Երազանքին մոտեցնող ևս մեկ քայլ․ Թաբիբյան կրթաթոշակի նոր շահառուները՝ ԵՊՀ-ում

Կրթաթոշակային ծրագրին դիմած բազմաթիվ ուսանողներից մրցույթի արդյունքում ընտրվել են լավագույնները՝ հաշվի առնելով ծրագրով սահմանված չափանիշները։

Հանդիպմանը «Վարդանանց ասպետներ» կազմակերպությունը ներկայացնում էին ավագ սպարապետ Ռոբերտ Ավագյանը, նախկին ավագ սպարապետներ Հունան Արշակյանը և Սթիվ Կրադջյանը, ինչպես նաև ավագ դիրուհի Լիլի Սարկիսյանը։

Կրթաթոշակի արժանացած ուսանողները պատմեցին իրենց մասնագիտական երազանքների, ապագայի ծրագրերի և այն ճանապարհի մասին, որն անցնում են դրանց իրականացման համար՝ երախտագիտություն հայտնելով կրթաթոշակային ծրագրի հեղինակներին և աջակիցներին։

Ուսանողների խոսքով՝ նրանց համար կրթաթոշակը ոչ միայն ֆինանսական աջակցություն է, այլև վստահության և պատասխանատվության դրսևորում՝ շարունակելու կրթությունը, զարգացնելու մասնագիտական կարողություններն ու ավելի մոտենալու իրենց երազանքներին։

Մեկ տասնյակից ավելի դիմորդներ․ լավագույնները՝ կրթաթոշակակիր

2026-2027 ուսումնական տարվա Թաբիբյան կրթաթոշակի համար դիմել էր ԵՊՀ 12 ուսանող։ Մրցութային ընտրության արդյունքում կրթաթոշակի է արժանացել վեց ուսանող։

Թեկնածուների ընտրության գործընթացում հաշվի են առնվել նրանց ակադեմիական առաջադիմությունը, ֆինանսական աջակցության անհրաժեշտությունը և Հայաստանում հետագայում ապրելու և աշխատելու մտադրությունը։

Այս չափանիշներն ընդգծում են ծրագրի հիմնական գաղափարը՝ աջակցել բարձր առաջադիմություն և մասնագիտական աճի ձգտումներ ունեցող ուսանողներին, որոնք իրենց ապագան տեսնում են Հայաստանում և պատրաստ են իրենց գիտելիքն ու ներուժը ներդնելու երկրի զարգացման գործում։

Կրթաթոշակը տրամադրվում է մեկ ուսումնական տարվա ուսման վարձի չափով։ Ծրագիրը նախատեսված է այն ուսանողների համար, որոնք սովորում են ՏՏ, բնագիտական, տեխնոլոգիական և ճարտարագիտական (STEM) ուղղություններով։ Այն իրականացնում է «Վարդանանց ասպետներ» կազմակերպությունը։

Գիտելիքից դեպի մեծ երազանք

Ինֆորմատիկայի և կիրառական մաթեմատիկայի ֆակուլտետի ուսանողներ Դիանա Հարությունյանի և Սուսաննա Պետրոսյանի համար Հայաստանում ՏՏ ոլորտի խոշոր կենտրոն ստեղծելու երազանքը մասնագիտական հաջողությունից ավելին է։ Այն սեփական գիտելիքն ու փորձը Հայաստանում կիրառելու, նոր հնարավորություններ ստեղծելու և ոլորտի զարգացմանը նպաստելու ցանկություն է։

Այդ ճանապարհին կարևոր դեր ունի համալսարանական կրթությունը։ Նրանք փաստում են, որ ԵՊՀ-ում ուսանողները հնարավորություն ունեն ոչ միայն խորացնելու իրենց մասնագիտական գիտելիքները, այլև մասնակցելու հետազոտական ու կրթական ծրագրերի, ձեռք բերելու նոր հմտություններ, համագործակցելու տարբեր ոլորտների մասնագետների հետ և ձևավորելու մասնագիտական կապեր։

Հենց այս հնարավորություններն են համալսարանական տարիները դարձնում երիտասարդների երազանքներին հասնելու ճանապարհի կարևոր փուլերից մեկը։

«Կարևոր է, որ ուսանողները զգան՝ նրանք մենակ չեն»․ Հունան Արշակյան

«Վարդանանց ասպետներ» կազմակերպության նախկին ավագ սպարապետ Հունան Արշակյանի խոսքով՝ ծրագրի նշանակությունը միայն ուսանողներին ֆինանսապես աջակցելը չէ։ Առավել կարևոր է, որ երիտասարդները զգան՝ նրանց կողքին են կազմակերպությունն ու Սփյուռքի ներկայացուցիչները։

«Շատ կարևոր է, որ նմանօրինակ ծրագրերը օգնում են ուսանողներին ֆինանսապես, բայց ավելի կարևոր է, որ ուսանողները հասկանան՝ նրանք մենակ չեն, որ Սփյուռքը նրանց հետ է»,- նշեց Հունան Արշակյանը։

Նրա խոսքով՝ «Վարդանանց ասպետներ»-ը միշտ եղել է կրթության կողքին և շարունակելու է աշխատանքը Հայաստանի ուսանողների հետ՝ ստեղծելով նաև կրթաթոշակից դուրս լրացուցիչ հնարավորություններ։

