Հաշվապահական հաշվառում և աուդիտ

Ուսման տևողությունը առկա ուսուցման համակարգում՝ 1.5 տարի։

Շնորհվող որակավորումը՝ տնտեսագիտության մագիստրոս։

Ընդունելության պահանջները

ԵՊՀ մագիստրատուրայի 2025/2026 ուսումնական տարվա առկա և հեռակա ուսուցման ձևերով ընդունելությունը կատարվելու է համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Մանրամասները՝ «Ընդունելություն» բաժնում:

Ծրագիրը բաղկացած է ընդհանուր, մասնագիտական և կամընտրական դասընթացներից: Մասնագիտական պարտադիր և կամընտրական դասընթացներն ունեն կիրառական նշանակություն և ուղղվածություն, վերաբերում են տնտեսական զարգացման արդի խնդիրներին, մարտահրավերներին և ոլորտային փոփոխությունների կանխատեսումներին, տնտեսական քաղաքականությունների մշակմանը, տնտեսությունում հետազոտությունների և վերլուծությունների կատարմանը, ճգնաժամային իրավիճակների հաղթահարման գործիքակազմի տիրապետմանը:

Ծրագրի նպատակը

Ծրագրի նպատակն է պատրաստել հաշվառման և աուդիտի բնագավառի մասնագետներ, որոնք կարող են գրանցել և վերլուծել ֆինանսատնտեսական գործունեության ոլորտին առնչվող տեղեկատվական տվյալները, ձևավորել կազմակերպության հաշվառման քաղաքականությունը, կազմել և վերլստուգել ֆինանսական հաշվետվությունները:

Առավելությունները

Ծրագրի բարեհաջող ավարտին ուսանողն ունակ կլինի ներկայացնելու ֆինանսական, կառավարչական հաշվառման տեսական հիմունքները, սկզբունքները և հիմնախնդիրները, բացատրելու հարկաբյուջետային հարաբերությունների, հարկային, մաքսային վարչարարության նորմատիվ կարգավորման դրույթները, թվարկելու աուդիտորական գործունեության սկզբունքները, ներկայացնելու օրենսդրությունը և աուդիտորական չափանիշները, նկարագրելու և դասակարգելու կազմակերպության ու պետական գործառույթների բյուջետավորման ընթացակարգերը, ներկայացնելու ժամանակակից ֆինանսական ոլորտի գլոբալ և լոկալ հիմնախնդիրները, ձևակերպելու դրամավարկային քաղաքականության, բանկային գործունեության վերլուծության ժամանակակից մոտեցումները, գործնականում կատարելու ֆինանսական, կառավարչական և բանկային հաշվառում, ինչպես նաև միջազգային չափանիշների հիման վրա կազմել ֆինանսական հաշվետվություններ:

Ուսանողը կկարողանա նաև հաշվարկել յուրաքանչյուր հարկատեսակի գծով բյուջե վճարման ենթակա հարկի գումարը և լրացնել հարկային մարմնի կողմից պահանջվող համապատասխան հաշվետվությունների ձևաթղթերը, կազմել աուդիտի ընթացակարգերը, գնահատել աուդիտորական ռիսկը, գնահատել կազմակերպության ֆինանսների կառավարման արդյունավետությունը, պրակտիկ գործունեության ընթացքում կատարել բանկային հատվածի վարկային և ակտիվային այլ գործառույթների իրականացմանն ուղղված աշխատանքներ, կիրառել գիտելիքները պրակտիկայում, ձևակերպել և լուծել խնդիրներ, համեմատել և վերլուծել տարբեր աղբյուրներից հայթայթված տեղեկությունը, ցուցաբերել մասնագիտական հանրության հետ բանավոր և գրավոր հաղորդակցվելու կարողություն, պատրաստել զեկուցումներ, ներկայացնել հետազոտությունների արդյունքները, վարել գիտական բանավեճեր։

Երկրորդ կուրսում ուսանողներն անցնում են 3 շաբաթ տևողությամբ մասնագիտական պրակտիկա գործընկեր կազմակերպություններում և տնտեսության մասնավոր հատվածում։

Կարիերայի հնարավորությունները

Ծրագիրը նախատեսված է պետական և ըստ մասնագիտությունների հավատարմագրված/ինստիտուցիոնալ հավատարմագրում անցած ոչ պետական բարձրագույն ուսումնական հաստատությունների բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտների համար, որոնք ցանկանում են զարգացնել մասնագիտական որակները, ստանալ նոր գիտելիքներ և տիրապետել տնտեսական իրավիճակները գնահատելու և առաջացած խնդիրները հաղթահարելու հմտությունների:

Շրջանավարտը կարող է կրթությունը շարունակել կրթության հաջորդ մակարդակում, հասարակական և հումանիտար գիտությունների ոլորտում:

«Հաշվապահական  հաշվառում և աուդիտ»  ծրագիրն ապահովում  է համապատասխան ակադեմիական բազա այն ուսանողների համար, որոնք մտադիր են իրենց ապագա կարիերան կառուցել բիզնեսի, ֆինանսների, կազմակերպությունների հաշվապահական հաշվառման և աուդիտի ոլորտներում: 

Ծրագրի շրջանավարտները կարող են աշխատանքի անցնել տնտեսության տարբեր ոլորտների ձեռնարկություններում, առևտրային բանկերում, աուդիտորական և խորհրդատվական ընկերություններում, պետական կառավարման և տեղական ինքնակառավարման մարմիններում` զբաղեցնելով հետևյալ պաշտոնները.

Աուդիտորական և խորհրդատվական ընկերություններ

• աուդիտոր,

• ֆինանսական խորհրդատու:

Ձեռնարկություններ

• հաշվապահ,

• ներքին աուդիտոր,

• տնտեսագետ,

• ֆինանսիստ:

Առևտրային բանկեր 

• հաշվապահ,

• ակտիվների և պասիվների կառավարման մասնագետ,

• վարկային մասնագետ:

Պետական կառավարման և տեղական ինքնակառավարման մարմիններ 

• հաշվապահ

• տնտեսագետ, 

• ֆինանսիստ

• տնտեսական նախագծերի մշակման, դրանց արդյունավետության գնահատման և իրականացման վերահսկողության գծով մասնագետ: