Պատմության ֆակուլտետում տեղի ունեցավ «Մխիթար Սեբաստացի» կրթահամալիրի հետազոտական վարժարանի աշակերտների նախագծային աշխատանքների հանրային ներկայացումը։ Միջոցառումը կազմակերպվել էր Պատմության ֆակուլտետի և կրթահամալիրի համագործակցության շրջանակում՝ նպատակ ունենալով խթանելու գիտության և կրթության զարգացման ուղղությամբ կատարվող քայլերը։
Ընթացիկ տարվա մայիսի 7-ին աշակերտները ներկայացրին իրենց աշխատանքները՝ «Քրիստոնեությունը և պատերազմները» և «Պատմության շարժիչ ուժը․ հեղափոխություն և էվոլյուցիա» թեմաներով:
«Քրիստոնեությունը և պատերազմները» հետազոտական աշխատանքով ներկայացվեց քրիստոնեության ազդեցությունը եվրոպական պատմության ընթացքում տեղի ունեցած կրոնական պատերազմների վրա։ Աշակերտը փորձել էր հասկանալ՝ արդյո՞ք կրոնը ծառայել է որպես պատերազմի անմիջական պատճառ, թե՞ իբրև գործիք է օգտագործվել աշխարհաքաղաքական շահերի առաջմղման նպատակով։ Վերլուծությամբ համադրվել էին պատմական իրադարձությունների ուսումնասիրությունն ու կրոնական դոգմաների ազդեցության գնահատումը:
«Պատմության շարժիչ ուժերը՝ հեղափոխություն և էվոլյուցիա» թեմայով աշխատանքում աշակերտը վերլուծել էր պատմական փոփոխությունների ընթացքն ու բնույթը՝ կատարելով հեղափոխության և էվոլյուցիայի դերերի համադրական քննություն։ Աշակերտն իր մոտեցմամբ փորձել էր հասկանալ և ցույց տալ այս երկու երևույթների ազդեցությունը հասարակությունների վերափոխման վրա՝ կիրառելով պատմահամեմատական և վերլուծական մեթոդները։
Հատկանշական է, որ նախագծային աշխատանքները գրախոսվել են ԵՊՀ պատմության ֆակուլտետի ՈՒԳԸ անդամների կողմից, ինչը հետագա կարևոր ուղենիշ է նրանց հետազոտական աշխատանքների համար։
Նախաձեռնությունը համատեղում է միջնակարգ և բարձրագույն կրթության համակարգերի ուժերը՝ նպաստելով գիտելիքների փոխանակմանը և ուսանողների գիտական գործունեության խրախուսմանը։