Կազմակերպությունը նախատեսում է զարգացնել ուսանողների հետ համագործակցության նոր ձևաչափեր, այդ թվում՝ մենթորական ծրագրեր։ Հետագայում նախատեսվում է նաև քննարկել պրակտիկայի հնարավորությունների ստեղծումը, որ ուսանողները կարողանան կապ հաստատել ոլորտում աշխատող մասնագետների հետ, ստանալ մասնագիտական ուղղորդում և իրենց գիտելիքը կիրառել գործնական միջավայրում։

«Մենք հիմա ուզում ենք ստեղծել մենթորական ծրագրեր»,- ասաց Հունան Արշակյանը՝ ընդգծելով, որ նպատակն է ուսանողների հետ աշխատանքը շարունակել նաև կրթաթոշակի տրամադրումից հետո։

Կրթությանն աջակցելու գաղափարը՝ ՏՏ ոլորտի զարգացման համատեքստում

Հունան Արշակյանի խոսքով՝ Թաբիբյան ծրագրի գաղափարը կապված է նաև Հայաստանում ՏՏ ոլորտի արագ զարգացման հետ։

Կրթաթոշակի ֆինանսավորումն իրականացվում է դոկտոր Նշան Թաբիբյանի նվիրատվության շնորհիվ։ Հունան Արշակյանի փոխանցմամբ՝ Թաբիբյանի ցանկությունն էր, որ իր ներդրումը հնարավորություն տա աջակցելու ուսանողների մասնագիտական զարգացմանը հատկապես այնպիսի ոլորտում, որն այսօր արագ զարգանում է Հայաստանում։

«Նա ուզում էր, որ Հայաստանի ուսանողների մասնագիտական զարգացմանն ավելի շատ օգնենք։ Հայաստանը հիմա ՏՏ ոլորտում շատ ակտիվ զարգանում է, և որոշեցինք, որ այդ ոլորտում մենք ուսանողների հետ աշխատենք՝ նպաստելով նրանց մասնագիտական աճին»,- հավելեց նա։

Արձագանքելով ժամանակի փոփոխություններին

Հանդիպման ընթացքում ԵՊՀ միջազգային համագործակցության վարչության պետ Ալեքսանդր Մարգարովը ներկայացրեց համալսարանի կրթական և գիտական միջավայրը՝ անդրադառնալով միջազգային համագործակցությանը, հետազոտություններին, ուսանողների և դասախոսների շարժունությանը։

Նա ընդգծեց, որ համալսարանը արագ արձագանքում է գիտության և տեխնոլոգիաների զարգացումներին՝ ապահովելով անհրաժեշտ պայմաններ արդյունավետ կրթության համար։ Այդ գործընթացը ներառում է ոչ միայն ուսումնական ծրագրերի և դասընթացների բովանդակության փոփոխություն, այլև նոր կրթական ծրագրերի ներդրում։

Ալեքսանդր Մարգարովն անդրադարձավ նաև ԵՊՀ-ում արհեստական բանականության զարգացմանը, ԱԲ ոլորտի ենթակառուցվածքների գործունեությանը և համալսարանական գերհամակարգչին՝ ներկայացնելով գիտության և տեխնոլոգիաների ոլորտներում համալսարանի հնարավորությունները։

Միջազգային համագործակցությունն ու շարժունությունը ևս կարևոր բաղադրիչ են այս գործընթացում։ ԵՊՀ-ն համագործակցում է արտասահմանյան բազմաթիվ համալսարանների հետ՝ ուսանողներին և դասախոսներին հնարավորություն տալով մասնակցելու փոխանակման ծրագրերի, միջազգային համաժողովների և մասնագիտական այլ նախաձեռնությունների։

Նա, կարևորելով Թաբիբյան ընտանիքի կրթաթոշակային նախաձեռնությունը, փաստեց, որ ստեղծված միջավայրում կրթաթոշակային ծրագրերը լրացուցիչ հնարավորություն են ուսանողների համար՝ կենտրոնանալու կրթության և մասնագիտական զարգացման վրա և իրենց ներուժն օգտագործելու ավելի մեծ երազանքների իրականացման ճանապարհին։

Հավաստագիրը՝ որպես ճանապարհի հերթական հանգրվան

Կրթաթոշակի հավաստագրերի հանձնման արարողությունը ուսանողների համար ոչ միայն ձեռքբերումը նշանավորելու, այլև իրենց ապագայի մասին խոսելու հնարավորություն էր։

Նրանք ներկայացրին իրենց մասնագիտական երազանքներն ու ծրագրերը, ընդգծեցին «Վարդանանց ասպետներ» կազմակերպության և Թաբիբյան ծրագրի աջակիցների նշանակալի դերը՝ փաստելով, որ նման աջակցությունը կարևոր է իրենց կրթությունը շարունակելու և առաջ շարժվելու համար։

Կրթաթոշակի արժանացած ուսանողների պատմությունները տարբեր են, սակայն նրանց միավորում է մի կարևոր գաղափար՝ համալսարանական տարիները ոչ միայն մասնագիտություն ձեռք բերելու, այլև սեփական ապագան և երկրի ապագան ձևավորելու ժամանակ են, որտեղ նրանք ցանկանում են ապրել, ստեղծագործել և ներդնել իրենց գիտելիքը։