Զբոսաշրջության ոլորտը և միջազգային փորձը. Հոկայդոյի համալսարանի պրոֆեսորը՝ ԵՊՀ-ում

ԵՊՀ աշխարհագրության և երկրաբանության ֆակուլտետի սերվիսի ամբիոնի դոցենտ Գոռ Ալեքսանյանը պրոֆեսորի հետ հանդիպումը բնութագրեց որպես նշանավոր իրադարձություն ֆակուլտետի պատմության մեջ, քանի որ զբոսաշրջության ոլորտն ուսումնասիրող ուսանողները հնարավորություն ունեցան լսելու աշխարհի ամենահայտնի և հեղինակավոր մասնագետներից մեկին։ Նրա խոսքով՝ դասախոսության ընթացքում ներկայացված մտքերն ու շեշտադրումները կարևոր դիտարկումներ էին հատկապես տարածքային կառավարման, զբոսաշրջային հոսքերի ճիշտ կազմակերպման և համայնքային ներուժի արդյունավետ գործարկման տեսանկյունից, ինչը չափազանց արժեքավոր է այն ուսանողների համար, որոնք ապագայում պատրաստվում են աշխատելու զբոսաշրջության ոլորտում։

Պրոֆեսոր Նորիակի Նիշիյաման իր ելույթում նշեց, որ մեծ պատիվ է ներկա գտնվել ԵՊՀ-ում և քննարկել թեմաներ, որոնք անմիջական կապ ունեն աշխարհի տարբեր երկրներում իրականացվող զբոսաշրջության զարգացման ծրագրերի հետ։ Նա պատմեց, որ իր մասնագիտական հետաքրքրությունները ներառում են այնպիսի ուղղություններ, ինչպիսիք են ճարտարապետությունը, քաղաքային պլանավորումը, ինչպես նաև զբոսաշրջային դիզայնը: Պրոֆեսորը նաև հավելեց, որ Ճապոնիայում մշակված գիտելիքներն ու փորձը իրենց համալսարանը լայնորեն կիրառում է միջազգային համագործակցության շրջանակներում՝ աջակցելով տարբեր երկրների զբոսաշրջության ոլորտների զարգացման ծրագրերին։

Խոսելով Հոկայդոյի համալսարանի զբոսաշրջության կիրառական ուսումնասիրությունների կենտրոնի գործունեության մասին՝ պրոֆեսորը շեշտեց, որ կենտրոնը հիմնված է զբոսաշրջության զարգացման գաղափարախոսության վրա և գործում է արժեքների ստեղծման սկզբունքով։ Կենտրոնի հիմնական նպատակներից է ամրապնդել գործընկերային համագործակցությունը տեղական համայնքների հետ, ուսումնասիրել նրանց առանձնահատկությունները, խթանել տարածաշրջանի ինքնության զարգացումը և բարձրացնել բնակչության մասնակցությունը զբոսաշրջային նախագծերում։ Պրոֆեսորը ընդգծեց, որ ուսանողները կենտրոնի աշխատանքում զբաղեցնում են առանցքային տեղ, քանի որ ապագա մասնագետների ձևավորումը և նրանց գիտելիքների ներուժի աճը կարևոր նշանակություն ունեն ինչպես տեղական, այնպես էլ միջազգային մակարդակներում։

Դասախոսության ընթացքում հատկապես շեշտվեց համայնքային զբոսաշրջության կարևորությունը, որը համարվում է ժամանակակից աշխարհի ամենաառանցքային մոտեցումներից մեկը։ Պրոֆեսոր Նիշիյամայի գնահատմամբ՝ այսօր գրեթե անհնար է պատկերացնել զբոսաշրջության կայուն զարգացումը՝ առանց համայնքների անմիջական մասնակցության, քանի որ հենց համայնքներն են իրական կրողները մշակութային և պատմական այն արժեքների, որոնք կարող են դառնալ զբոսաշրջության զարգացման հիմք։ Նրա խոսքով՝ զբոսաշրջության ապագան հիմնված է ոչ միայն այցելուներին գրավող օբյեկտների, այլև դրանք ստեղծող մարդկանց՝ համայնքների վրա, որոնց ներուժը պետք է ճիշտ բացահայտել և զարգացնել։ 

Միջոցառման ավարտին ուսանողները հարցեր ուղղեցին պրոֆեսոր Նիշիյամային՝ քննարկելով տարբեր երկրների փորձը, բնական և մշակութային ժառանգության պահպանման մեթոդները և զբոսաշրջության զարգացման նորագույն մոտեցումները։