Միջազգային համագործակցությունը բարձրագույն կրթության ոլորտի մասնագետների համար էական նշանակություն ունի՝ միջազգային լավագույն փորձին, մեթոդներին և մոտեցումներին ծանոթանալու, հմտություններն ընդլայնելու առումով։
Երևանի պետական համալսարանը, կարևորելով միջազգային փորձի կիրառումը բուհում, համագործակցում է արտասահմանյան մի շարք համալսարանների հետ, ինչը ԵՊՀ պրոֆեսորադասախոսական կազմին տալիս է գիտելիքները խորացնելու և մասնագիտական հմտությունները զարգացնելու հնարավորություն։
Ժուռնալիստիկայի ֆակուլտետի և Journalist.am-ի «ԵՊՀ միջազգայնացում» շարքը պատմում է այդ հնարավորությունների մասին՝ ներկայացնելով ԵՊՀ դասախոսների, որոնք համագործակցել են տարբեր միջազգային համալսարանների հետ և ձեռք բերած գիտելիքներն ու հմտությունները կիրառում են հայաստանյան կրթական համակարգում։
Տիգրան Հարությունյան՝ ԵՊՀ գենետիկայի և բջջաբանության ամբիոնի դոցենտ
Տիգրան Հարությունյանը Յենայի (Գերմանիա) Ֆրիդրիխ Շիլլերի համալսարանի կլինիկայի Մարդու գենետիկայի ինստիտուտում մի շարք գիտական ուսումնասիրություններ է իրականացրել մոլեկուլային բջջագենետիկայի ոլորտում։ Գենետիկայի և բջջաբանության ամբիոնը համագործակցում է Յենայի Մարդու գենետիկայի ինստիտուտի հետ շուրջ 20 տարի, որի արդյունքում տպագրվել են ավելի քան 120 գիտական հոդվածներ միջազգային գրախոսվող հանդեսներում և տասնյակ գլուխներ տարբեր գրքերում։
Տիգրան Հարությունյանը մի քանի անգամ դասախոսություններ է կարդացել մոլեկուլային բժշկագիտության բաժնի մագիստրատուրայի ուսանողների համար։ Նա գերմանացի գործընկերոջ՝ պրոֆեսոր Թոմաս Լիրի հետ միասին 2020 թ․-ին տպագրել են «Մարդու գենետիկայի հիմունքները» դասագիրքը հայ ուսանողների և մասնագետների համար․ «Համալսարանները կարող են զարգանալ միայն համագործակցելու շնորհիվ: Գործընկեր համալսարանների հետ համագործակցելու միջոցով մեր հետազոտությունների շրջանակն ընդլայնվում է, ինչը հնարավորություն է ընձեռում ավելի շատ գիտական արտադրանք ստեղծելու: Բացի այդ՝ դա զարգացնում է նաև դասախոսների և ուսանողների մասնագիտական հմտությունները և առաջացնում է գործընկեր համալսարանների գիտաշխատողների հետաքրքրությունը ոչ միայն ԵՊՀ-ի, այլև Հայաստանի նկատմամբ»:
Տիգրան Սարգսյան՝ ԵՊՀ աշխարհագրության և երկրաբանության ֆակուլտետի սերվիսի ամբիոնի դոցենտ
Տիգրան Սարգսյանը վերապատրաստվել է ԵՊՀ գործընկեր Արիզոնայի պետական համալսարանում (ԱՄՆ)՝ ԵՊՀ միջազգային հարաբերությունների ֆակուլտետում գործող մագիստրոսական ծրագրի՝ ամերիկագիտության վերաբերյալ նոր գիտելիքներ և հմտություններ ձեռք բերելու նպատակով։ Նա նաև վերապատրաստվել է Վիլնյուսի համալսարանում և դասախոսել Գերմանիայի Յադե համալսարանում․ «Վերապատրաստումն ամերիկյան բուհական միջավայրը, դասավանդման մեթոդներն ուսումնասիրելու շատ լավ փորձ էր: Գլոբալացման պայմաններում չափազանց արժևորվում է փորձի փոխանակումը, քանի որ շահեկան վիճակում են գտնվում և՛ բուհը, և՛ ուսանողները, և՛ դասախոսները։ Այժմ փորձում ենք ամերիկյան բուհական համակարգին և դասավանդման մոտեցումներին հնարավորինս մոտ լինել և դրանք կիրառել ԵՊՀ-ում»։
Լիանա Գաբրիելյան՝ ԵՊՀ քիմիայի ֆակուլտետի ֆիզիկական և կոլոիդների քիմիայի ամբիոնի դոցենտ, քիմիական գիտությունների թեկնածու
Լիանա Գաբրիելյանը փորձ և հմտություններ ձեռք բերելու համար վերապատրաստվել է Գերմանիայի Կարլսռուհեի, Բոխումի, Աուգսբուրգի, Բայրոթի և այլ համալսարաններում: «Էրազմուս+» ծրագրով դասավանդել է Զաարլանդի համալսարանում, իսկ PRINTel ծրագրով մեկնել նաև Ավստրիայի Գրացի Յոհաննեումի համալսարան․ «Գերմանիայում գիտահետազոտական աշխատանքներ կատարելու տարիներին մեծ փորձառություն եմ ձեռք բերել, որը հաջողությամբ կիրառում եմ ԵՊՀ-ում: Մասնակցությունը PRINTel նախագծին թույլ տվեց ինձ ծանոթանալ դասավանդման նորարարական մեթոդներին, օրինակ՝ Blended teaching and learning (Համակցված դասավանդում և ուսուցում), որը փորձում եմ կիրառել համալսարանում՝ ավելի հետաքրքիր դարձնելով իմ դասընթացները, ինչպես նաև գործընկերներիս հետ կիսում եմ ձեռք բերած գիտելիքներս»։
Հայարփի Սիմոնյան՝ ԵՊՀ ֆարմացիայի ինստիտուտի ֆարմքիմիայի և ֆարմակագնոզիայի ամբիոնի վարիչ, քիմիական գիտությունների թեկնածու, դոցենտ
Հայարփի Սիմոնյանը զբաղվում է ոչ սպիտակուցային ամինաթթուների ասիմետրիկ սինթեզի ուսումնասիրությամբ: Նա և իր գործընկերները արդեն 10 տարի է՝ համագործակցում են Կենսակառուցվածքների և կենսապատկերների ինստիտուտի (Իտալիա, Նեապոլ) գիտաշխատող Ջիովանի Ռովիելոյի հետ: Բացի հայ մասնագետների` Իտալիա գործուղումներից՝ իտալացի գործընկերներն էլ Հայաստանում աշխատելու հնարավորություն են ունենում։ 2022 թ․ նոյեմբերին, օրինակ, Ջիովանի Ռովիելոն դասախոսել է Երևանի պետական համալսարանում։
Այդ համագործակցությունը ավելի լուրջ հիմքերի վրա դրվեց ՀՀ գիտության կոմիտեի տրամադրած դրամաշնորհի միջոցով, որի շրջանակում էլ նախատեսված են փոխադարձ գործուղումներ․ «Ես շատ եմ կարևորում միջազգային համագործակցության դերը և՛ գիտական, և՛ կրթական տեսանկյունից․ գործընկերների նյութատեխնիկական և մասնագիտական բազաներին ծանոթանալու շնորհիվ կարողանում ենք գեներացնել նոր գաղափարներ և կազմել նոր պլաններ՝ ավելի ծավալուն և ծանրակշիռ աշխատանքներ կատարելու համար»։
Վահագն Միքայելյան՝ ԵՊՀ դիսկրետ մաթեմատիկայի և տեսական ինֆորմատիկայի ամբիոնի պրոֆեսոր
Վահագն Միքայելյանը հետազոտական ծրագրերի իրականացման ընթացքում համագործակցել է արտասահմանյան տարբեր համալսարանների հետ: Որպես հրավիրյալ գիտաշխատող՝ ԱՄՆ-ի Վանդերբիլտի համալսարանում է աշխատել:
Միջազգային համալսարանների հետ համագործակցելուց հետո նա իրեն ավելի պարտավորված է զգում Հայաստանում դասախոսելիս և կարծում է, որ այդ համագործակցությունը նպաստում է դասավանդումն ավելի արդյունավետ դարձնելուն և անհամեմատ մեծացնում դասախոսի պատասխանատվության զգացումը․ «Գիտության ցանկացած բնագավառում միջազգային համագործակցությունը շատ կարևոր է: Հայաստանում գիտական արդյունավետ գործունեությամբ զբաղվելու համար անհրաժեշտ է համագործակցել նաև արտասահմանյան գիտական կենտրոնների հետ՝ կապ պահպանելով նրանց մասնագետների հետ, իմանալ՝ ինչպես են աշխատում»։
Մուշեղ Ռաֆայելյան՝ ԵՊՀ ֆիզիկայի ինստիտուտի դասախոս
Մուշեղ Ռաֆայելյանը ֆակուլտետի այլ մասնագետների հետ համագործակցել է Ազատ համալսարանի (Բրյուսել) ֆոտոնիկայի խմբի հետ, որի արդյունքում անցկացվել են սեմինարներ, հետազոտական աշխատանքներ։ Նա համագործակցում է նաև Փարիզի Սորբոնի և Բորդոյի համալսարանների հետ․ «Երբ դասախոսն ակտիվ հետազոտությամբ է զբաղվում, այն օգնում է դասագործընթացն ավելի հետաքրքիր դարձնելուն, հատկապես այն դեպքերում, երբ կարողանում է հետազոտությունները ցույց տալ լաբորատորիայում՝ գործնական կիրառությամբ։ Ապագայում շարունակելու ենք համագործակցել Ֆրանսիայի Բորդո համալսարանի հետ»։
Արսեն Բաբաջանյան՝ ԵՊՀ ֆիզիկայի ինստիտուտի կիրառական էլեկտրադինամիկայի և մոդելավորման ամբիոնի վարիչ, պրոֆեսոր
Արսեն Բաբաջանյանը 2004-2011 թթ․ դոկտորական ծրագրով Սոգանգ համալսարանում (Հարավային Կորեա) էր՝ որպես հրավիրված պրոֆեսոր։ Հայաստան վերադառնալուց մեկ տարի անց Երևանի պետական համալսարանի և Սոգանգի համալսարանի միջև կնքվել է համագործակցության հուշագիր, որը գործում է մինչ այսօր․ «Վերապատրաստումն ինձ տվել է մասնագիտական մեծ աճ՝ արդեն որպես դասախոս և գիտնական։ Կորեայում անցկացրած տարիների ընթացքում համագործակցեցինք նաև Ճապոնիայի, Ֆրանսիայի, Ամերիկայի Միացյալ Նահանգների գործընկեր համալսարանների հետ։ Յոթ տարվա ընթացքում ձեռք բերած գիտելիքներն ու փորձառությունը վերադառնալուն պես կիրառեցի Երևանի պետական համալսարանում»։
Նարինե Ղալամյան
Երջանիկ Հարությունյան
Մերի Ղազարյան
Ասպրամ Համբարձումյան
Ժուռնալիստիկայի ֆակուլտետ, 2-րդ կուրս
Մարի Թարյանի խումբ
