ՎԱԼԼԵՏԱՅՈՒՄ ՌՈՒԲԵՆ ՄԵԼՔՈՆՅԱՆԸ ՀԱՆԴԵՍ Է ԵԿԵԼ «ՀԱՆԴՈՒՐԺՈՂԱԿԱՆՈՒԹՅՈՒՆԸ ՀԱՅԿԱԿԱՆ ԿՐԹԱԿԱՆ ՀԱՄԱԿԱՐԳՈՒՄ. ՀԱՋՈՂՈՒԹՅԱՆ ՊԱՏՄՈՒԹՅՈՒՆ ԵՊՀ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏԻ ՕՐԻՆԱԿՈՎ» ԽՈՐԱԳՐՈՎ ԶԵԿՈՒՑՄԱՄԲ

Համաժողովն անցկացվել է Մալթայի նախագահ Ջորջ Վելլայի հովանու ներքո, որն էլ հանդես է եկել բացման և ողջույնի խոսքով: Ողջույնի խոսքով են հանդես եկել նաև  Մալթայի համալսարանի ռեկտոր, պրոֆեսոր Ալֆրեդ Վելլան ու Հանդուրժողականության և խաղաղության գլոբալ խորհրդի նախագահ Ահմեդ Բին Մոհամեդ Ալջարվանը:

Հայաստանից համաժողովին մասնակցել է ԵՊՀ արևելագիտության ֆակուլտետի դեկան, պրոֆեսոր Ռուբեն Մելքոնյանը, որը հանդես է եկել «Հանդուրժողականությունը հայկական կրթական համակարգում. հաջողության պատմություն ԵՊՀ արևելագիտության ֆակուլտետի օրինակով» խորագրով զեկուցմամբ: Համաժողովին մասնակցել են գիտնականներ ԱՄՆ-ի, Լիբանանի, Եգիպտոսի, Մալթայի, Մեքսիկայի և այլ երկրների բուհերից:

Ռ. Մելքոնյանը ներկայացրել է հայկական արևելագիտական դպրոցի անցած ուղին, ձեռքբերումները և այն, որ Հայաստանում՝ քրիստոնեությունն առաջինը որպես պետական կրոն ընդունած երկրում, համակողմանի ուսումնասիրվում են իսլամադավան տարբեր ժողովուրդների լեզուներ, պատմություն, մշակույթ:

Հանդուրժողականությունը հայկական կրթական համակարգում լավագույնս դրսևորվում է Արևելագիտության ֆակուլտետում, և ուսումնական ծրագրերում ընդգրկված առարկաները հենց դրա առհավատչյան են:

Արևելագիտության ֆակուլտետի դեկանը նաև պատրաստակամություն է հայտնել համագործակցելու գործընկեր բուհերի և կառույցների հետ բակալավրիատի, մագիստրատուրայի, ասպիրանտուրայի կրթական աստիճաններում հանդուրժողականությանը միտված կրթական ծրագրերի համատեղ իրականացման հարցում:

Ելույթին հետևած հարցուպատասխանի ժամանակ Ռ. Մելքոնյանն անդրադարձել է նաև Թուրքիայում և Ադրբեջանում պետական մակարդակով ատելության դրսևորումներին՝ ուղղված հայերին, մշակութային եղեռնին և այդ ամենի դրսևորումներին թուրքական ու ադրբեջանական կրթական համակարգերում:

Համաժողովի ընթացքում նաև ստորագրվել է հուշագիր ԵՊՀ-ի ու Հանդուրժողականության և խաղաղության գլոբալ խորհրդի միջև: