Ընդունելության կարգը

«Քաղաքագիտություն. ինտեգրացիա և կառավարում» մագիստրոսական կրթական ծրագրում ընդունելությունը կատարվում է երկու փուլով: 

Առաջին փուլով անվճար ու վճարովի ուսուցման համակարգի ընդունելության մրցույթին մասնակցելու հնարավորություն ունեն ԵՊՀ բակալավրի առկա և հեռակա ուսուցման ձևերի «Քաղաքագիտություն», «Միջազգային հարաբերություններ», «Հանրային կառավարում» կամ «Հանրային քաղաքականություն և կառավարում» մասնագիտությամբ (կրթական ծրագրի) վերջին երեք ուսումնական տարվա (ուսումնական տարիների հաշվարկը սկսվում է գործող ուսումնական տարվանից) շրջանավարտները՝ ըստ իրենց ամփոփիչ ատեստավորման գնահատականի և դիպլոմի հավելվածում գրանցված միջին որակական գնահատականի (ՄՈԳ-ի):

Առաջին փուլով ընդունելությունը կատարվում է առանց ընդունելության քննության, մրցութային կարգով՝ ատեստավորման գնահատականի և ՄՈԳ-ի շեմի հաշվառմամբ: Մրցութային փուլը հաղթահարում են այն դիմորդները, որոնց ՄՈԳ-ը առնվազն 14 միավոր է: Հավասար ՄՈԳ-ի դեպքում հաշվի են առնվում հետևյալ լրացուցիչ չափորոշիչները. 

ա) գերազանցության դիպլոմի առկայությունը, 

բ) ամփոփիչ ատեստավորման արդյունքները:

Երկրորդ փուլով ընդունելությունը կատարվում է ընդունելության քննության արդյունքների հիման վրա: Այս փուլի ընդունելության մրցույթին մասնակցելու հնարավորություն ունեն ԵՊՀ և այլ պետական, ըստ մասնագիտությունների հավատարմագրված/ինստիտուցիոնալ հավատարմագրում անցած ոչ պետական բարձրագույն ուսումնական հաստատությունների (առկա ու հեռակա ուսուցման ձևերի) բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները:

Երկրորդ փուլով ընդունելության քննությունն անցկացվում է բանավոր՝ մրցութային հանձնաժողովի մասնակցությամբ:

«Քաղաքագիտություն․ ինտեգրացիա և կառավարում» մասնագիտացմամբ մագիստրատուրայի ընդունելության քննության հարցաշար

