ԵՊՀ-ն և «:Բուն» գիտամշակութային հիմնադրամը կնքեցին համագործակցության հուշագիր

Կողմերը, արժևորելով ձևավորված գործընկերությունը, ընդգծեցին երկարաժամկետ համագործակցության կարևորությունը։ Նրանց համոզմամբ՝ համատեղ նախաձեռնությունները կնպաստեն համալսարանական կրթական, գիտական և մշակութային նախագծերի զարգացմանն ու արդյունավետ իրագործմանը։

Հուշագրով նախատեսվում է ծրագրերի իրականացում, որոնք միտված են կրթական, գիտական և մշակութային ոլորտներում համագործակցության խորացմանը, ինչպես նաև առկա ռեսուրսների արդյունավետ օգտագործման միջոցով նոր հնարավորությունների ստեղծմանը։

Համագործակցության շրջանակում ԵՊՀ-ն և «:Բուն» գիտամշակութային հիմնադրամը համատեղ ջանքերով կապահովեն համալսարանական կյանքի, կրթական ծրագրերի, գիտակրթական նախաձեռնությունների, միջոցառումների և ձեռքբերումների առավել լայն հանրայնացումը։ Այդ նպատակով կձևավորվեն աշխատանքային խմբեր, որոնք կմշակեն հեղինակային թեմատիկ հաղորդաշարեր, կիրականացնեն փորձի փոխանակում, ինչպես նաև համապատասխան մեդիանյութերի պատրաստում և տարածում սոցիալական ցանցերում, առցանց տեղեկատվական հարթակներում և հեռուստատեսային եթերում։

ԵՊՀ ռազմավարական առաջնահերթություններից են ակադեմիական միջավայրի շարունակական զարգացումն ու կրթական գործընթացների արդիականացումը։ Այս համագործակցությունը լրացուցիչ հնարավորություններ կստեղծի ինչպես գիտնականների և պրոֆեսորադասախոսական համակազմի, այնպես էլ ուսանողների համար։

Մասնավորապես, ուսանողները հնարավորություն կունենան ներգրավվելու տարբեր ծրագրերում և աշխատանքային գործընթացներում, ձեռք բերելու գործնական փորձ, խորացնելու մասնագիտական գիտելիքները, ինչպես նաև զարգացնելու իրենց կարողություններն ու հմտությունները՝ ձևավորելով մասնագիտական արժեքավոր փորձառություն։