1. ԸՆԴՀԱՆՈՒՐ ԴՐՈՒՅԹՆԵՐ

1. Սույն աշխատակարգը սահմանում է «Երևանի պետական համալսարան» հիմնադրամի (այսուհետ՝ ԵՊՀ) գիտակազմակերպչական խորհրդի (այսուհետ՝ խորհուրդ) իրավասությունը, գործունեության կարգն ու պայմանները:

2. Խորհուրդը ռեկտորին կից խորհրդակցական մարմին է, որն իր գործունեությունն իրականացնում է ԵՊՀ կանոնադրությանը, ԵՊՀ ներքին իրավական ակտերին և սույն աշխատակարգին համապատասխան:

3. Սույն աշխատակարգում մեջ փոփոխություններն ու լրացումները կատարվում են ԵՊՀ կանոնադրությամբ և ներքին իրավական ակտերով սահմանված կարգով:

2. ԽՈՐՀՐԴԻ ԳՈՐԾԱՌՈՒՅԹՆԵՐԸ

4. Խորհրդի գործառույթներն են`

1) ԵՊՀ զարգացման ռազմավարական ծրագրում նախանշված գիտական խնդիրների իրականացման գործընթացի մշտադիտարկումն ու արդյունավետության գնահատման վերաբերյալ եզրակացությունների տրամադրումը. 

2) ԵՊՀ-ում գիտական գործընթացը կանոնակարգող ներքին իրավական ակտերի նախագծերի մշակումը.

3) գիտական աշխատանքների կատարմանը, գիտաժողովների կազմակերպմանն ու ֆինանսավորմանը, գիտական գործուղումների նպատակով դրամաշնորհների տրամա­դրմա­նը, գիտատեխնիկական սարքերի ձեռքբերմանն առնչվող հարցերի քննարկումն ու դրանց վերաբերյալ եզրակացությունների տրամադրումը.

4) գիտական կառույցներում գիտական կադրերի ընտրության, ատեստավորման գոր­ծընթացի վերաբերյալ առաջարկությունների ներկայացումը,

5) գիտական բարեխղճության, ակադեմիական ազնվության սկզբունքների ապահովմանն ուղղված ԵՊՀ քաղաքականությունների ու ընթացակարգերի նախագծերի մշակումը:

3.ԽՈՐՀՐԴԻ ԿԱՌՈՒՑՎԱԾՔՆ ՈՒ ԱՇԽԱՏԱԿԱՐԳԸ

5. Խորհրդի կազմում ընգրկվում են ԵՊՀ գիտական հարցերի գծով պրոռեկտորը, որն ի պաշտոնե խորհրդի նախագահն է, ակադեմիական/ուսումնական հարցերի գծով պրոռեկտորն ու գիտական տարբեր ոլորտների ներկայացուցիչներ: 

6. Խորհրդի անվանական կազմը գիտական հարցերի գծով պրոռեկտորի ներկայացմամբ հաստատում է ռեկտորը երեք տարի ժամկետով: 

7. Խորհուրդը հարցերը քննարկում է ԵՊՀ զարգացման ռազմավարական ծրագրին համապատասխան ու ԵՊՀ գիտական հարցերի գծով պրոռեկտորի առաջարկով: Խորհուրդը հարցերի քննարկման արդյունքում խորհրդատվական բնույթի առաջարկներ ու եզրա­կացություններ է ներկայացնում ռեկտորին կամ ԵՊՀ գիտական խորհրդին:

8. Խորհուրդը հարցերը քննարկում է նիստերում, որոնք անցկացվում են խորհրդի աշխատանքային ծրագրով նախատեսված ժամանակացույցով կամ ըստ անհրաժեշտության: Անհետաձգելի հարցերի դեպքում նախագահը կարող է հրավիրել արտահերթ նիստ։

9. Խորհրդի նիստերն իրավազոր են խորհրդի անդամների երկու երրորդի ներկա­յության դեպքում: Խորհրդի նիստերն արձանագրվում են, արձանագրությունը ստորագրում են նախագահն ու քարտուղարը:

10. Խորհրդի կողմից կազմված փաստաթղթերն ու խորհրդատվական բնույթի եզրակացությունները հաստատվում են բաց քվեարկությամբ ու նիստին ներկա անդամների ձայների պարզ մեծամասնությամբ: Ձայների հավասարության դեպքում խորհրդի նախագահն ունի վճռորոշ ձայնի իրավունք:

11.Խորհրդի կազմում գործում է գիտահետազոտական աշխատանքների էթիկայի փորձաքննության հանձնախումբը, որի աշխատակարգը հաստատում է ԵՊՀ գիտա­կազմակերպչական խորհուրդը:

12. Հանձնախմբի անվանական կազմը խորհրդի առաջարկով հաստատում է ռեկտորը։