Գաղափարի առևտրայնացում. ԵՊՀ-ում ամփոփվեցին «Mini MBA» հինգշաբաթյա ծրագրի արդյունքները

Հովհաննես Հովհաննիսյանը ողջույնի խոսքում նշեց, որ Երևանի պետական համալսարանի առաջարկած «Mini MBA» ծրագիրն իր տեսակի մեջ եզակի է և նոր խոսք կրթական իրականության մեջ: Ըստ ԵՊՀ ռեկտորի՝ վերջին շրջանում Բիզնես ինկուբատորը զգալի հաջողություններ է արձանագրել ոլորտում, ինչի վառ ապացույցներից մեկն էլ այս ծրագիրն է:

ՀՀ ԱԺ փոխնախագահ Հակոբ Արշակյանը, ողջունելով ծրագրի մասնակիցներին, կարևորեց նրա և՛ գաղափարական, և՛ գործնական կողմը, այն է՝ գիտության և արտադրության փոխկապակցումով առաջընթացի և զարգացման ապահովում: Առևտրայնացնելով և աշխատաշուկայում իրացնելով ակադեմիական հետազոտությունները՝ կվերականգնվի ձեռներեցության և գիտության՝ անկախությունից ի վեր ցավալիորեն խզված կապը: Նմանօրինակ ծրագրերը մեծապես կաջակցեն գիտաարտադրական մեխանիզմների վերականգնմանը, ուստի ԵՊՀ բիզնես ինկուբատորի «Mini MBA» ծրագիրն առաջին հաջող փորձն է խոստումնալից գաղափարները հաջողակ բիզնեսների վերածելու տեսանկյունից:

ԵՊՀ բիզնես ինկուբատորի ղեկավար, տնտեսագիտության և կառավարման ֆակուլտետի տնտեսագիտության մեջ մաթեմատիկական մոդելավորման ամբիոնի պրոֆեսոր Ռուբեն Գևորգյանը, ներկայացնելով «Mini MBA»-ի առաջնահերթությունները, նշեց ծրագրի 3 գլխավոր նպատակները՝ կրթական, հետազոտական, համագործակցային:

ԵՊՀ բիզնես ինկուբատորի նախաձեռնությամբ ընթացիկ ուստարվա հոկտեմբեր-նոյեմբեր ամիսներին հաջողությամբ անցկացված «Mini MBA» հինգշաբաթյա ծրագիրը գաղափարը շահույթի մշտական աղբյուրի վերածելու նվազագույն ուժեղ փաթեթ է: Այն հիանալի հնարավորություն է հատկապես այն գիտնականների համար, որոնք, շարունակելով գիտությամբ զբաղվել, ցանկանում են իրենց գիտելիքն ու գաղափարները վերածել իրականության:

Ծրագրին մասնակցել են ուսանողներ, ասպիրանտներ, շրջանավարտներ, դասախոսներ՝ ստանալով բիզնեսի վերաբերյալ հիմնարար գիտելիքներ, առաջնորդության, ռազմավարական մտածողության և ներկայացման հմտություններ, որոնք ժամանակակից տեխնոլոգիական և նորարարական միջավայրերում հաջողության հասնելու անհրաժեշտ գրավականն են: 

Քառասուն դիմումատուներից նախ ընտրվել են քսան, ապա՝ տասներկու լավագույն մասնակիցներ: Վերջիններս ծրագրի ավարտին ստացան մասնակցության հավաստագրեր, փորձագիտական մենթորության հնարավորություն, իսկ լավագույն չորսը՝ Գևորգ Շահխաթունին, Լիանա Խաչատրյանը, Լուսինե Ալոյանը, Նարեկ Հարությունյանը, արժանացան նաև դրամական պարգևի: