Ս․թ. հոկտեմբերի 5–9 ԵՊՀ ինֆորմատիկայի և կիրառական մաթեմատիկայի ֆակուլտետի, Հայկական մաթեմատիկական միության և «YSU-Krisp AI» լաբորատորիայի նախաձեռնությամբ կանցկացվի «Կիրառական մաթեմատիկա, համակարգչային գիտություն և արհեստական բանականություն-2026» խորագրով միջազգային գիտաժողով։

Գիտաժողովի նպատակն է համախմբել կիրառական մաթեմատիկայի, համակարգչային գիտության և արհեստական բանականության ոլորտներում աշխատող հետազոտողներին, ինչպես նաև ստեղծել հարթակ նոր արդյունքների ներկայացման, գաղափարների փոխանակման և գիտական համագործակցության հաստատման համար։

Հիմնական թեմաներ

Գիտաժողովի թեմաները ներառում են, բայց չեն սահմանափակվում հետևյալով՝

• Մեքենայական ուսուցման հիմունքներ, վիճակագրական ուսուցում և տվյալների վերլուծություն
• Խոր ուսուցում և լայնածավալ գեներատիվ մոդելներ
• ԱԲ-ն մաթեմատիկայում և գիտություններում, կիրառություններ ռոբոտատեխնիկայում և առողջապահությունում
• Հանրահաշիվ և մաթեմատիկական տրամաբանություն
• Դիսկրետ մաթեմատիկա և կոմբինատորիկա
• Ալգորիթմներ և հաշվարկային բարդություն
• Հաշվողական մաթեմատիկա
• Օպտիմիզայիայի մեթոդներ
• Մոտարկման տեսություն
• Մաթեմատիկական մոդելավորում և սիմուլյացիա
• Կիրառական վիճակագրություն
• Նմուշների ճանաչում և ազդանշանների մշակում
• Գիտական հաշվարկներ
• Ինֆորմացիայի տեսություն
• Կրիպտոգրաֆիա, անվտանգություն և գաղտնիություն

Գիտաժողովը կանցկացվի ԵՊՀ ինֆորմատիկայի և կիրառական մաթեմատիկայի ֆակուլտետում, մաթեմատիկայի և մեխանիկայի ֆակուլտետում և «YSU-Krisp AI» լաբորատորիայում։ 

Գիտաժողովի ծրագիրը բաղկացած կլինի 40-րոպեանոց հրավիրյալ զեկուցումներից և 20-րոպեանոց ներկայացվող զեկույցներից՝ ներառյալ հարց ու պատասխան։

Գիտաժողովի պաշտոնական լեզուն անգլերենն է։

Զեկուցումով հանդես գալու ցանկություն ունեցող բոլոր մասնակիցները պետք է  amscai@ysu.am էլեկտրոնային հասցեին ուղարկեն 1–2 էջ ծավալով թեզիս՝ LaTeX և PDF ձևաչափերով (միայն անգլերեն)։
Խնդրում ենք պատրաստել թեզիսը LaTeX ձևաչափով՝ օգտագործելով նշված ձևանմուշը։

Կարևոր ժամկետներ

• Թեզիսների ներկայացման վերջնաժամկետ՝ ս․թ․ 30 հունիսի
• Ընդունման մասին ծանուցում՝ ս․թ․ 30 հուլիսի
• Գրանցում և մասնակցության վճար՝ ժամանման օրը

Մասնակցության վճար

Գիտաժողովի մասնակցության վճարը կազմում է 100 եվրո ընդհանուր մասնակիցների համար, 50 եվրո՝ հետդոկտորական հետազոտողների և ասպիրանտների համար, և վճարվում է գրանցման օրը։ Առցանց միացող մասնակիցների և ուսանողների համար մասնակցությունն անվճար է։

Կեցություն

Երևանի պետական համալսարանը գտնվում է Երևանի կենտրոնում։ Վայրը շրջապատված է բազմաթիվ կացարաններով (Erebuni Hotel Yerevan, Central Hotel Yerevan, ibis Yerevan Center, 14 Floor Hotel, Nova Hotel և Երևանի պետական համալսարանի հյուրատուն)։

Վիզայի մասին տեղեկություն

Եվրոպական երկրների, ԱՄՆ-ի և նախկին Խորհրդային միության երկրների մեծ մասի քաղաքացիների համար վիզա չի պահանջվում։ Մանրամասների համար այցելել համապատասխան կայքէջ։

Տրանսպորտ՝ օդանավակայանից Երևան

Օդանավակայանից քաղաքի կենտրոն հասնելու ամենահարմար տարբերակներն են №100 ավտոբուսը (արժեքը՝ մոտ 1 եվրո) և տաքսին (արժեքը՝ մոտ 10 եվրո)։

Կապ

Հարցերի դեպքում դիմել կազմակերպիչներին հետևյալ էլհասցեով՝ amscai@ysu.am։