Գլխավոր դատախազության վարչական շենքում բացվեց ԵՊՀ իրավաբանական լաբորատորիա

ԵՊՀ ռեկտոր Հովհաննես Հովհաննիսյանը, շնորհակալություն հայտնելով համագործակցության և ԵՊՀ ուսանողներին նման հնարավորություն ընձեռելու համար, նշեց, որ միայն տեսական և պրակտիկ գիտելիքի համադրումը կարող է արդյունք տալ։

«Տարբեր մասնագիտությունների գծով փորձում ենք ունենալ նման հարթակներ, ուսանողների արտադրական պրակտիկան կազմակերպել տարբեր հաստատություններում, այդ թվում՝ դատախազությունում։ Մեր շատ ուսանողներ պրակտիկա են անցնում պետական մարմիններում, բայց սա բոլորովին այլ մոտեցում է, երբ ԵՊՀ կառուցվածքային ստորաբաժանումը հենց ՀՀ գլխավոր դատախազությունում է, և ուսանողները հնարավորություն են ունենալու շփվելու դատախազների հետ»,- ընդգծեց ԵՊՀ ռեկտորը:

Աննա Վարդապետյանը, շնորհավորելով ներկաներին ՀՀ գլխավոր դատախազությունում Իրավաբանական լաբորատորիա բացելու կապակցությամբ, ընդգծեց, որ այն տեսական գիտելիքի և պրակտիկ աշխատանքի «հանդիպման վայր» է, ոչ ֆորմալ կրթության հարթակ, որտեղ նախատեսվում է կազմակերպել իրավական արդի հարցերի քննարկումներ, գործնական աշխատանքներ, սեմինարներ ու գիտաժողովներ, իրականացնել իրավական խնդիրների հետազոտություններ: 

«Մենք ստեղծել ենք մի հարթակ, որտեղ հատկապես բարձր կուրսերի ուսանողները, որոնք արդեն որոշակի գիտելիք ունեն, կկարողանան իրենց տեսական գիտելիքները կատարելագործել, շփվել դատախազների հետ, մասնակցել վարպետաց դասերի: Դատախազությունը ձգտում է իր դռները բացել լավագույնների համար: Մենք մեկ չափանիշ ունենք՝ ընտրել լավագույններին, ընտրել բարեվարքներին»,- նշեց հանրապետության գլխավոր դատախազը:

«Հայ իրավաբանական միություն» կազմակերպության ներկայացուցիչ Քրիս Պարնագիանն էլ շեշտեց, որ միությունը հպարտ է համագործակցության և նախագծի իրականացմանն աջակցելու համար։ Նրա խոսքով՝ իրավական ոլորտի բազմաթիվ տաղանդավոր փաստաբաններ կան, որոնք կարող են համագործակցել ուսանողների հետ։ 

Լաբորատորիայի շրջանակում նախատեսվում է նաև սփյուռքում գործունեություն ծավալող հայազգի իրավաբանների հետ կազմակերպել փորձի փոխանակում:

Հավելենք, որ Իրավաբանական լաբորատորիայի ձևավորման հիմքը Երևանի պետական համալսարանի հոգաբարձուների խորհրդի 2024 թվականի դեկտեմբերի 25-ի որոշումն է, ինչպես նաև «Երևանի պետական համալսարան» հիմնադրամի, ՀՀ գլխավոր դատախազության և «Հայ իրավաբանական միություն» կազմակերպության միջև 2024 թվականի օգոստոսի 28-ին ստորագրված մտադրությունների վերաբերյալ հայտարարությունը: