ԵՊՀ աստվածաբանության ֆակուլտետի միջանցքները համալրվել են նոր սեղաններով, աթոռներով և դեկորատիվ տարրերով: Փոփոխությունների նպատակն ուսանողների, դասախոսների և աշխատակիցների համար առավել հարմարավետ միջավայր ստեղծելն է:
Համալսարանական կյանքի կարևոր մասը նաև լսարաններից դուրս է անցնում․ ընդհանուր օգտագործման տարածքներում ուսանողները շփվում են, քննարկում ուսումնառությանն առնչվող հարցեր, պատրաստվում դասերին ու քննություններին: Նոր կահավորումը հնարավորություն է տալիս ֆակուլտետի միջանցքներն օգտագործելու նաև անհատական աշխատանքի, կարճատև հանդիպումների և ոչ պաշտոնական քննարկումների համար:
Կահավորման ընթացքում ուշադրություն է դարձվել նաև տարածքների ընդհանուր տեսքին: Դեկորատիվ տարրերը լրացնում են նոր կահավորանքը՝ միջավայրին հաղորդելով ավելի ջերմ ու ներդաշնակ տեսք:
Այս փոփոխությունները ֆակուլտետի առօրյան ավելի հարմարավետ դարձնելու ևս մեկ քայլ են՝ ուսումնական աշխատանքին, հաղորդակցությանը և մտքերի փոխանակմանը նպաստող պայմաններ ստեղծելու նպատակով:



