«Կլիմայի փոփոխություն, արդարություն և մարդու իրավունքներ» միջազգային գիտաժողովի մասնակցության հրավեր

ԵՊՀ եվրոպական ուսումնասիրությունների կենտրոնը հրավիրում է մասնակցելու «Կլիմայի փոփոխություն, արդարություն և մարդու իրավունքներ» խորագրով միջազգային գիտաժողովին։ Գիտաժողովը կկայանա ս.թ ապրիլի 15–17-ը Երևանում։ Այն, մեկ հարթակում համախմբելով ակադեմիական շրջանակների, միջազգային կազմակերպությունների ու քաղաքացիական հասարակության ներկայացուցիչներին՝ նպատակ ունի համալիր մոտեցմամբ քննարկելու կլիմայի փոփոխության, արդարության, մարդու իրավունքների և անվտանգության փոխկապակցվածության հիմնահարցերը։

Գիտաժողովի հենքային գաղափարը կլիմայական արդարությունն է, որի շրջանակում կքննարկվի կլիմայի փոփոխության փոխազդեցությունը մարդու իրավունքների, կառավարման, հաշվետվողականության և անվտանգության վրա: Առանձնահատուկ ուշադրություն կդարձվի մարգինալացված խմբերի, երեխաների և ապագա սերունդների վրա կլիմայի բացասական հետևանքների անհամաչափ ազդեցության հիմնահարցերին, և այն հանգամանքին, թե արդարության վրա հիմնված մոտեցումները ինչպես կարող են ուղղել այս կառուցվածքային անհավասարակշռությունները։

Գիտաժողովը կազմակերպում է Երևանի պետական համալսարանի եվրոպական ուսումնասիրությունների կենտրոնը («Գլոբալ կամպուս Կովկասի»)՝ «Գլոբալ կամպուս Կենտրոնական Ասիայի» և Ժան Մոնեի «Ժողովրդավարություն, մարդու իրավունքներ և անվտանգություն» եվրոպական հետազոտությունների գերազանցության կենտրոնի (DeHuRiS, ԵՈւԿ) հետ համագործակցությամբ «Right Livelihood» հիմնադրամի «Կլիմա և հակամարտություններ. հատուցում և կանխարգելում» ծրագրի շրջանակում։

Գիտաժողովի թեմատիկ ուղղությունները

Գիտաժողովի մասնակցության թեմաները (ամփոփագրերը) կարող են վերաբերել տեսական, էմպիրիկ, համեմատական կամ քաղաքականությանն ուղղված հետազոտություններին՝ ներառյալ (սակայն չսահմանափակվելով) հետևյալ թեմաները.

1. Կլիմայի փոփոխություն, շրջակա միջավայրի աստիճանական վատթարացում (դեգրադացիա) և մարդու իրավունքներ

2. Կլիմայական արդարություն, հաշվետվողականություն և կառավարում

3. Կլիմայի փոփոխություն, անվտանգություն և հակամարտությունների կանխարգելում

4. Տարածաշրջանային և միջազգային գործողությունները կլիմայի ոլորտում

5. Միջսերնդային արդարություն և ապագային միտված կառավարում

Գիտաժողովի աշխատանքային լեզուներն են հայերենը և անգլերենը՝ համաժամանակյա թարգմանությամբ։

Ամփոփագրի (աբստրակտ) ներկայացման պահանջներ

• Ծավալ՝ 250–300 բառ

• Բանալի բառեր՝ 4–6

• Լեզու՝ անգլերեն

• Ձևաչափ՝ MS Word կամ PDF

• Բովանդակություն՝ ամփոփագրում պետք է հստակ ձևակերպվեն հետազոտության հարցը, կիրառվող մեթոդաբանությունը և հիմնական փաստարկ(ներ)ը կամ արդյունք(ներ)ը

Ժամկետներ

• Ամփոփագրերի ներկայացման վերջնաժամկետ՝ ս.թ. փետրվարի 20

• Մասնակցության մասին ծանուցում՝ ս.թ. մարտի 10

• Գիտաժողովի անցկացում՝ ս.թ. ապրիլի 15–17

Հրապարակման հնարավորություն

Գիտաժողովից հետո ընտրված հեղինակներին կառաջարկվի ներկայացնել ամբողջական հոդվածներ՝ «Journal of Political Science: Bulletin of Yerevan University» ամսագրի հատուկ համարում հրապարակվելու համար։

• Ամբողջական հոդվածների ներկայացման վերջնաժամկետ՝ ս.թ. 15 հունիս

• Հրապարակում՝ ս.թ.սեպտեմբեր–հոկտեմբեր

Ներկայացված բոլոր հոդվածները գրախոսվելու են։