ԵՊՀ-ում մեկնարկեց «QTS-13» միջազգային գիտաժողովը

«QTS-13» գիտաժողովն անցկացվում է յուրաքանչյուր երկու տարին մեկ անգամ աշխարհի տարբեր երկրներում՝ նպատակ ունենալով մեկ հարկի տակ համախմբելու քվանտային ֆիզիկայով և սիմետրիայի տեսությամբ զբաղվող տեսաբաններին։ 

Այս տարի Հայաստանը դարձավ գիտաժողովը հյուրընկալող երկիրը։ Միջազգային գիտաժողովը հենց Հայաստանում` ԵՊՀ֊ում անցկացնելուն ձեռնամուխ էր եղել ֆիզիկամաթեմատիկական գիտությունների դոկտոր, ԵՊՀ Ա. Սիսակյանի անվան հեռանկարային հետազոտությունների միջազգային կենտրոնի նախկին տնօրեն, երջանկահիշատակ Գեորգի Պողոսյանը։

Սույն գիտաժողովի նպատակն է արժևորել նրա գիտական ժառանգությունը՝ համախմբելով գործընկերներին, համահեղինակներին և հետազոտողներին, որոնք աշխատել են նրա հետ կամ ոգեշնչվել նրա աշխատանքից։

Գիտաժողովն ունի նեղ մասնագիտական ուղղվածություն։ Ներկայացվող թեմաներն ընդգրկում են երկրաչափական մեթոդները (դասական և ոչ կոմուտատիվ), խմբերի տեսությունը, Լիի և ոչ գծային հանրահաշիվները, ինչպես նաև դրանց կիրառությունը ժամանակակից քվանտային ֆիզիկայում։

ԵՊՀ զարգացման և նորարարությունների գծով պրոռեկտոր Միքայել Հովհաննիսյանը, ողջունելով գիտաժողովի մասնակիցներին, ընդգծեց Գեորգի Պողոսյանի ունեցած բացառիկ ներդրումը գիտական այս միջոցառման անցկացման գործում։

«Համալսարանի համար մեծ պատիվ է հյուրընկալել «Քվանտային տեսություն և սիմետրիա» միջազգային 13-րդ գիտաժողովը։ Սա սովորական միջոցառում չէ. այն իրագործվում է` ի հիշատակ մեր համալսարանի գիտնականներից մեկի՝ պրոֆեսոր Գեորգի Պողոսյանի։ 

Այս գիտաժողովը եզակի հարթակ է գիտական նոր համագործակցությունների, միջազգային գիտական ներուժի ներգրավման և հայ գիտնականների` միջազգային ասպարեզում տեսանելիության բարձրացման համար։ Եվ առավել կարևորը՝ այն հարգանքի ու երախտագիտության դրսևորում է Գեորգի Պողոսյանի հիշատակի նկատմամբ։ Նրա ունեցած ավանդն ապրում է ոչ միայն մեզնով, այլև այս շարունակական գիտական ժառանգությամբ»,- ասաց նա։

Գիտաժողովի կազմակերպիչներն ընդգծեցին, որ երջանկահիշատակ Գեորգի Պողոսյանի երազանքն էր այս միջոցառումը տեսնել Երևանում։ 

«Բոլորս միասնական ուժով այսօր կյանքի ենք կոչում Գեորգի Պողոսյանի նվիրական երազանքը։ Թեև նա չհասցրեց տեսնել Երևանի պետական համալսարանում իր իսկ նախաձեռնությամբ անցկացվող գիտաժողովը, սակայն մեր հետաքրքիր քննարկումներով և մասնագիտական վերլուծություններով կիրագործենք նրա երազանքը»,- մատնանշեց ֆ.մ.գ.դ., պրոֆեսոր, ԵՊՀ հեռանկարային հետազոտությունների միջազգային կենտրոնի տնօրեն, գիտաժողովի խորհրդատվական կոմիտեի անդամ Անահիտ Բալաբեկյանը, որը նաև երջանկահիշատակ պրոֆեսորի կինն է։

Գիտաժողովի խորհրդատվական կոմիտեի անդամ, գիտաժողովի կազմակերպիչ Լևոն Մարդոյանի համար միջոցառումը ոչ միայն մասնագիտական կարևորություն ունի, այլև անձնական հուզիչ իմաստ։

«Գեորգի Պողոսյանը իմ ընկերն էր, գործընկերը։ Այս գիտաժողովն այսօր կայանում է հենց նրա նախաձեռնությամբ և մեծ ջանքերի շնորհիվ։ Երկու տարի առաջ դեռ միասին էինք քննարկում գիտական այս միջոցառման հնարավոր կազմակերպումը ԵՊՀ-ում։ Ցավոք, հիմա ես միակն եմ մնացել այն հին թիմից, որը համախմբվել էր մեր ուսուցիչ Վալերի Անտոնյանի շուրջ։ Գեորգին այն մարդն էր, որը միշտ օգնության ձեռք էր մեկնում, երբ որևէ մեկը դժվարության էր հանդիպում։ Նրա կարոտը հիմա ավելի շոշափելի է, քան երբևէ»,- ասաց նա։

Խոսելով գիտաժողովի մասնակիցների մասին` ԵՊՀ ֆիզիկայի գիտահետազոտական ինստիտուտի գիտաշխատող, գիտաժողովի համակազմակերպիչ Սուսաննա Գագինյանը նշեց. «Միջազգային գիտաժողովի մասնակիցների թիվը գերազանցում է 130-ը։ Գիտաժողովին ինչպես անցանց, այնպես էլ առցանց ձևաչափով մասնակցում են գիտնականներ Գերմանիայից, Ֆրանսիայից, Իտալիայից, Չինաստանից, Կորեայից, Կոլումբիայից, ԱՄՆ-ից և այլ երկրներից»։

Հիշեցնենք որ գիտաժողովն անցկացվելու է մինչև ս.թ. օգոստոսի 1-ը: