Միջազգային բակալավրիատ

Երևանի պետական համալսարանը ներդնում է միջազգային կրթական նոր հարթակ՝ Միջազգային բակալավրիատի դիպլոմային ծրագիր (International Baccalaureate (IB) Diploma Programme), որը նախատեսված է 16–19 տարեկան սովորողների համար և միավորում է ակադեմիականությունը, քննադատական մտածողությունը, հետազոտական գործունեությունն ու անձի զարգացումը։ Ծրագիրը սովորողներին հնարավորություն է տալիս ձեռք բերելու առարկայական խոր գիտելիքներ և զարգացնելու ինքնուրույն հետազոտելու, տարբեր տեսակետներ համադրելու, գաղափարները հիմնավորելու և գիտելիքը իրական խնդիրների լուծման մեջ կիրառելու կարողություններ։ Այն խրախուսում է նաև հարցադրումների ձևակերպումն ու քննադատական մտածողությունը։

2025 թվականի նոյեմբերի 25-ին Երևանի պետական համալսարանը դարձավ Միջազգային բակալավրիատի դիպլոմային ծրագրի թեկնածու դպրոց (IB Candidate School)՝ սկիզբ դնելով միջազգային բակալավրիատի ծրագրի ներդրման և հետագա լիարժեք հավատարմագրման գործընթացին։ Այս քայլը կարևոր փուլ էր ԵՊՀ կրթական միջավայրի միջազգայնացման ճանապարհին՝ հնարավորություն ստեղծելով Հայաստանի աշակերտների համար միջազգային չափանիշներին համապատասխան կրթություն ստանալու և իրենց ակադեմիական ներուժը համաշխարհային կրթական միջավայրում զարգացնելու համար։

Միջազգային բակալավրիատի դիպլոմային ծրագիրը միջազգային ճանաչում ունեցող երկամյա կրթական ծրագիր է, որը համադրում է առարկայական լայնություն և ակադեմիական խորություն։ Ծրագրի հիմքում ընկած է այն գաղափարը, որ ժամանակակից կրթությունը պետք է զարգացնի ոչ միայն ակադեմիական արդյունքներ ապահովելու, այլև հարցեր ձևակերպելու, հետազոտելու, վերլուծելու, ստեղծելու և պատասխանատու որոշումներ կայացնելու կարողություններ։ Աշակերտները սովորում են առարկայական տարբեր ոլորտներում՝ միաժամանակ զարգացնելով միջառարկայական կապեր և կիրառելով իրենց գիտելիքները իրական աշխարհի խնդիրների լուծման ընթացքում։ Ծրագիրը հնարավորություն է տալիս խորությամբ ուսումնասիրելու բնական և ճշգրիտ գիտությունները, մաթեմատիկան, լեզուները, հասարակական գիտությունները, հումանիտար առարկաներն ու արվեստը՝ համապատասխան խորացված մակարդակի (Higher Level (HL)) և ստանդարտ մակարդակի (Standard Level (SL)) դասընթացների ընտրությամբ։

Միջազգային բակալավրիատի կրթության առանձնահատկություններից են ծրագրի երեք առանցքային բաղադրիչները․

• Գիտելիքի տեսություն (Theory of Knowledge (TOK))
  Աշակերտները ուսումնասիրում են գիտելիքի բնույթը՝ անդրադառնալով այն հարցին, թե ինչպես ենք գիտելիք ձեռք բերում, հիմնավորում և գնահատում։

• Ընդլայնված էսսե (Extended Essay (EE))
  Աշակերտը կատարում է ինքնուրույն ակադեմիական հետազոտություն և ձևակերպում սեփական հետազոտական հարցը՝ զարգացնելով գիտական աշխատանքի և ակադեմիական գրելու հմտությունները։

• Ստեղծարարություն, գործունեություն, ծառայություն (Creativity, Activity, Service (CAS))
  Աշակերտները ներգրավվում են ստեղծագործական, ֆիզիկական և համայնքային գործունեության մեջ՝ իրենց գաղափարները վերածելով գործնական նախաձեռնությունների և նպաստելով համայնքի զարգացմանը։

Միջազգային բակալավրիատի դիպլոմային ծրագիրը միավորում է հայաստանյան ակադեմիական և մշակութային միջավայրը միջազգային կրթական մտածողության հետ։ 

Մենք կարևորում ենք ազգային և մշակութային ինքնության պահպանումը՝ միաժամանակ խրախուսելով բաց մտածողությունը, տարբեր մշակույթների և տեսակետների նկատմամբ հետաքրքրությունն ու փոխըմբռնումը։ 

Մեր նպատակն է ձևավորել սովորողների, որոնք վստահորեն գործում են տեղական միջավայրում և պատրաստ են մտածելու ու համագործակցելու գլոբալ համատեքստում։ Ծրագիրը զարգացնում է հետազոտելու, հաղորդակցվելու, համագործակցելու, քննադատաբար մտածելու, ինքնուրույն սովորելու և սեփական ուսումնառությունը գիտակցաբար կառավարելու կարողությունները։

Ձեր միջազգային կրթական ճանապարհի սկիզբն այստեղ է․․․