1. Ազգային շահերը ՀՀ ռազմավարական պլանավորման փաստաթղթերում
2. Աշխարհաքաղաքականությունը և դրա կարգավիճակը ժամանակակից աշխարհում
3. Ավտորիտար վարչակարգի (ռեժիմի) բնորոշ գծերը
4. Արևմուտքը և ոչ Արևմուտքը ժամանակակից միջազգային հարաբերություններում․ «Գլոբալ մեծամասնության» հասկացությունը։
5. Արհեստական բանականության տեխնոլոգիաները ժամանակակից քաղաքականության մեջ. հնարավորություններ, մարտահրավերներ, հեռանկարներ
6. Բարոյականությունը և քաղաքականությունը ժամանակակից աշխարհում
7. Գլոբալիզմ, հակագլոբալիզմ, ալտերգլոբալիզմ. նոր աշխարհակարգի ձևավորման մոտեցումներ
8. Դեմոկրատական վարչակարգի (ռեժիմի) բնորոշ գծերը
9. Ժամանակակից աշխարհակարգի վերափոխումները Ռուսաստան-Արևմուտք աշխարհաքաղաքական դիմակայության համատեքստում
10. Ժամանակակից Հայաստանի ազգային անվտանգությանը․ նոր մարտահրավերներ և սպառնալիքներ
11. Ժամանակակից պետությունների քաղաքական մշակույթի հիմնական արժեքները՝ Արևելք, Արևմուտք
12. Ժամանակակից տեղեկատվական պատերազմների առանձնահատկությունները Հարավային Կովկասում
13. Ժողովրդավարական վարչակարգի փոխակերպումը ՀՀ-ում
14. Իրավական պետության կայացման նախադրյալները ՀՀ-ում
15. Խորհրդարանական մեծամասնություն և կառավարություն. փոխազդեցության հնարավոր ձևերն ու բնութագրերը Հայաստանում
16. Կուսակցական համակարգերի կայացման միտումները հետխորհրդային երկրներում
17. Կուսակցություններ և կուսակցական համակարգեր. ծագում և տիպաբանություն
18. Հակաճգնաժամային պետական քաղաքականության ձևավորման հիմնական բաղադրիչները
19. Հայաստանը՝ որպես փոքր պետություն և պետություն-քաղաքակրթություն
20. Հայաստանի միջազգային կերպարի ձևավորման ժամանակակից տեխնոլոգիաներ
21. Հայկական պետականության արժեքային հիմքերը
22. Հանրային դիվանագիտության և փափուկ ուժի տեխնոլոգիաները հետխորհրդային երկրների արտաքին քաղաքականության մեջ
23. Հարավային Կովկասի երկրների արտաքին քաղաքականության առաջնահերթությունները
24. Հետխորհրդային տարածքի աշխարհաքաղաքականությունը
25. ՀՀ արտաքին քաղաքականությունը տարածաշրջանային տրանսպորտային հաղորդակցություններն ապաշրջափակման ուղղությամբ
26. ՀՀ Կառավարության «Բաց կառավարման գործընկերություն» նախաձեռնության սկզբունքները
27. ՀՀ Կառավարության «Խաղաղության խաչմերուկ» նախագծի տարծաշրջանային և աշխարհաքաղաքական չափումները
28. ՀՀ հակակոռուպցիոն քաղաքականության իրականացման ընթացակարգերը
29. ՀՀ-ԵՄ հարաբերությունները նոր աշխարհաքաղաքական իրավիճակում
30. Հարավային Կովկասի երկրների եվրոպական ինտեգրման հիմնական մակարդակները և հիմնախնդիրները
31. Միջազգային անվտանգություն. տեսական հարցեր և քաղաքական պրակտիկա
32. Միջազգային հարաբերությունները և աշխարհակարգը թվային տեխնոլոգիական փոխակերպումների համատեքստում
33. Միջազգային հարաբերությունների տեսությունների բնորոշ գծերը
34. Նոր աշխարհակարգի համար պայքարը 21-րդ դարում․ ապագա բազմաբևեռ աշխարհի ուրվագծերը
35. Նոր մարտահրավերներ և սպառնալիքներ Հայաստանի եվրոպական ինտեգրման քաղաքականության մեջ
36. Պետական իշխանությունների տարանջատման սկզբունքը ԵՄ և ԵԱՏՄ անդամ պետություններում. տեսություն և քաղաքական պրակտիկա
37. Տարածաշրջանային քաղաքականության փափուկ, կոշտ և խելացի ուժային դինամիկայի առանձնահատկությունները (ՌԴ, Թուրքիա, Իրան, ԱՄՆ, ԵՄ)
38. Քաղաքական առաջնորդության առանձնահատկությունները ՀՀ-ում
39. Քաղաքական ինստիտուտների բնորոշ գծերը․ ինստիտուցիոնալիզմ և նեոինստիտուցիոնալիզմ
40. Քաղաքական համակարգերի և քաղաքական վարչակարգերի (ռեժիմների) տիպաբանության ժամանակակից մոտեցումները․ քաղաքական ռեժիմների հիբրիդացման խնդիրը
41. Քաղաքական համակարգի կայունության և անկայունության գործոնները
42. Քաղաքացիական հասարակությունը և մարդու իրավունքների պաշտպանությունը ժամանակակից Հայաստանում

ԳՐԱԿԱՆՈՒԹՅԱՆ ՑԱՆԿ

1. Ալեքսանյան Ա. Ս., Արևմտյան ժողովրդավարությունների քաղաքական համակարգեր. տեսություն և արդիականություն։ Եր., «Վան Արյան», 2009, 300 էջ։
2. Դիմակայող քաղաքական համակարգերը հիբրիդային պատերազմների և խաղաղության խաչմերուկներում (Հայաստան, Վրաստան, Ադրբեջան, Թուրքիա, Իրան, Ռուսաստան, Ուկրաինա), Խմբ.` Ար. Ս. Ալեքսանյան: Երևան, ԵՊՀ հրատ., 2024, 364 էջ։
3. Եփրեմյան Տ․ Ռ․, ԱՄՆ պատմություն։ Եր.։ ԵՊՀ հրատ., 2024, 544 էջ։
4. Քաղաքագիտություն: Ուսումնական ձեռնարկ։ Եր., ԵՊՀ հրատ․, 2006, 588 էջ: