Հեքիաթային տրամադրություն ԵՊՀ-ում՝ Երեխաների պաշտպանության օրվան ընդառաջ

ԵՊՀ գրադարանի նախաձեռնությամբ անցկացված միջոցառումը նախատեսված էր համալսարանի աշխատակիցների երեխաների համար։ Օրվան յուրահատուկ շունչ հաղորդեց «Հեքիաթերեն» շարժական ինտերակտիվ թատրոնը, որը հանդես եկավ իր նոր բեմադրությամբ՝ «Գազարագույն զատիկի կորած կետիկները»։ Ինտերակտիվ ներկայացումը ոչ միայն զվարճացրեց փոքրիկներին, այլև ներգրավեց նրանց պատմության մեջ՝ առաջարկելով մասնակցել, մտածել, խաղալ ու օգնել գլխավոր հերոսին գտնել կորած կետիկները։

Բեմադրությունից հետո երեխաներին սպասվում էր նաև ստեղծագործական վարպետաց դաս՝ զատիկների նկարազարդման թեմայով։ Մասնակիցները մեծ ոգևորությամբ ձեռնամուխ եղան իրենց սեփական մագնիսների ստեղծմանը, և յուրաքանչյուրն իր ձեռքով պատրաստեց փոքրիկ հուշանվեր՝ գունավոր միջոցառումից որպես հիշողություն տանելով տուն։

ԵՊՀ Սարգիս և Մարի Իզմիրլյանների անվան գրադարանի տնօրեն Ավետիք Մեջլումյանը, կարևորելով նախաձեռնությունը, ընդգծեց տարբեր տարիքային խմբերի համար նախատեսված բազմաբնույթ միջոցառումների կազմակերպման անհրաժեշտությունն ու դրանք պարբերական դարձնելը գրադարանի, գրքի և ընթերցանության հետ կապը սերտացնելու տեսանկյունից․ «Նախատեսում ենք տարբեր տարիքային խմբերի համար առաջարկել տարբեր ծրագրեր։ Օրինակ՝ դպրոցականների համար կազմակերպել շրջայց գրադարանում, հատկապես ավագ դպրոցի աշակերտների համար, որոնք մասնագիտություն ընտրելու կարևոր փուլում են։ Այս այցելությունների շնորհիվ նրանք ոչ միայն կբացահայտեն գրադարանն ու գրքերի աշխարհը, այլ նաև պատկերացում կկազմեն ԵՊՀ-ի հնարավորությունների մասին և կկողմնորոշվեն մասնագիտության ընտրության հարցում»։

Միջոցառման կազմակերպիչ, գրադարանի աշխատակից Աննա Խալաթյանի խոսքով՝ գաղափարն ու նախաձեռնությունը բխել են երեխաների համար կարևոր օրը հիշարժան դարձնելու ցանկությունից. «Նպատակս էր ԵՊՀ աշխատակիցների երեխաների համար կազմակերպել մի միջոցառում, որը նրանց օրը կդարձնի հիշարժան և հատուկ։ Որոշեցինք համագործակցել «Հեքիաթերեն»-ի հետ և ստեղծել մի գունեղ ու տոնական միջավայր։ Նախապես հրավիրատոմսեր և անվանաքարտեր պատրաստեցինք երեխաներին կարևորության զգացողություն փոխանցելու համար»։

Անդրադառնալով ներկայացմանը՝ Ա․ Խալաթյանը նշեց. «Թատրոնի թեման «Հեքիաթերեն»-ի հետ միասին ենք ընտրել՝ հաշվի առնելով, որ մասնակից երեխաները տարբեր տարիքի էին։ Ներկայացումը կառուցվել էր այնպես, որ թե՛ 3, թե՛ 9 տարեկան երեխաները մեծ հաճույքով հետևում էին զարգացումներին։ Բեմը գունեղ էր, իսկ բովանդակությունը՝ գրավիչ ու ուսուցողական»։

Ինչ վերաբերում է վարպետաց դասին, նրա նպատակը ևս հստակ էր. «Ցանկանում էինք, որ երեխաները միջոցառումից տուն վերադառնան ոչ միայն լավ տրամադրությամբ, այլև իրենց ձեռքով պատրաստած մի գեղեցիկ հուշանվերով։ Սա ոչ միայն ուրախություն պարգևեց երեխաներին, այլ նաև զարգացրեց նրանց ստեղծագործական հմտությունները»։

Միջոցառման շրջանակում կարևորվեց նաև գրադարանի հետ ծանոթության հնարավորությունը։

«Մեր երեխաները մեր ապագա ուսանողներն են։ Այսպիսի միջավայր ստեղծելով՝ մենք հնարավորություն ենք տալիս նրանց առաջին քայլերն անելու համալսարան մտնելու ճանապարհին, բացահայտելու ԵՊՀ-ի հնարավորությունները և գրադարանի աշխարհը»,- նշեց Ա․ Խալաթյանը։