2023-2024 ուսումնական տարվանից Երևանի պետական համալսարանին կից գործելու է ԵՊՀ ՍԹԵՄ ավագ դպրոցը։
Դպրոցի նպատակն է խթանել Հայաստանում մրցունակ, արդիական և համընդգրկուն կրթության զարգացումը։ ԵՊՀ ՍԹԵՄ դպրոցը ձգտում է ստեղծել 21-րդ դարի հրամայականներին համահունչ կրթական միջավայր:
Ավագ դպրոցը բնագիտամաթեմատիկական ուղղվածությամբ է։ ԵՊՀ պրոֆեսորադասախոսական կազմը բնագիտամաթեմատիկական առարկաների համար մշակել է «ԵՊՀ դպրոցների ցանց» կրթական հեղինակային ծրագիրը, որը ԿԳՄՍ նախարարի՝ 2023 թ․ փետրվարի 22-ի N 287 Ա/2 հրամանով երաշխավորվել է գործածության, իսկ հումանիտար պարտադիր բոլոր առարկաները դասավանդվում են պետական առարկայական օրինակելի ծրագրերին համապատասխան։ Ուսուցման հիմնական լեզուն հայերենն է։
Աշակերտների ընդունելության համար գործում է միասնական կարգ։ Դպրոցում ուսումնական շաբաթը վեցօրյա է, յուրաքանչյուր օր՝ 6-8 ակադեմիական ժամ ծանրաբեռնվածությամբ (ակադեմիական մեկ ժամը սահմանված է 45 րոպե)։
ԵՊՀ ենթակառուցվածքները և նյութատեխնիկական հագեցվածությունը (լաբորատորիաներ, մարզասրահներ, գրադարան) հասանելի են ԵՊՀ ՍԹԵՄ դպրոցի աշակերտներին։ Նրանք հնարավորություն ունեն ծանոթանալու և մասնակցելու ԵՊՀ դասախոսների և ուսանողների կատարած հետազոտություններին, ինչպես նաև իրականացնելու տարաբնույթ նախագծեր և գիտափորձեր ԵՊՀ գիտնականների վերահսկողությամբ։
ԵՊՀ ՍԹԵՄ դպրոցի աշակերտը ուսումնառության ավարտին ստանում է՝
1. պետական նմուշի ավարտական վկայական (ատեստատ)՝ պետական իրավական կարգի համապատասխան,
2. «ԵՊՀ դպրոցների ցանց» կրթական ծրագրի ավարտական վկայական (դիպլոմ)։
Ընդունելությունը կատարվում է երկու փուլով։ Առաջին փուլում դիմորդները հանձնում են մեկ պարտադիր քննություն՝ մաթեմատիկա, ֆիզիկա, քիմիա կամ կենսաբանություն առարկաներից, երկրորդ փուլում ընդհանուր գիտելիքների ստուգման նպատակով կազմակերպվում է հարցազրույց։
2023-2024 ուսումնական տարվա ընդունելության գործընթացը կազմակերպվելու է հետևյալ ժամանակացույցով՝
• էլեկտրոնային հայտադիմումի ընդունում՝ մարտի 22-ապրիլի 12 (պահանջվող փաստաթղթերի և հավելյալ մանրամասների մասին կտեղեկացվի դիմումը լրացնելիս),
• ընդունելության քննություն՝ ապրիլի 22,
• նախնական արդյունքների հրապարակում՝ ապրիլի 27,
• բողոքարկում՝ ապրիլի 27-ապրիլի 29,
• արդյունքների հրապարակում՝ մայիսի 5,
• հարցազրույց՝ մայիսի 10-մայիսի 13,
• ընդունելության վերջնական արդյունքների հրապարակում՝ մայիսի 25։
Ընդունելության քննությունների հարցաթերթիկները կազմվում են հետևյալ սկզբունքներով․
- 10-րդ դասարանի համար՝ համապատասխան առարկայի՝ հանրակրթական դպրոցների 8-րդ դասարանի և 9-րդ դասարանի առաջին կիսամյակի ծրագրի հիման վրա,
- 11-րդ դասարանի համար՝ համապատասխան առարկայի՝ հանրակրթական դպրոցների 9-րդ դասարանի և 10-րդ դասարանի առաջին կիսամյակի ծրագրի հիման վրա։
Ընթացիկ նորություններին ծանոթանալու համար հետևե՛ք ԵՊՀ պաշտոնական կայքէջին և ֆեյսբուքյան էջին։
Ընդունելության վերաբերյալ մանրամասները՝ այստեղ:
