Ֆիզիկական պրոցեսների մոդելավորման և ազդանշանների մշակման ամբիոն

Ֆիզիկական պրոցեսների մոդելավորման և ազդանշանների մշակման ամբիոնը գործում է Ֆիզիկայի ինստիտուտում 2025 թվականից: Վերջին տասնամյակներում ֆիզիկական հետազոտությունների շրջանակը կտրուկ փոխվել է․ միայն տեսական մոդելներն այլևս բավարար չեն։ Այսօր հաշվողական մոդելավորումը և ազդանշանների մշակումը անբաժանելի գործիքներ են, այլ ոչ թե լրացուցիչ պարագաներ՝ ֆիզիկայի և ճարտարագիտության ոլորտում։ Միևնույն ժամանակ այսօր դժվար է պատկերացնել փորձարարական այնպիսի արդյունք, որն անմիջական չափումով է ստացվում, և չեն կիրառվել տվյալների մշակման տարատեսակ ալգորիթմներ և մեթոդներ։ Սա է պատճառը, որ 2025 թվականին ստեղծվել է Ֆիզիկական պրոցեսների մոդելավորման և ազդանշանների մշակման ամբիոնը։

Ֆիզիկական պրոցեսների մոդելավորման և ազդանշանների մշակման ամբիոնը պատրաստում է մասնագետներ, որոնք կարող են աշխատել տարատեսակ ֆիզիկական և տեխնոլոգիական պրոցենսերի մոդելավորման, տեղեկատվության մշակման և հաղորդման, տեխնոլոգիաների նախագծման, մոդելավորման և ավտոմատացման, շահագործման, տեղեկատվության անվտանգության ոլորտներին առնչվող ձեռնարկություններում` «ՅՈՒՔՈՄ» («Ucom»), «Տելեկոմ Արմենիա» («Team Telecom»), «ՎիվաՍել-ՄՏՍ» («Vivacell MTS»), «ՆԵՅՇՆԼ ԻՆՍԹՐՈՒՄԵՆԹՍ» («National Instruments»), ՀՀ ՏՏ ոլորտի այլ ձեռնարկություններում և այդ ոլորտի արտասահմանյան ձեռնարկությունների մասնաճյուղերում: ՀՀ ԳԱԱ ռադիոֆիզիկայի և էլեկտրոնիկայի, կապի, ֆիզիկական հետազոտությունների ինստիտուտներում: Հարկ է նշել, որ ազդանշանների համակարգչային մշակման եղանակները և դրանց արագագործությունը վճռական նշանակություն ունեն ամենատարբեր բնագավառներում` ռազմական խնդիրներից սկսած մինչև արտադրական և գիտական սարքերի ավտոմատացում, իսկ այդ հմտություններով մասնագենտները աշխատաշուկայում խիստ պահանջված են:

Ամբիոնն իրականացնում է նաև ֆիզիկայի ինստիտուտի «Ռադիոֆիզիկա և համակարգչային տեխնոլոգիաներ» կրթական ծրագրի շրջանակում հիմնարար թեմատիկ ուղղությունների պահանջներին համապատասխան բարձրագույն մաթեմատիկայի բազային բաժինների դասավանդման աշխատանքները:

Ամբիոնի առաքելությունը

• Պատրաստել ֆիզիկական մոդելավորման և ազդանշանների մշակման բնագավառի բարձրակարգ մասնագետներ, որոնք, ունենալով խոր և հիմնարար տեսական գիտելիքներ, կարողանում են դրանք հմտորեն կիրառել գործնականում:

• Իրականացնել հետազոտություններ տարատեսակ ֆիզիկական պրոցեսների մոդելավորման, տվյալների և ազդանշանների մշակման ոլորտի առջև ծառացած խնդիրների շուրջ:

Ամբիոնում կատարվող գիտական հետազոտությունների հիմնական ուղղություններն են`

Ենթաալիքային չափերում էլեկտրամագնիսական ալիքների կառավրման հնարավորության հետազոտում տարատեսակ համակարգերի կիրառմամբ հաճախությունների լայն տիրույթում՝ ռադիոալիքներից մինչև օպտիկա։ Էլեկտրականապես փոքր չափերի անտենաների մշակում, մետանյութերի և մետամակերևույթների հիման վրա հաճախությունների լայն տիրույթում էլեկտրամագնիսական ալիքների կլանող, փուլային արձագանքը, կառավարվող համակարգերի հետազոտում և մշակում։ Օպտիկական և տերահերցային տիրույթի միկրոչափական ռեզոնատորների հետազոտում։

Ամբիոնը բակալավրիատ, մագիստրատուրա և ասպիրանտուրա եռաստիճան կրթական համակարգի շրջանակում պետպատվերով և վճարովի հիմունքներով ապահովում է բարձրագույն կրթություն հետևյալ մասնագիտություններով.

Բակալավրի որակավորում`

«Ռադիոֆիզիկա և համակարգչային տեխնոլոգիաներ»

Մագիստրոսի որակավորում`

«Հեռահաղորդակցություն»