ԵՊՀ ֆիզիկայի ինստիտուտի ՈՒԳԸ նախաձեռնությամբ կայացավ «Քաղցկեղը մոլեկուլային մակարդակում» թեմայով պանելային քննարկում, որը միավորեց տարբեր ոլորտների մասնագետների և թեմայով հետաքրքրված անձանց։
Միջոցառման ընթացքում ներկաները հնարավորություն ունեցան ծանոթանալու քաղցկեղի առաջացման և զարգացման մոլեկուլային մեխանիզմներին, ինչպես նաև ոլորտում կատարվող ժամանակակից գիտական հետազոտություններին։ Քննարկման առանցքում էր այն կարևոր միտքը, որ քաղցկեղի ուսումնասիրությունը վաղուց արդեն դուրս է եկել միայն բժշկության սահմաններից և դարձել է բազմամասնագիտական դաշտ, որտեղ սերտորեն փոխկապակցված են ֆիզիկան, դեղագիտությունն ու ինժեներիան: Հատուկ ուշադրություն դարձվեց այն հարցին, թե ինչպես են ֆիզիկական մեթոդներն ու ինժեներական լուծումները նպաստում հիվանդության ավելի ճշգրիտ ախտորոշմանը և արդյունավետ բուժման մեթոդների մշակմանը։ Ներկայացվեցին նաև նորարարական մոտեցումներ, որոնք հնարավորություն են տալիս ուսումնասիրելու բջջային և մոլեկուլային մակարդակում տեղի ունեցող փոփոխությունները՝ բացելով նոր հեռանկարներ քաղցկեղի դեմ պայքարում։
Ինստիտուտի ՈՒԳԸ-ի կողմից կազմակերպվող այսպիսի նախաձեռնությունները կարևոր հարթակ են գիտության տարբեր ճյուղերի միջև համագործակցությունը խթանելու, գիտելիքի փոխանակման և արդիական խնդիրների շուրջ մասնագիտական երկխոսություն ձևավորելու համար։
