Համագործակցության ընդլայնում շվեյցարական համալսարանների հետ. «SAUL» միջազգային նոր նախագիծ

«Շվեյցարա-հայկական համալսարանական կապ» («SAUL») միջազգային նոր նախագիծը միտված է խթանելու երկարաժամկետ համագործակցություն Արևելյան Եվրոպայի, Ռուսաստանի և հետսովետական ուսումնասիրությունների ոլորտներում, հատկապես սոցիալական և հումանիտար գիտությունների ուղղություններով։ Հիմնական նպատակն է ձևավորել համալսարանների կայուն համագործակցության ցանց համատեղ ջանքերով կազմակերպված գիտաժողովների, շարժունության ծրագրերի և ամառային դպրոցների միջոցով։

Տարածաշրջանային քաղաքականությամբ հետաքրքրված ԵՊՀ և ՀԱՀ երկու դասախոսներ կմասնակցեն նախագծին: Վերջինիս շրջանակում կկազմակերպվեն այցելություններ շվեյցարական համալսարաններ, կանցկացվեն դասախոսություններ, հանրային ելույթներ, կհաստատվեն նոր գործընկերային կապեր։ Շվեյցարական և հայկական համալսարանների ջանքերով հաջորդ ամռանը ԵՊՀ և ՀԱՀ ուսանողները հնարավորություն կունենան շվեյցարացի ուսանողների հետ մասնակցելու ամառային դպրոցի: 

Նախագծի շվեյցարական կողմի համակարգողն է Ֆրիբուրգի համալսարանի պրոֆեսոր Անսգար Յոդիկեն։ Հայկական կողմի համակարգումը վստահված է ԵՊՀ պրոֆեսոր Ալեքսանդր Աղաջանյանին և Հայաստանի ամերիկյան համալսարանի պրոֆեսոր Վահրամ Տեր-Մաթևոսյանին։

Երկու երկրների հետազոտությունների և բարձրագույն կրթության համար այս համագործակցության նպաստավոր ազդեցությանն անդրադառնալով՝ Ալեքսանդր Աղաջանյանը նշեց. «Միջազգային նախաձեռնություններին մասնակցելու, փորձի փոխանակման և համագործակցային միջավայրում աշխատելու տեսանկյունից այս ծրագիրը նոր հնարավորություններ կստեղծի ինչպես մեր դասախոսների և հետազոտողների, այնպես էլ ուսանողների համար»։ 

«SAUL» նախագիծի կարևոր գործոններից առաջնային է հայկական և շվեյցարական համալսարանների միջև երկարաժամկետ և արդյունավետ համագործակցության հեռանկարը։ Նախագծի գլխավոր նպատակն է Հայաստանի առաջատար համալսարանները՝ ԵՊՀ-ն և ՀԱՀ-ն, դարձնել ակադեմիական հարթակներ, որտեղ Շվեյցարիայի՝ Կովկասով, Ռուսաստանով և Եվրասիայով հետաքրքրված պրոֆեսորները կհամագործակցեն հայ մասնագետների հետ՝ արդյունքում հարստացնելով իրենց ոլորտային գիտելիքն ու փորձը։

Ուկրաինայում պատերազմ սկսվելուց ի վեր՝ շվեյցարացի բազմաթիվ գիտնականներ և հետազոտողներ ռուսական և ուկրաինական քաղաքականությունների ու հասարակությունների վերաբերյալ ուսումնասիրություններ կատարելիս բախվեցին դժվարությունների։ Այս համատեքստում հայ գործընկերների արդիական փորձն ու գիտելիքները համագործակցության նոր հնարավորություններ են ընձեռում։ Միևնույն ժամանակ հայ ուսանողների և գիտնականների համար հնարավորություն կստեղծվի շվեյցարացի մասնագետների հետ իրագործելու համատեղ նախագծեր։

«SAUL» նախագիծը ֆինանսավորում է շվեյցարական «MOVETIA» հիմնադրամը: Նախագիծը կտևի երկու տարի՝ 2025 թվականի նոյեմբերից մինչև 2027 թվականի հոկտեմբեր։