Իտալերենի շաբաթն այս տարի կանցնի «Իտալախոս աշխարհ. լեզու առանց սահմանների» խորագրի ներքո

Իտալերենի շաբաթը յուրաքանչյուր տարի անցկացվում է որևէ խորագրի ներքո: Այս տարվա «Իտալախոս աշխարհ. լեզու առանց սահմանների» խորագիրը հնարավորություն է ընձեռում շեշտադրելու իտալերենի լեզվական, մշակութային, պատմական ասպեկտները, ինչպես նաև իտալերենի ստեղծագործական ուժն իր բազմազան դրսևորումներով:

Եվրոպական լեզուների և հաղորդակցության ֆակուլտետի դեկան Գևորգ Բարսեղյանն ընդգծեց, որ թեպետ Իտալիան շատ մեծ երկիր չէ, այնուամենայնիվ վայելում է այնպիսի հեղինակություն, որ անհնարին է դարձնում այդ լեզուն չնկատելը. «Իտալիան ոճ թելադրող երկիր է թե՛ նորաձևության ու արվեստի բնագավառում, թե՛ սպորտում: Կարծում եմ՝ կհամաձայնեք ինձ հետ, որ այն ամենը, ինչ նորաձև է, գեղեցիկ, հետաքրքիր ու ինքնատիպ, իտալական է համարվում: Շատ ուրախ եմ, որ հայ-իտալական հարաբերությունները բարձր մակարդակի վրա են, և դա ամենևին էլ զարմանալի չէ, քանի որ մենք՝ հայերս, նման ենք իտալացիներին շատ առումներով»:

ԵԼՀ ֆակուլտետի դեկանն ընդգծեց նաև, որ ֆակուլտետում ուսանողներն իտալերեն սովորում են մեծ ոգևորությամբ, իսկ դասավանդումը նրանց համար ապահովում է լեզվի իմացության բարձր մակարդակ: Նա իտալերենի դասավանդման, մշակույթի տարածման տեսանկյունից կարևորեց նաև մշտական սերտ համագործակցությունը Հայաստանում Իտալիայի Հանրապետության դեսպանատան հետ: 

Հայաստանում Իտալիայի արտակարգ և լիազոր դեսպան Ալեսսանդրո Ֆերրանտին նշեց, որ անչափ ոգևորված է միջոցառմանը բազմաթիվ ուսանողների ներկայությունից։

«Սա վկայում է Հայաստանում իտալերենի հանդեպ օրեցօր աճող հետաքրքրության մասին։ Իտալերենն ամփոփում է հումանիզմի արժեքներ՝ լինելով միաժամանակ պարզ և հարուստ լեզու, արտահայտելով համամարդկային գաղափարների ամբողջություն։ Իտալերենը ստեղծարարության, արվեստի, մշակույթի, երաժշտության, գրականության շարժիչ ուժն է եղել բոլոր ժամանակներում և մինչ օրս շարունակում է լինել այդպիսին»,- ասաց դեսպանն ու ընդգծեց, որ իտալերենը հին, բայց միաժամանակ դինամիկ, փոփոխվող լեզու է։

Դեսպանը հիշատակեց նաև, որ Երկրորդ համաշխարհային պատերազմի տարիներից հետո Իտալիան տնտեսական և արդյունաբերական մեծ զարգացում ապրեց՝ խթանելով նաև լեզվի զարգացումը. «Իտալերենով խոսում են աշխարհի բազմաթիվ երկրներում, չնայած Իտալիան պատմական ոչ մի ժամանակաշրջանում չի որդեգրել գաղութացման քաղաքականությունը։ Չմոռանանք, որ վերջին երկու դարաշրջանում բազմաթիվ իտալացիներ արտագաղթեցին, բայց, այնուամենայնիվ, պահպանեցին իրենց ինքնությունը հենց լեզվի և մշակույթի միջոցով»։

Նա շեշտեց, որ Իտալիան հայտնի է ամբողջ աշխարհում իր հազարամյա պատմությամբ, մշակութային ժառանգությամբ և ավանդույթներով․ ուսանողները, յուրացնելով իտալերենը, հնարավորություն կունենան ընդլայնելու ոչ միայն իրենց մտահորիզոնը, այլ նաև հնարավորությունները ժամանակակից աշխարհի աշխատաշուկայում։

Ռոմանական բանասիրության ամբիոնի վարիչ Հասմիկ Բաղդասարյանը նշեց, որ իտալերենն իր ուրույն տեղն ունի ԵՊՀ-ում դասավանդվող լեզուների շարքում. «ԵՊՀ-ում իտալերենի դասավանդումը մեկնարկել է դեռևս անցյալ դարի 60-ական թվականներից, և այս տարիների ընթացքում ձևավորվել են դասավանդման հարուստ ավանդույթներ: Նկատի ունենալով մեր ժողովուրդների դարավոր բարեկամությունը՝ ուզում եմ առանձնահատուկ նշել, որ այս լեզուն մեզ համար ունի պատմամշակութային արժեք: Մշտապես մեր ուշադրության կենտրոնում է իտալերենի կրթական ծրագրերի կատարելագործումը՝ հաշվի առնելով նաև մեր իրականության մեջ տեղի ունեցող դինամիկ փոփոխությունները»: 

Հասմիկ Բաղդասարյանը հավելեց նաև, որ ԵՊՀ-ում իրագործվում է «Անգլերեն, իտալերեն և հաղորդակցություն» բակալավրի կրթական ծրագիրը, որը, լինելով արդիական, միջգիտակարգային և մրցունակ, ամբողջովին համահունչ է աշխատաշուկայի պահանջներին:

Միջոցառման շրջանակում ուսանողները խոսեցին ԵՊՀ-ում իտալերենի դասավանդման պատմության և հեռանկարների մասին, բեմադրեցին թատերական փոքրիկ ներկայացում, ինչպես նաև ներկայացրին իտալացի բանաստեղծների ստեղծագործություններ, հանդես եկան երաժշտական կատարումներով: 

Նշենք, որ «Իտալերենի շաբաթ» միջոցառման շրջանակում իտալերեն ուսումնասիրող ուսանողների համար դասախոսություն կկարդա Պերուջայի՝ օտարերկրացիների համար համալսարանի դասախոս, դոկտոր Բորբալա Սամուն՝ «Իտալական ուսումնասիրություններ պատմության, լեզուների և ժամանակակից երաժշտական մշակույթի սահմաններից այն կողմ» թեմայով: Կկազմակերպվի նաև դասախոսների վերապատրաստման դասընթաց, որը կանցկացնեն Վենետիկի Կա Ֆոսկարի համալսարանի դասախոսներ, դոկտոր Գրացիանո Սեռաջոտոն և դոկտոր Կամիլիա Սպալիվիերոն:

Հարկ է ընդգծել, որ վերջերս Իտալիայի ԱԳՆ-ն և ՀՀ-ում Իտալիայի դեսպանատունը ԵՊՀ ռոմանական բանասիրության ամբիոնին են նվիրել իտալերենի դասավանդմանն առնչվող շուրջ 40 մասնագիտական գիրք: 

«Իտալերենի շաբաթ» միջոցառման կազմակերպման մեջ մեծ ներդրում ունի նաև Իտալիայի ԱԳՆ-ից գործուղված դասախոս Օռնելա Չիրիլոն, որն արդեն երկրորդ տարին է, ինչ դասավանդում է ԵՊՀ-ում: