարգացմանը, և առաջիկայում զգալիորեն կավելանա ծրագրում ընդգրկված ուսանողների թիվը։

Միջոցառման ավարտին ներկաները շրջայց կատարեցին համալսարանում՝ այցելելով ԵՊՀ Սարգիս և Մարի Իզմիրլյանների անվան գրադարան, որի առաջին հարկը «Իզմիրլյան» բարեգործական հիմնադրամի աջակցությամբ վերանորոգվել ու կահավորվել է։