ԵՊՀ գիտական խորհուրդն ընտրեց Քիմիայի ֆակուլտետի դեկան

Նիստի օրակարգերը հաստատելուց հետո ԵՊՀ քիմիայի ֆակուլտետի դեկանի ժամանակավոր պաշտոնակատար Արմեն Գալստյանը ներկայացրեց ֆակուլտետի՝ առաջիկա հինգ տարիների զարգացման իր տեսլականը՝ ընդգծելով կրթության բարձր որակի ապահովումը, տարբեր ծրագրերի միջոցով բարձր վարկանիշային միավորներով դիմորդների ներգրավումը, մրցունակ և պահանջված մասնագետների պատրաստումը տեղական ու միջազգային մակարդակներում, ինչպես նաև կրթական ծրագրերի միջազգային ճանաչումն ու հավատարմագրումը՝ որպես որակի երաշխիք։

Ելույթից հետո Արմեն Գալստյանը պատասխանեց ԵՊՀ գիտական խորհրդի անդամների հարցերին՝ ներկայացնելով պարզաբանումներ և հավելյալ մեկնաբանություններ ֆակուլտետի զարգացմանն առնչվող առանցքային ուղղությունների վերաբերյալ։

Այնուհետև քննարկվեց ԵՊՀ Իջևանի մասնաճյուղի ընդհանուր տնտեսագիտության ամբիոնի ասիստենտ Արթուր Մուրադյանին դոցենտի գիտական կոչում շնորհելու հարցը։

Քիմիայի ֆակուլտետի դեկանի ընտրության և գիտական կոչում շնորհելու մասին որոշում ընդունելու համար կազմվեց հաշվիչ հանձնաժողով, հայտարարվեց փակ գաղտնի քվեարկություն։ Քվեարկության արդյունքների համաձայն՝ Արմեն Գալստյանը ընտրվեց (մասնակցել է ԳԽ 74 անդամ՝ ձայների հետևյալ բաշխմամբ․ կողմ՝ 57, դեմ՝ 15, անվավեր՝ 2) Քիմիայի ֆակուլտետի դեկան, իսկ Արթուր Մուրադյանը ստացավ (մասնակցել է ԳԽ 74 անդամ՝ ձայների հետևյալ բաշխմամբ․ կողմ՝ 70, դեմ՝ 4) դոցենտի գիտական կոչում։ 

Օրակարգային հաջորդ հարցի շրջանակում ԵՊՀ իրավաբանական ծառայության պետ Արմեն Թադևոսյանը խոսեց «Երևանի պետական համալսարան» հիմնադրամի ամբիոնի վարիչի ընտրության ընթացակարգում փոփոխություններ նախատեսող նախագծի մասին՝ ներկայացնելով դրա հիմնական դրույթներն ու առաջարկվող նորությունները, ինչպես նաև ֆակուլտետների կողմից ներկայացված առաջարկները։ Տարբեր առաջարկներից ու քննարկումներից հետո նախագիծը հաստատվեց ԳԽ-ի կողմից։

Նիստի ընթացքում բավարարվեց նաև ԵՊՀ գիտական խորհրդին կից էթիկայի մշտական հանձնաժողովի կազմում փոփոխություններ կատարելու մասին առաջարկը։

ԵՊՀ ֆինանսական վերլուծությունների վարչության պետ Տիգրան Գալստյանը ԳԽ անդամներին ներկայացրեց 2026 թ. համախմբված եկամուտների և ծախսերի նախահաշիվը։ Երևանի պետական համալսարանի՝ 2026 թվականի ֆինանսական տարվա եկամուտների և ծախսերի նախահաշիվը կազմվել է համալսարանի ֆինանսատնտեսական գործունեության կայունության, կանխատեսելիության և արդյունավետ կառավարման ապահովման նպատակով՝ հիմք ընդունելով բյուջետավորման և ֆինանսական կառավարման ընդունված միջազգային և ազգային լավագույն փորձը: Նախահաշիվը միտված է ապահովելու համալսարանի հիմնական կրթական, գիտական և վարչական գործառույթների անխափան իրականացումը՝ միաժամանակ պահպանելով ֆինանսական կարգապահությունը և ռեսուրսների պատասխանատու օգտագործումը:

Նա նշեց, որ ծախսերի նախահաշվով՝ 2026 թվականի համար նախատեսվում է տեղակալման կարգով սահմանված երկարաժամկետ 5 տարվա պայմանագիր ունեցող պրոֆեսորադասախոսական համակազմի աշխատակիցների աշխատավարձի բարձրացում՝ շուրջ 30 %-ով։

Ներկայացնելով ԵՊՀ Իջևանի մասնաճյուղի հաշվետվությունը 2024-2025 ուստարվա գործունեության մասին՝ ԵՊՀ ԻՄ տնօրեն Մհեր Օթարյանը նշեց, որ հաշվետու ժամանակաշրջանում ԻՄ-ն առաջնորդվել է զարգացման 2025-2030 թթ. գործողությունների պլանով և մայր բուհի հատուկ աջակցությամբ ու իր ստորաբաժանումների միջոցով 2025 թ. հետևողականորեն իրականացրել է համալսարանի և մատուցվող ծառայությունների արդիականացմանը, ենթակառուցվածքների տեխնիկական վերազինմանը, ուսումնական և աշխատանքային բարելավված միջավայրի ստեղծմանն ու ապահովմանը, կրթական ծրագրերի արդյունավետ իրականացմանը, գիտահետազոտական գործունեության ակտիվացմանը, կադրային համակարգի զարգացմանն ուղղված գործընթացներ։

Խոսելով ենթակառուցվածքների, պայմանների, ռեսուրսների մասին՝ Մհեր Օթարյանն ասաց, որ 2025 թ. ԵՊՀ Իջևանի մասնաճյուղի պատմության մեջ ամենալայնածավալ ծրագրերի իրականացման, ենթակառուցվածքների արդիականացման, վերանորոգման և հիմնանորոգման աշխատանքների տարի է եղել, և հավելեց, որ նախատեսվում է հիմնովին վերանորոգել Բնական գիտությունների և Կիրառական արվեստի ֆակուլտետների բոլոր լսարանները, ստեղծել օդափոխության համակարգ և այլն։

Օրակարգային վերջին հարցի շրջանակում ԵՊՀ ՈՒԳԸ նախագահ Սիրանուշ Բաղումյանը ներկայացրեց ՈՒԳԸ 2024-2025 ուսումնական տարվա գործունեության հաշվետվությունը։ Նա նշեց, որ հաշվետու ժամանակաշրջանում կազմակերպվել է 998 միջոցառում, այդ թվում՝ գիտաժողովներ, աշխատաժողովներ, դասընթացներ, օլիպիադաներ և այլն։ Ս․ Բաղումյանը խոսեց Հոդվածագրության դպրոցի, ՈՒԳԸ ամառային դպրոցի, իրականացրած այլ ծրագրերի և համագործակցությունների մասին։ 

Նշենք, որ ԳԽ հերթական նիստի արդյունքում հաստատվեցին ԵՊՀ գիտական խորհրդի անդամների ներկայացրած բոլոր հաշվետվությունները։

Տարեվերջյան վերջին նիստի ավարտին ԵՊՀ ռեկտոր Հովհաննես Հովհաննիսյանը շնորհակալություն հայտնեց գործընկերներին տարվա ընթացքում կատարած համատեղ աշխատանքի համար՝ ընդգծելով, որ անցնող տարում համալսարանը գրանցել է կարևոր ձեռքբերումներ թե՛ գիտական, թե՛ այլ ուղղություններով։ Նրա խոսքով՝ դրական միտումները շարունակական են, սակայն միաժամանակ առկա են նաև մի շարք խնդիրներ և մարտահրավերներ, որոնց ուղղությամբ դեռ բազմաթիվ անելիքներ կան։ Եզրափակելով խոսքը՝ նա վստահեցրեց, որ համատեղ և միասնական աշխատանքի շնորհիվ համալսարանը շարունակելու է զարգանալ և կատարելագործվել։