Նոր մեծ հնարավորություն ուսանողների համար. ԵՊՀ-ն և «Ինեկոբանկ» ՓԲԸ-ն կնքեցին համագործակցության հուշագիր

Կնքված հուշագրով սահմանվում են ծրագրի պայմաններն ու նպատակները, ինչպես նաև այն գործառույթները, որոնք կողմերը պարտավորվում են համատեղ իրականացնել։ Այս համագործակցությունն իր շուրջն է համախմբում բարձրագույն կրթության և ֆինանսաբանկային ոլորտների ջանքերը՝ ուղղված երիտասարդների մասնագիտական աճի, կարողությունների զարգացման և որակյալ կրթության հասանելիության ապահովմանը։

Երևանի պետական համալսարանն արդեն երրորդ տարին անընդմեջ միանում է «Ինեկոբանկը՝ քո կողքին. ապագան ավելի մեծ հնարավորություններով» նախաձեռնության շրջանակում իրականացվող կրթության աջակցության ծրագրին։ 2023 թվականին մեկնարկած ծրագրին նախորդ երկու տարիների ընթացքում դիմել են հարյուրավոր ԵՊՀ ուսանողներ, որոնցից շատերը հաղթող են ճանաչվել և օգտվել կրթության ֆինանսավորման հնարավորություններից։

2023-2024 թվականներին հազարից ավելի ուսանողներ մասնակցել են բանկում կազմակերպվող մրցութային փուլերին: Ընտրվել է 19 հաղթող, 13-ը ստացել են կրթության ֆինանսավորում, 6-ը մեկնել են Ֆրանսիա, Չեխիա, Նիդեռլանդներ և մասնակցել կարճաժամկետ ծրագրերի։ 12 մասնակից էլ աշխատանքի է ընդունվել «Ինեկոբանկում»:

2025-ին ծրագիրն առավել ընդգրկուն է դարձել: Իրականացվող «Ինեկո Կամպուս. ապագան կրթությամբ և գիտելիքով» ծրագրի շրջանակում մրցութային ընթացակարգով ընտրված ՀՀ տարբեր բուհերի ուսանողներ կստանան ֆինանսական աջակցություն.

• 150 ուսանողի՝ կրթաթոշակի տրամադրում (300․000 ՀՀ դրամ (յուրաքանչյուր ուսանողի))

• 15 ուսանողի՝ 1 ուսումնական տարվա վարձավճարի փոխհատուցում (մինչև 1․500․000 ՀՀ դրամ (յուրաքանչյուր ուսանողի))

• 20 հնարավորություն՝ արտերկրում  կարճաժամկետ ծրագրի մասնակցելու (2․000․000 ՀՀ դրամ (յուրաքանչյուր ուսանողի))

• 30 մասնագետի մագիստրոսական կրթության ֆինանսավորում

Այս տարի ծրագրի ընդհանուր բյուջեն ավելի քան 1 մլրդ ՀՀ դրամ է։ 

ԵՊՀ-ի և «Ինեկոբանկ» ՓԲԸ-ի համագործակցության հուշագիրն ամրապնդում է աշխատաշուկայի և կրթության միջև նոր կամուրջը, որը հնարավորություն կտա երիտասարդներին հասնելու իրենց նպատակներին՝ ապահովելով կրթության որակ և գործնական աջակցություն։ Կողմերը լիահույս են, որ այս համագործակցությունը խթանելու է նոր սերնդի մասնագիտական պատրաստվածությունը և հիմք է ծառայելու ապագա նոր համագործակցությունների կնքման համար։

ԵՊՀ զարգացման և նորարարությունների գծով պրոռեկտոր Միքայել Հովհաննիսյանը, կարևորելով նախաձեռնությունը, «Ինեկոբանկը՝ քո կողքին»-ի շրջանակում իրականացվող «Ինեկո Կամպուս» կրթական ծրագրի պաշտոնական մեկնարկն ազդարարող միջոցառմանը խոսեց բուհի դերակատարման մասին, մասնավորապես ընդգծեց կրթական ծրագրի առաջնահերթությունը որպես հարթակ, որը նպաստելու է երիտասարդների մասնագիտական զարգացմանը և համագործակցության նոր հնարավորությունների ստեղծմանը:

ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը մեզ հետ զրույցում նշեց՝ այս տարի ծրագիրը զգալիորեն ընդլայնվել է՝ ներառելուվ 14 բուհեր: Մինչդեռ նախկինում ծրագրում ընդգրկվում էին ավելի քիչ թվով բուհեր, որի հետևանքով ուսանողների մասնակցությունը ևս ավելի սակավ էր։

«Անցյալ տարի ԵՊՀ-ից ստացված 337 դիմումներից հաղթող են ճանաչվել երեքը։ «Ինեկոբանկը՝ քո կողքին» նախաձեռնության պաշտոնական մեկնարկին նվիրված միջոցառմանը հանդիպեցինք ԵՊՀ երեք հաղթող ուսանողների հետ: Չնայած ֆինանսաբանկային ոլորտի կրթություն չունենալուն՝ նրանցից երկուսն արդեն աշխատում են բանկում»,- ընդգծեց Կարինե Նազարյանը՝ հավելելով, որ ծրագիրը նոր և կարևոր հնարավորություն է ընձեռում երիտասարդներին կայանալու և նոր ճանապարհներ ուղենշելու համար։

«Ինեկոբանկ» ՓԲԸ-ն արդեն 3-րդ տարին անընդմեջ Հայաստանի տարբեր բուհերի ուսանողներին աջակցելու նպատակով իրականացնում է «Ինեկոբանկը՝ քո կողքին» ծրագիրը՝ այդպիսով նպաստելով ինչպես մասնագիտական կարողությունների զարգացմանը, այնպես էլ ստեղծելով կարիերայի նոր հնարավորություններ։