Փոխակերպվող տնտեսություն, մարդկային կապիտալի զարգացում․ ԵՊՀ-ում մեկնարկեց արդեն ավանդույթ դարձած միջազգային գիտաժողովը

Գիտաժողովի նպատակն է ձևավորել քննարկման բարձրորակ հարթակ՝ նորարարական հետազոտությունների արդյունքների ներկայացման և տարածման համար՝ խթանելով համագործակցությունը ակադեմիական շրջանակների և տարբեր երկրների գիտակրթական հաստատությունների փորձագետների միջև։ Միևնույն ժամանակ, գիտաժողովը նպատակ ունի ուսումնասիրելու կրթության և տնտեսության ոլորտներում նորարարական տեխնոլոգիաների փոխակերպող ներուժը՝ դիտարկելով դրանց ազդեցությունը մարդկային կապիտալի զարգացման, ինչպես նաև տարածական և տնտեսական առումներով կայուն ու ներառական աճի խթանման վրա։

Միջոցառումը մեկնարկեց ԵՊՀ օրհներգով, ինչին հաջորդեց ԵՊՀ ռեկտոր Հովհաննես Հովհաննիսյանի ելույթը։ Ռեկտորն ընդգծեց, որ գիտաժողովի թեմատիկ շրջանակը բավականին ընդգրկուն է և հնարավորություն է ընձեռում տարբեր ոլորտների մասնագետներին ներկայացնելու իրենց նորարարական դիտարկումները և հետազոտությունների արդյունքները։ Նա հույս հայտնեց, որ գիտաժողովի շրջանակում կծավալվեն բովանդակալից և արդյունավետ քննարկումներ։

«Օտարերկրյա բազմաթիվ մասնակիցների ներկայությունն ապացուցում է, որ այստեղ քննարկվելիք թեմաներն արդիական են և ունեն բացառիկ կարևորություն։ Երևանի պետական համալսարանի համար առաջնահերթություն է հյուրընկալել այնպիսի նախաձեռնություններ, որոնք համադրում են գիտելիքը, պրակտիկան և ապագայի տեսլականը։ ԵՊՀ-ն իր ռազմավարական ծրագրի շրջանակում մեծապես կարևորում է գիտական նախաձեռնությունների խրախուսումը»,- ասաց ԵՊՀ ռեկտոր Հովհաննես Հովհաննիսյանը։

ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանը նշեց, որ ֆակուլտետը գիտաժողովի շրջանակում երեք օրով վերածվելու է նորարարական հետազոտությունների արդյունքների ներկայացման կարևոր հարթակի։

«Աշխարհում տեղի ունեցող շարունակական փոփոխություններին արդյունավետ արձագանքելու համար անհրաժեշտ է դուրս գալ ավանդական մտածողության շրջանակներից` կառուցելու մարդակենտրոն, նորարարությունների հիմքով, ներառական և կայուն փոխակերպվող տնտեսություն։ Ֆակուլտետը ոչ միայն կրթական կենտրոն է, այլև հարթակ՝ միջազգային համագործակցության, գիտական առաջխաղացման և ազգային զարգացման համար։ Գործընկերների հետ համագործակցությամբ անցկացվող գիտական այս միջոցառման շնորհիվ մենք կառուցում ենք նոր կամուրջներ Հայաստանի և համաշխարհային ակադեմիական համայնքի միջև»,- ընդգծեց դեկանը։

ՀՀ բանկերի միության նախագահ Դանիել Ազատյանը նշեց, որ կրթությունն է կայուն զարգացման ու համակարգային փոփոխությունների հիմքը, իսկ բանկային ոլորտի ուժը կախված է վերլուծական մտածողություն ունեցող մասնագետներից։ Նա ընդգծեց Երևանի պետական համալսարանի հետ սերտ համագործակցության կարևորությունը՝ տեսության և պրակտիկայի միջև կամուրջ կառուցելու և ֆինանսական առաջնորդների հաջորդ սերնդի դաստիարակության համար։

Գիտաժողովի ընթացքում անցանց և առցանց ձևաչափով կներկայացվեն ավելի քան 75 զեկուցումներ թեմատիկ յոթ բաժանմունքներում: Եռօրյա գիտական միջոցառման շրջանակում զեկուցումներով հանդես կգան նաև ՀՀ պետական կառավարման, ֆինանսաբանկային ոլորտի, ինչպես նաև միջազգային առաջատար կազմակերպությունների ներկայացուցիչներ, այդ թվում՝ ՀՀ կենտրոնական բանկի, ՀՀ էկոնոմիկայի նախարարության, Արժույթի միջազգային հիմնադրամի և Համաշխարհային բանկի փորձագետներ: Գլխավոր խոսնակների թվում են երկու Նոբելյան մրցանակակիրներ՝ Փոլ Կրուգմանը (2008) և Տարոն Աճեմօղլուն (2024), ինչպես նաև Նիդեռլանդների բաց համալսարանի պրոֆեսոր, Տարածաշրջանային գիտության ակադեմիայի (TRSA) փոխնախագահ, համաշխարհային ճանաչում ունեցող լավագույն 30 տնտեսագետներից Պիտեր Նայկամպը:

Վերջինս իր խոսքում նշեց․ «Ելնելով այսօր աշխարհում առկա տնտեսական և քաղաքական իրադրություններից՝ առավել քան երբևէ կարևոր է խորապես քննարկել այն թեմաները, որոնց պիտի անդրադառնանք գիտաժողովի շրջանակում։ Դրանց թվում են՝ փոխակերպվող տնտեսությունը, անկայուն ժամանակներում տնտեսության զարգացումը, քաղաքական փոփոխությունները, տարածքային խնդիրները, կլիմայական մարտահրավերները, ինստիտուցիոնալ փոփոխությունները, միջազգային համագործակցությունը և այլ թեմաներ։ Այսպիսով, ուրախ եմ, որ այսօր այստեղ ենք և հնարավորություն ունենք իրականացնելու այն, ինչին միտված է գիտությունը՝ կառուցելու գիտելիքի ամուր և հուսալի հիմք»։

Միջոցառմանը ԵՊՀ ոսկե մեդալով պարգևատրվեց Պիտեր Նայկամպը՝ երկարատև և կայուն ակադեմիական համագործակցության ու նշանակալից ներդրման համար, իսկ Տարածաշրջանային գիտությունների ակադեմիայի տնօրեն Կարիմա Կուրտիտը պարգևատրվեց ԵՊՀ տնտեսագիտության և կառավարման ֆակուլտետի հուշամեդալով՝ ֆակուլտետին ցուցաբերած շարունակական աջակցության և համագործակցության համար։ Միջազգային երկրորդ գիտաժողովի կազմակերպմանն աջակցելու համար շնորհակալագրեր և հուշանվերներ տրվեցին Հայաստանի բանկերի միության նախագահ Դանիել Ազատյանին, «ԱյԴի բանկ» ՓԲԸ վարչության նախագահ Մհեր Աբրահամյանին, «Ֆասթ բանկ» ՓԲԸ գործադիր տնօրեն-տնօրինության նախագահ Գարեգին Դարբինյանին։

Նշենք, որ միջազգային գիտաժողովին իրենց մասնակցությունն են հաստատել շուրջ 120 մասնակիցներ, որոնց թվում են ականավոր գիտնականներ և մասնագիտական ոլորտում ճանաչված դասախոսներ ԵՊՀ տնտեսագիտության և կառավարման ֆակուլտետից և ՀՀ այլ բուհերից:

Գիտաժողովին մասնակցելու համար Հայաստան են ժամանել արտերկրի տարբեր համալսարանների, բիզնես դպրոցների և բարձր վարկանիշ ունեցող կառույցների շուրջ 40 անվանի գիտնականներ աշխարհի ավելի քան 17 երկրներից՝ ԱՄՆ-ից, Կանադայից, Բրազիլիայից, Ֆրանսիայից, Իտալիայից, Իսպանիայից, Պորտուգալիայից, Նիդեռլանդներից, Բելգիայից, Հնդկաստանից և այլ երկրներից:

Այսպիսի բազմակողմանի մասնակցությունը գիտաժողովին կապահովի փորձագիտական քննարկումների բարձր մակարդակ՝ համադրելով միջազգային ճանաչում ունեցող գիտնականների ակադեմիական ուսումնասիրությունները և առաջատար պետական կառավարման մարմինների ու միջազգային կազմակերպությունների փորձագիտական եզրակացությունները:

Նշենք որ գիտաժողովի հովանավորներն են «Ֆասթ բանկ» ՓԲԸ-ն և «ԱյԴի բանկ» ՓԲԸ-ն, իսկ գործընկերն է Հայաստանի բանկերի միությունը: