Համակարգչային գիտության և ՏՏ ոլորտի զարգացման նոր հեռանկար․կնքվել է համագործակցության հուշագիր

Հուշագրի կնքմամբ կողմերը նպատակ ունեն խթանելու համագործակցությունը պրոֆեսորադասախոսական կազմի, գիտաշխատողների և ուսանողների միջև, ինչպես նաև գործակցային կապեր հաստատելու համակարգչային գիտության և տեղեկատվական տեխնոլոգիաների ոլորտում՝ դասախոսական համակազմի վերապատրաստման, ուսանողների պրակտիկայի կազմակերպման, ուսումնական նյութերի կատարելագործման ու դասավանդման ժամանակակից մեթոդների ներդրման համար։

Համատեղ գործունեության շրջանակում կողմերը գիտահետազոտական, ուսումնական և գործնական աշխատանքներում կիրառելու են հաշվողական, ցանցային ու գրադարանային ռեսուրսները, ինչպես նաև գիտաուսումնական ներուժի ունակությունները։ Բացի դրանից՝ կազմակերպվելու են համատեղ գիտաժողովներ, սեմինարներ, գիտական քննարկումներ և հանդիպումներ։

Համագործակցության արդյունքում ակնկալվում է ստեղծել գիտաուսումնական համատեղ լաբորատորիա, որը կկատարի տեղեկատվական տեխնոլոգիաների ոլորտում գիտահետազոտական և ուսումնամեթոդական աշխատանքներ, այդ թվում՝ ուսանողների պրակտիկայի արդյունավետ կազմակերպման ուղղությամբ։

Հանդիպման ժամանակ կողմերը քննարկեցին հուշագրով սահմանված նպատակների իրագործման համար անհրաժեշտ առաջիկա քայլերը՝ հույս հայտնելով, որ համագործակցությունը կլինի արդյունավետ և կնպաստի երկու կառույցների զարգացմանը։