Շանհայի համագործակցության կազմակերպության գործունեությանը նվիրված աշխատաժողով ԵՊՀ-ում

ԵՊՀ ռեկտոր Հովհաննես Հովհաննիսյանն ընդգծեց, որ Շանհայի համագործակցության կազմակերպությունը խոշորագույններից մեկն է աշխարհում, որը կարևոր դերակատարում ու հեղինակություն ունի միջազգային ասպարեզում և պատասխանատու է մակրոտարածաշրջանային համագործակցության ամրապնդման համար՝ առաջ տանելու մշակութային, տնտեսական, քաղաքական արժեքները, որոնք միավորում են կազմակերպության անդամներին: 

ԵՊՀ ռեկտորը մատնանշեց, որ կազմակերպությունը, տնտեսական մեծ կապերին զուգահեռ, ունի կրթամշակութային կապերն ընդլայնելու փորձառություն, այդ թվում՝ ակադեմիական և փորձագիտական համագործակցության շրջանակում։

«Միջազգային ասպարեզում ընդլայնվող կազմակերպությունը, որը տարեցտարի նոր հնարավորություններ է ստեղծում անդամ երկրների միջև համագործակցության համար, բնականաբար մեծ հետաքրքրություն է ներկայացնում տարածաշրջանի երկրների, այդ թվում՝ Հայաստանի համար։ Մենք ուրախ կլինենք նաև ընդլայնելու կապերը Չինաստանի բուհերի հետ՝ փորձի փոխանակման, ուսանողների շարժունության, համատեղ հետազոտական նախագծերի իրագործման, գիտաժողովների անցկացման և այլ հարցերի շուրջ»,- ասաց Հովհաննես Հովհաննիսյանը՝ շեշտելով, որ եվրասիական համալսարանների հետ համագործակցությունը ԵՊՀ առաջնահերթություններից է։

ԵՊՀ ռեկտորը նշեց, որ վերջին տարիներին համալսարանը մեծ տեղ է տալիս չինարենի ուսուցմանը, առկա են նաև բակալավրի ու մագիստրոսական կրթական ծրագրեր։

«Երևանի պետական համալսարանը՝ որպես Հայաստանի խոշորագույն բուհ, մեծապես հետաքրքրված է ՇՄԿ անդամ երկրների հետ ակադեմիական կապերի ամրապնդմամբ»,- եզրափակեց Հովհաննես Հովհաննիսյանը: 

Հայաստանում Չինաստանի գործերի ժամանակավոր հավատարմատար Չեն Մինն ընդգծեց, որ Շանհայի համագործակցության կազմակերպությունը հիմնադրվել է 2001 թ. Չինաստանում՝ Շանհայ քաղաքի անունով։ 

«2024 թ. հուլիսին Չինաստանը ստանձնեց կազմակերպության նախագահությունը, իսկ այս աշնանը պատրաստավում ենք Պեկինի մոտակայքում գտնվող Թիենծին քաղաքում կազմակերպելու ՇՀԿ գագաթնաժողովը»,- ասաց նա։

Չեն Մինը, ընդգծելով, որ 24 տարիների գործունեության ընթացքում կազմակերպությունը շարունակաբար ընդլայնվել է, շեշտեց․ «Սկզբում կազմակերպությունում ընգրկված էր ընդամենը 6, իսկ ներկայում՝ 26 պետություն: ՇՀԿ-ն երկրների միջև խթանում է բազմակողմանի համագործակցությունը մի շարք ոլորտներում, այդ թվում՝ քաղաքականության, անվտանգության, էկոնոմիկայի, հումանիտար օգնության ապահովման և այլն»:

Նա նշեց նաև, որ Հայաստանն ու Չինաստանը վստահելի գործընկերներ են, որոնք համագործակցում են փոխադարձ հարգանքի ու փոխադարձ շահերի հիման վրա, և այդ համագործակցությունը ոչ միայն երկկողմ, այլև միջազգային կազմակերպությունների շրջանակում է, ինչպիսիք են ՇՀԿ-ն և ՄԱԿ-ը։ 

«Հայաստանը մեր վստահելի գործընկերն է ՇՀԿ-ի ամրապնդման և ընդլայնման գործում: 2015 թ. Ուֆայում կայացած ՇՀԿ գագաթնաժողովում Հայաստանին տրվել է երկխոսության գործընկերոջ կարգավիճակ, իսկ 2016 թ. այն պաշտոնապես դարձել է կազմակերպության երկխոսության գործընկերը»,- ասաց նա։

ՀՀ Ազգային ժողովի պատգամավոր Ալեքսեյ Սանդիկովն ընդգծեց, որ ՇՀԿ-ն հաջողությամբ համատեղում է քաղաքականությունը, էկոնոմիկան, անվտանգությունն ու հումանիտար հարցերը, ինչպես նաև ահաբեկչության դեմ պայքարն ու մշակութային փոխառնչությունները՝ միավորելով մասնակից երկրներին։ 

«Հայաստանը մտադիր է ընդլայնելու բազմակողմանի համագործակցությունը և ակտիվորեն մասնակցում է ՇՀԿ աշխատաժողովներին՝ անվտանգության, թվային համակարգերի, էկոնոմիկայի և գիտակրթական ոլորտներում»,- նշեց նա:

Ելույթ ունեցավ նաև ՀՀ արտաքին գործերի նախարարության Ասիայի և խաղաղօվկիանոսյան երկրների վարչության պետ Անահիտ Կարապետյանը՝ ընդգծելով ՇՀԿ-ի հետ Հայաստանի համագործակցության ուղիները: 

Հանդիպման ավարտին ներկաները հարցեր ուղղեցին բանախոսներին: