ԵՊՀ փիլիսոփայության և հոգեբանության ֆակուլտետում տեղի ունեցավ «Սոցիալական վստահությունը և կառավարության դերը» խորագրով դասախոսություն, որի բանախոսն էր Օքսֆորդի համալսարանի (Միացյալ Թագավորություն) պրոֆեսոր Ջոնաթան Վոլֆը։
Փիլիսոփայության և հոգեբանության ֆակուլտետի դեկան, դոցենտ Ա. Բաղդասարյանը, ներկայացնելով պրոֆեսոր Ջոնաթան Վոլֆին, նշեց, որ Օքսֆորդի համալսարանի Բլավատնիկի անվան կառավարման դպրոցի փիլիսոփայության և հանրային քաղաքականության վաստակավոր պրոֆեսոր, փիլիսոփայության և հանրային քաղաքականության ավագ հետազոտող, ինչպես նաև Օքսֆորդի համալսարանի «Վոլֆսոն» քոլեջի արտահաստիքային գիտաշխատող Ջ. Վոլֆը ժամանակակից քաղաքական փիլիսոփայության ամենաականավոր ներկայացուցիչներից է, որն ուսումնասիրում է հանրային քաղաքականության բարոյագիտական հայեցակետերը։ Ի ճանաչումն փիլիսոփայությանը բերած նշանակալի ավանդի՝ պրոֆեսոր Ջ. Վոլֆը 2023 թվականից Միացյալ Թագավորության հանրային փիլիսոփայության առաջատար հաստատություններից մեկի՝ Փիլիսոփայության թագավորական ինստիտուտի նախագահն է։
Հանդիպման ընթացքում ընդգծվեց, որ պրոֆեսոր Ջ. Վոլֆն իր գիտական գործունեությունը սկսել է քաղաքական փիլիսոփայության ոլորտից։ Նա ունի մի շարք աշխատություններ ռեսուրսների բաշխման արդարության, ազատության և հանրային հաստատությունների բարոյական հիմքերի վերաբերյալ։ Պրոֆեսոր Ջ. Վոլֆի աշխատանքները վերաբերում են սոցիալական այնպիսի խնդիրների, ինչպիսիք են աղքատությունը, հանրային անվտանգությունը, հաշմանդամությունը և հանրային քաղաքականության բարոյական չափումները։ Վերջինիս գիտական աշխատանքները բնորոշվում են փիլիսոփայական հստակության և հանրային արդիականության հազվագյուտ համադրությամբ՝ արտացոլելով նրա համոզմունքը, որ փիլիսոփայությունը պետք է լուսաբանի ոչ միայն վերացական տեսությունը, այլև այն բարոյական երկընտրանքները, որոնց բախվում են կառավարություններն ու քաղաքացիները։
Պրոֆեսոր Ջ. Վոլֆի հրատարակած գրքերը, այդ թվում՝ «Քաղաքական փիլիսոփայության ներածությունը», շարունակում են բազմաթիվ երկրներում ուսանողներին ծանոթացնել վերլուծական քաղաքական փիլիսոփայությանը։ Դասախոսության ընթացքում հիմնվելով իր լայնածավալ հետազոտությունների վրա՝ պրոֆեսորը ներկայացրեց կառավարության նկատմամբ վստահության և անվստահության օրինաչափությունները՝ պնդելով, որ այն կառավարությունները, որոնք ակնկալում են իրենց քաղաքացիների վստահությունը, պետք է նաև ցույց տան, որ իրենք են վստահում հանրությանը։
Դասախոսությանը հաջորդած հարցուպատասխանի ընթացքում մասնակիցները հնարավորություն ունեցան ծավալելու բովանդակալից քննարկում ներկայացված թեմաների շուրջ։
