Համագործակցության համաձայնագիր՝ ի նպաստ գիտակրթական համակարգի զարգացման

Կնքված համաձայնագրի շրջանակում կողմերը ոչ միայն հաստատելու են փոխշահավետ, բազմաբնույթ գործակցային հարաբերություններ, այլև երիտասարդ մասնագետների և ուսանողների համար ստեղծելու են տեսական ու գործնական գիտելիքների ամրապնդման և խորացման հնարավորություններ։

Ըստ համաձայնագրի՝ իրականացվելու են համագործակցային ծրագրեր՝ մի շարք ուղղություններով։ ԵՊՀ ուսանողների փորձնակության կամ ուսնակության ծրագրեր կկազմակերպվեն ԹԻՀԿ-ում, ինչը կօգնի հակակոռուպցիոն գիտելիքների և հմտությունների զարգացմանը:

Նախատեսվում է նաև մասնագիտական առարկաների համատեղ դասավանդում ԹԻՀԿ և ԵՊՀ մասնագետների ներգրավմամբ` նպաստելու հակակոռուպցիոն կրթության որակի բարելավմանը: Համագործակցությունը կընդգրկի ԵՊՀ ուսանողների գիտահետազոտական աշխատանքների համատեղ ղեկավարում, ինչպես նաև ԹԻՀԿ գործունեության ուղղություններին համապատասխան ավարտական, ընթացիկ և գիտահետազոտական աշխատանքների թեմաների համատեղ որոշում: Կանցկացվեն նաև կարողությունների զարգացման դասընթացներ և վերապատրաստումներ, գիտական սեմինարներ, գիտաժողովներ և այլն։ 

Կողմերը հույս հայտնեցին, որ այս համագործակցությունը կդառնա խթան` Հայաստանի բարձրագույն կրթության և գիտության ոլորտում հակակոռուպցիոն կրթության խորացման ու զարգացման համար։ 

Նշենք, որ հանդիպմանը ներկա էին նաև ԵՊՀ զարգացման և նորարարությունների գծով պրոռեկտոր Միքայել Հովհաննիսյանը, շրջանավարտների և կարիերայի կենտրոնի փոխտնօրեն Կարինե Նազարյանը, միջազգային հարաբերությունների ֆակուլտետի դեկան Տիգրան Եփրեմյանը, սոցիոլոգիայի ֆակուլտետի դեկան Արթուր Մկրտիչյանը։