Համալսարանում մեկնարկել է «Ապաստանը և մարդու իրավունքները» խորագրով դասընթացը

«Ապաստանը և մարդու իրավունքները» թեմայով առցանց դասընթացի պիլոտային երկրորդ փուլը իրավական ոլորտի մասնագետների համար մարդու իրավունքների կրթության եվրոպական ծրագրի («HELP») մի մասն է կազմում։

Դասընթացին մասնակցում են շուրջ 24 մասնագետներ ՀՀ ՆԳՆ միգրացիայի և քաղաքացիության ծառայությունից, Գլխավոր դատախազությունից, ԱԱԾ քննչական վարչությունից, Սահմանապահ զորքերից, Վերաքննիչ վարչական դատարանից և Վարչական դատարանից, Փաստաբանների պալատից, Մարդու իրավունքների պաշտպանի աշխատակազմից, Հանրային պաշտպանի գրասենյակից, ինչպես նաև ՄԱԿ ՓԳՀ-ից և ոլորտի հասարակական կազմակերպություններից։

«HELP» ինտերակտիվ և մասնակցային դասընթացների նպատակն է Եվրոպայում մարդու իրավունքների վերաբերյալ բարձրորակ կրթության ապահովումը ոլորտի մասնագետների՝ դատավորների, փաստաբանների և դատախազների համար, ինչպես նաև ազգային մակարդակում մարդու իրավունքները պատշաճ ձևով պաշտպանելու հնարավորության ընձեռումը: Այն իրավաբանների ազգային ուսումնական հաստատությունների միակ համաեվրոպական ցանցն է ԵԽ անդամ 46 երկրներում, որն ապահովում է էլեկտրոնային ուսուցման անվճար դասընթացների հարթակ և մարդու իրավունքների ուսուցման մեթոդաբանություն: ՄԱԿ ՓԳՀ տեսանկյունից՝ «HELP» դասընթացը կարևոր և օգտակար է իր գործընկեր պետական կառույցների և ծառայություններ մատուցող կազմակերպությունների համար, քանի որ այն ներառում է ապաստան հայցողներին և փախստականներին վերաբերող կարևորագույն հայեցակետեր։ Դասընթացը նաև ներկայացնում է միջազգային հիմնական չափանիշների, բողոքարկման համապատասխան մեխանիզմների և փոխհատուցման հետ կապված հիմնական հայեցակետերի ընդհանուր պատկերը:

ԵՊՀ եվրոպական ուսումնասիրությունների կենտրոնի փոխտնօրեն Լիլիթ Միրզոյանը, ողջունելով մասնակիցներին, կարևորեց այսօրինակ նախաձեռնությունները և հույս հայտնեց, որ դրանք կլինեն շարունակական։

Հայաստանում ԵԽ «HELP» ծրագրերի համակարգող Արտեմ Հակոբյանը ներկայացրեց «HELP» հարթակը և Հայաստանում առցանց ուսուցման հնարավորություններն իրավաբանների համար: Նա շնորհակալություն հայտնեց ՄԱԿ ՓԳՀ և ԵՊՀ ներկայացուցիչներին ծրագրում ունեցած արժեքավոր ներդրման համար՝ ողջունելով հետագա համագործակցության նկատմամբ երկու կողմերի ցուցաբերած հետաքրքրությունը:

ՄԱԿ ՓԳՀ աշխատակից Սուսաննա Գրիգորյանը, ներկայացնելով «HELP» հարթակը, ընդգծեց դրա կարևորությունն ապաստանի և փախստականների իրավունքների պաշտպանության ոլորտի մասնագետների համար:

Միջոցառման ընթացքում մասնակիցները ծանոթացան «HELP» ծրագրին, ներկայացրին իրենց փորձը, ինչպես նաև մտքեր փոխանակեցին ապաստանի հետ կապված խնդիրների վերաբերյալ ազգային օրենսդրական դաշտի և բարեփոխումների համատեքստում:

«HELP» ազգային դասընթացավար Սերգեյ Ղազինյանը մասնակիցներին ներկայացրեց ծրագրի կայքէջն ու «Ապաստան և մարդու իրավունքներ» առցանց դասընթացը, անդրադարձավ աշխատանքի պլանավորմանն ու գնահատմանը վերաբերող հարցերին, ինչին հաջորդեցին ակտիվ քննարկումներ և հարցուպատասխան:

Նշենք, որ յոթշաբաթյա դասընթացի հաջող ավարտին մասնակիցները կստանան վկայականներ: