ԵՊՀ-ն հանդիսավորությամբ ճանապարհեց 2024-2025 ուստարվա իր շրջանավարտներին

ԵՊՀ շրջանավարտների միջոցառումը կազմված  էր համալսարանի ռեկտորի, բանախոսների ու ուսանողների տպավորիչ ելույթներից և տոնական համերգային ծրագրից:

Շրջանավարտների ավարտական միջոցառման սկիզբն ազդարարվեց Հայաստանի Հանրապետության և Երևանի պետական համալսարանի օրհներգերով՝ ԵՊՀ Շառլ Ազնավուրի անվան մշակույթի կենտրոնի երգչախմբի սաների կատարմամբ:

ԵՊՀ ռեկտոր Հովհաննես Հովհաննիսյանը, ողջունելով և շնորհավորելով շրջանավարտներին, ընդգծեց, որ համալսարանական տարիներն օգնում են երիտասարդներին բացահայտելու ոչ միայն աշխարհը, այլև իրենց կարողություններն ու ունակությունները, որն էլ հենց կրթության մեծագույն հաղթանակն է. «Դուք այստեղ եկաք որպես երիտասարդներ՝ լի հարցերով, որոնումներով։ Այսօր հեռանում եք որպես մասնագետներ, որոնք արդեն ունեն պատասխաններ, բայց նաև նոր ու ավելի բարդ հարցեր։ Եվ անկախ նրանից, թե ուր կտանի ձեզ կյանքը՝ այդ նոր հարցադրումների պատասխանները գտնելու համար, թող ձեր ներսում միշտ ապրի այն ուսանողը, որն առաջին անգամ եկավ այս համալսարան։ Այսօր մեր հանրության, մեր երկրի ու ամբողջ աշխարհի համար առավել քան երբևէ կարևոր են երիտասարդ մարդիկ, որոնք ունեն մտածելու ազատություն և գործելու պատասխանատվություն։ Դուք՝ ԵՊՀ շրջանավարտներդ, հենց այդ մարդիկ եք»:

Ռեկտորը կոչ արեց երիտասարդներին երբեք չվախենալ փոփոխություններից, չխուսափել սխալվելուց. «Հիշե՛ք՝ դուք հիմա ունեք այն, ինչ ամենակարևորն է՝ հավատ ձեր հնարավորությունների նկատմամբ։ Իսկ հիմնասյունը՝ Երևանի պետական համալսարանը, որի շնորհիվ կարող եք կառուցել ամեն բան, մեկընդմիշտ ձերն է»։

Ավարտական միջոցառման այս տարվա հիմնական բանախոսը ԿԲ նախագահ Մարտին Գալստյանն էր: Նա համոզմունք հայտնեց, որ բոլորին հուզող հարցն այն է, թե այսօրվա ծանրագույն իրադարձությունների կիզակետում ինչպես կառուցել ապագան. «Նման դժվարությունների ու անորոշության հիմքում է ծնվում մարդու լավագույն ոգեղեն կերտվածքներից մեկը՝ առաջնորդությունը: Առաջնորդությունը տեսլականի և իրականության միջև եղած անջրպետը կամրջելու ունակությունն է: Մարդկությունը կարողացել է հասնել լուսին, իջնել օվկիանոսի հատակը, բժշկել մահացու հիվանդություններ, բայց միևնույն ժամանակ մենք դեռևս ունակ չենք խաղաղ գոյակցելու, աղքատությունը վերացնելու  և բնությունը գալիք սերունդների համար պահպանելու»:

Այս համատեքստում Մարտին Գալստյանը նշեց, որ առաջնորդությունը անլուծելի թվացող խնդիրները լուծելու խիզախությունն ու կարողությունն է, և այսօր առավել քան երբևէ մենք ունենք առաջնորդության կարիք. «Առաջնորդել կարող են բոլորը՝ թե՛ երկրի ղեկավարները, թե՛ ուսուցիչը, թե՛ բանվորը: Առաջնորդությունը կարևոր է հատկապես այն իրավիճակներում, երբ մարդիկ բախվում են նոր մարտահրավերների և պետք է առաջարկեն նոր լուծումներ: Նոր մոտեցումներ գտնելը, որպես կանոն, ցավոտ է և դժվար, քանի որ այն պահանջում է կոտրել կարծրատիպեր: Առաջնորդությունը պահանջում է խիզախություն. դուք մարդկանց պետք է ասեք այն, ինչ կարևոր է, այլ ոչ թե այն, ինչ նրանք ուզում են լսել»- ասաց ԿԲ նախագահը՝ հավելելով, որ պետք է խախտել «Status quo»-ն՝ դուրս բերելով մարդկանց հարմարավետության գոտուց: 

Մարտին Գալստյանի մեկնաբանմամբ առաջնորդել նշանակում է լինել միայնակ ու չհասկացված, բայց արժե վճարել այդ գինը, քանի որ չկա ավելի մեծ բերկրանք, քան մարդկանց կյանքը դեպի լավը փոխելը։

«Տվյալների գիտությունը բիզնեսում» մագիստրոսական կրթական ծրագրի շրջանավարտ Սաթի Թադևոսյանն էլ իր ելույթում ընդգծեց, որ շրջանավարտները հավատում են՝ կրթությունը փոխում է մարդուն, իսկ մարդը՝ աշխարհը. «Գիտությունն ու կրթությունը միակ իրական ուղիներն են, որոնք թույլ են տալիս դիմակայելու աշխարհի արագ փոփոխվող ու երբեմն խրթին մարտահրավերներին։ Համալսարանը տվեց ոչ միայն մասնագիտական գիտելիքներ, այլև մտածելու ազատություն, պայքարի մշակույթ և ինքնուրույն որոշումներ կայացնելու պատրաստակամություն»:

Նա շնորհակալություն հայտնեց համալսարանի պրոֆեսորադասախոսկան կազմին՝ ձեռք բերած գիտելիքների, գիտական, ստեղծագործական դաշտում հասած հաջողությունների համար. «Մենք սովորեցինք արժեք ստեղծել՝ ոչ միայն մեզ համար, այլև ուրիշների։ Սովորեցինք հպարտանալ մեր փոքր հաղթանակներով ու գնահատել ձախողումներն անգամ՝ որպես աճի ուղի։ Ես հավատում եմ, որ մեր սերունդը չի մոռանա այն արժեքները, որոնց վրա հիմնված է ԵՊՀ-ն՝ գիտելիք, արդարություն, պայքար, միասնություն, և եթե համալսարանը մի օր եղել է տանիք, ապա այսօր այն մեր մեջ կրելիք պատասխանատվությունն է՝ հասարակության, պետության ու մեր շրջապատի հանդեպ»:

ԵՊՀ շրջանավարտներին շնորհավորեց նաև «Ինեկոբանկ»-ի ծրագրերի իրականացման տնօրեն Արման Պողոսյանը, որը ևս ԵՊՀ շրջանավարտ է: Նա իր ելույթում նշեց, որ «Ինեկոբանկը քո կողքին․ ապագան ավելի մեծ հնարավորություններով» կրթության աջակցության ծրագրի շրջանակում շարունակելու է լինել ԵՊՀ շրջանավարտների կողքին՝ մշտապես նպաստելով երիտասարդների մասնագիտական աճին, կարողությունների զարգացմանը և որակյալ կրթության հասանելիության ապահովմանը։ 

Այս տարվա ԵՊՀ շրջանավարտների ավարտական միջոցառումը նշանավորվեց նրանով, որ ԵՊՀ ՍԹԵՄ ավագ դպրոցը դեպի բուհ ուղի հարթեց իր առաջին շրջանավարտների համար ևս:

Հետայդու ԵՊՀ ռեկտոր Հովհաննես Հովհաննիսյանը, «Ինեկոբանկ»-ի ծրագրերի իրականացման տնօրեն Արման Պողոսյանը և ՍԹԵՄ ավագ դպրոցի տնօրեն Արամ Խաչատրյանը ՍԹԵՄ ավագ դպրոցի յոթ շրջանավարտներին հանձնեցին ավարտական վկայականներ ու նվերներ:

Ռեկտոր Հովհաննես Հովհաննիսյանը, առանձնահատուկ ջերմությամբ ողջունելով ԵՊՀ ՍԹԵՄ ավագ դպրոցի առաջին շրջանավարտներին, ընդգծեց, որ նրանք կերտում են նոր պատմություն՝ միավորելով դպրոցական կրթության լավագույն ավանդույթները համալսարանական արժեքների հետ. «Դուք առաջինն եք, բայց վստահ եմ՝ ձեր օրինակը կդառնա ուղենիշ շատերի համար։ Տարիներ անց հիշելով այս օրը՝ դուք հպարտությամբ կարող եք ասել. «Մենք էինք այն սերունդը, որ սկսեց ՍԹԵՄ ավագ դպրոցի ճանապարհը»»։

Միջոցառումն ամփոփվեց տոնական համերգով, որի ժամանակ կատարումներով հանդես եկան Արամ MP3-ին և «Nemra» խումբը՝ անմոռանալի և էլ ավելի տպավորիչ դարձնելով շրջանավարտների օրը:

Ընդգծենք, որ ավանդական դարձած այս միջոցառումը շրջանավարտների ու ԵՊՀ-ի միջև սերտ համագործակցության սկիզբն է: Հետագայում իրենց ոլորտում հաջողությունների հասած համալսարանականներն ակտիվ ներգրավվում են թե՛ համալսարանի կրթական ծրագրերի արդիականացման, թե՛ ուսանողների վերապատրաստման գործընթացներում: 

Այս համատեքստում հարկ է նշել, որ ընթացիկ տարում մեկնարկեց ԵՊՀ շրջանավարտների առաջին ֆորումը, որի ժամանակ համալսարանի տարբեր տարիների շրջանավարտները հնարավորություն ունեցան հարազատ կրթօջախում ներկայացնելու իրենց բազմամյա մասնագիտական փորձն ու ձեռքբերումները, ինչպես նաև քննարկեցին Հայաստանի տարբեր ոլորտներում առկա գիտական նորարարությունները, մարտահրավերներն ու մատնանշեցին զարգացող աշխարհին համահունչ շարժվելու ուղիները: 

ԵՊՀ շրջանավարտների ավարտական միջոցառման կայացմանն աջակցել են «Ինեկոբանկը», Զանգեզուրի պղնձամոլիբդենային կոմբինատը և «Արմենիա Ինշուրանս» ընկերությունը։