ԵՊՀ ՍԹԵՄ ավագ դպրոցի աշակերտները՝ Կիրառական կենսաբանության միջազգային օլիմպիադայի մեդալակիրներ

Ինդոնեզիայի Բալի քաղաքում ս․թ․ հունիսի 26-30-ն անցկացվել է Կիրառական կենսաբանության միջազգային 5-րդ օլիմպիադան (IABO), որի եզրափակիչ փուլ են անցել Հայաստանի 8 դպրոցների 21 աշակերտներ։ ԵՊՀ ՍԹԵՄ ավագ դպրոցի 4 աշակերտները՝ Նարեկ Ավետիսյանն ու Միլենա Հայրապետյանը, պարգևատրվել են արծաթե մեդալով, Ռուզաննա Առաքելյանն ու Հրանտ Խաչատրյանը` բրոնզե մեդալով։

Աշակերտները միջազգային օլիմպիադային մասնակցել են առցանց ձևաչափով՝ պայմանավորված աշխարհաքաղաքական հանգամանքներով։ Մրցույթին նրանք ցուցաբերել են բարձր պատրաստվածություն և պատասխանատվություն։ Օլիմպիադայի շրջանակում աշակերտները հաղթահարել են բարդ թեստեր, այնուհետև ստացել թեմա, որի շուրջ աշխատել են սահմանված ժամանակամիջոցում։ Նրանք մշակել են սահիկաշարեր (պրեզենտացիաներ) և ներկայացրել իրենց աշխատանքները անգլերենով՝ ի ցույց դնելով ոչ միայն մասնագիտական, այլև լեզվական հմտություններ։

ԵՊՀ ՍԹԵՄ ավագ դպրոցի տնօրեն Արամ Խաչատրյանը մեզ հետ զրույցում նշեց, որ դպրոցի աշակերտներն արդեն երկրորդ տարին անընդմեջ մասնակցում են այս հեղինակավոր օլիմպիադային և գրանցում բարձր արդյունքներ՝ արժանանալով մեդալների։

«Այս օլիմպիադան կարևոր է նրանով, որ ընդգրկված է ՀՀ Կառավարության կողմից սահմանված հատուկ օլիմպիադաների ցանկում, որոնցում մրցանակային տեղեր զբաղեցրած աշակերտները՝ ոսկե, արծաթե կամ բրոնզե մեդալակիրները, առանց միասնական քննությունների, պետպատվերի շրջանակում կարող են ընդունվել իրենց նախընտրած պետական բուհ, եթե տվյալ առարկան հայտագրել են որպես միասնական քննության մուտքային պահանջ»,- ասաց Արամ Խաչատրյանը։

Ըստ դպրոցի տնօրենի՝ աշակերտների գրանցած հաջողությունները պայմանավորված են դպրոցում ձևավորված օլիմպիական խմբակների նպատակային և հետևողական աշխատանքով։ Շաբաթական երկու անգամ անցկացվող երկարատև ու խորքային պարապմունքների արդյունքում աշակերտները ձեռք են բերում խոր գիտելիքներ և անհրաժեշտ հմտություններ՝ դառնալով մրցունակ միջազգային հարթակներում։

Մրցույթի մասնակից, 11-րդ դասարանի աշակերտ Ռուզաննա Առաքելյանը պատմեց, որ մինչ եզրափակիչ փուլին հասնելը իրենք երկար են պատրաստվել։

«Հարցերը, իհարկե, բարդ էին, բայց հաղթահարելի։ Խմբակներում մենք մանրամասն ուսումնասիրում էինք նյութերը, ուղղում հարցեր և ստանում սպառիչ պատասխաններ, կրկնում և սովորում տարաբնույթ թեմաներ։ Սա միջազգային մրցույթի (այն էլ՝ օտար լեզվով) մասնակցելու իմ առաջին փորձն էր, և այն մեծ փորձ ու մոտիվացիա տվեց ինձ ապագայի համար»,- նշեց նա։

Դպրոցի աշակերտ Միլենա Հայրապետյանի խոսքով՝ այս օլիմպիադան տարբերվում էր հարցերի տեսակով և բարդությամբ։

«Հարցերը պահանջում էին ոչ միայն բարձր մակարդակի գիտելիքներ, այլև լավ տրամաբանություն։ Նրանք ստիպում էին մտածել՝ ինչպես ճիշտ մոտենալ խնդրին և գտնել ամենաարդյունավետ լուծումը»,- նկատեց նա։ 

Միլենան մատնանշեց, որ այսօրինակ փորձը շատ օգտակար է, քանի որ օգնում է զարգացնելու ինչպես գիտելիքները, այնպես էլ մտածողության հմտությունները, որոնք անհրաժեշտ են միջազգային մրցույթներում հաջողության հասնելու համար։

Բժիշկ դառնալու հստակ նպատակ ունեցող Նարեկ Ավետիսյանը պատմեց անհանգստությունների և զգացողությունների մասին՝ նշելով, որ ինքն ու իր համադասարանցիները հեշտությամբ հաղթահարել են անհանգստությունը։

«Կենսաբանությունն ինձ համար առանձնահատուկ գիտություն է, հատկապես՝ մարդու անատոմիան։ Հետաքրքրությունն ինձ ուժ է տալիս առաջ շարժվելու ու հասնելու իմ երազանքին»,- հավելեց նա։

Խոսելով մրցույթի առավելության մասին՝ Հրանտ Խաչատրյանն ընդգծեց, որ այն, ինչ սովորել են օլիմպիական խմբակներում ու մրցույթների ընթացքում, նույնքան խորքային է ու ամբողջական։ 

«Այժմ կարող ենք ընդունվել ցանկացած բուհ՝ առանց կենսաբանություն պարապելու․ սա իսկապես մեծ առավելություն է»,- ասաց նա։

Նշենք, որ մասնակիցները նախօրոք առցանց ձևաչափով մասնակցել ու հաղթահարել են նախնական երկու փուլերը և հնարավորություն ստացել մասնակցելու եզրափակիչ փուլին: Եզրափակիչ փուլին մասնակցել է 8 երկրի (Հայաստան, Բանգլադեշ, Ինդոնեզիա, Պերու, Ֆիլիպիններ, Ռումինիա, Թաիլանդ, Վիետնամ) 98 աշակերտ։