Նոր հնարավորություն օտարերկրյա ուսանողների համար․ ԵՊՀ-ում մեկնարկել է միջազգային ծրագիր

ԵՊՀ-ի հետ ունեցած համագործակցության, ծրագրի բովանդակության բացառիկության և ապագայի ծրագրերի մասին զրուցել ենք Հայաստանում ամերիկյան խորհուրդների գրասենյակի փոխտնօրեն Նանե Աբրահամյանի հետ։

- Տիկի՛ն Աբրահամյան, ինչպե՞ս է ստեղծվել ծրագիրը։ 

- 2025 թ․ ամռանը նախաձեռնվել է «RLASP Area Studies» ծրագրի մշակումը Ամերիկյան խորհուրդների գրասենյակի և ԵՊՀ միջազգային համագործակցության վարչության համատեղ ջանքերով։ Ծրագիրն արագորեն կյանքի է կոչվել հենց նույն տարվա աշնանը։

Ամերիկյան խորհուրդների գրասենյակը հաջողությամբ գործակցում է ԵՊՀ-ի հետ դեռ 2000-ականներից։ ԵՊՀ դասախոսները, ուսանողները մասնակցում են Ամերիկյան խորհուրդների երևանյան գրասենյակի կողմից իրականացվող կրթական, հետազոտական և գիտական փոխանակման տարբեր ծրագրերի։ Իսկ 2024 թ․ հուլիսին արդեն կողմերի միջև ստորագրվել է համագործակցության հուշագիր։ 

- Ո՞րն էր այս ծրագրի ստեղծման շարժառիթն ու հիմնական գաղափարը հատկապես անգլիախոս ուսանողների համար։ 

- Ծրագրի ստեղծման հիմնական գաղափարն է ներկայացնել Հարավային Կովկասը՝ որպես պատմականորեն հարուստ, բայց և ժամանակակից մարտահրավերներով լի տարածաշրջան՝ օգնելով հատկապես անգլիախոս ուսանողներին խորապես հասկանալու սոցիալական, կրոնական և աշխարհաքաղաքական այն գործոնները, որոնք միաժամանակ և՛ միավորում, և՛ բաժանում են տարածաշրջանի երկրները։

Ծրագիրը նպատակ ունի համատեղելու ակադեմիական ուսումնառությունը և իրական միջավայրում փորձառությունը՝ Երևանում ապրելու, տեղական ընտանիքներում հյուրընկալվելու և համալսարանական միջավայրում ներգրավվելու միջոցով։

Շարժառիթներից կարևորագույնը անգլիախոս ուսանողների համար հասանելի և բազմակողմանի կրթական հարթակ ստեղծելն է, որտեղ նրանք հնարավորություն կունենան ուսումնասիրելու տարածաշրջանի պատմական, քաղաքական և տնտեսական գործընթացները անգլերեն դասընթացների միջոցով՝ միաժամանակ սովորելով ռուսերեն (առանց նախնական գիտելիքի պահանջի)։ Ծրագիրը նաև նպատակ ունի զարգացնելու քննադատական մտածողություն՝ ուսումնասիրելով հակամարտությունների պատճառներն ու կայուն խաղաղության հնարավոր հիմքերը Հայաստանի, Ադրբեջանի և Վրաստանի օրինակներով, և այդ ամենը կապել միջազգային հարաբերությունների, քաղաքագիտության և պատմության ակադեմիական դաշտերի հետ։

- Ինչպե՞ս եք գնահատում այս ծրագրի նշանակությունը անգլիախոս միջավայրում Հայաստանի և տարածաշրջանի վերաբերյալ գիտելիքի տարածման գործում։ 

- Ծրագիրը իր տեսակի մեջ առաջինն է տարածաշրջանում, որ մշակվել է ԵՊՀ-ի և Ամերիկյան խորհուրդների գրասենյակի համատեղ նախաձեռնությամբ, և եզակի հնարավորություն է խթանելու անգլերենով դասավանդվող տարածաշրջանային ուսումնասիրությունները Երևանում՝ ԱՄՆ-ի և միջազգային բարձրագույն ուսումնական հաստատությունների ուսանողների համար։

Ծրագրի նշանակությունը Հայաստանի և ողջ Հարավային Կովկասի վերաբերյալ անգլիախոս միջավայրում գիտելիքի տարածման տեսանկյունից կարելի է գնահատել որպես ռազմավարական և երկարաժամկետ ազդեցություն ունեցող նախաձեռնություն։ Կարծում եմ՝ ձևավորվող այդ գիտելիքը կտարածվի միջազգային ակադեմիական միջավայրում՝ ավելի ճշգրիտ, տեղեկացված և երկարաժամկետ ազդեցությամբ։

- Միջազգային ի՞նչ լսարան է թիրախավորում ծրագիրը, և ինչո՞վ է այն գրավիչ օտարերկրյա ուսանողների համար։

- Ծրագրի թիրախում են ԱՄՆ-ի և այլ երկրների բակալավրիատի ու մագիստրատուրայի անգլիախոս ուսանողները, որոնք հետաքրքրված են միջազգային հարաբերություններով, տարածաշրջանային ուսումնասիրություններով և հետխորհրդային տարածքով։ Այն գրավիչ է օտարերկրյա ուսանողների համար անգլերենով դասավանդվող ակադեմիական բովանդակությամբ, ինչի համար ուսանողները ստանում են ԱՄՆ բուհերի համապատասխան կրեդիտներ, տեղական ընտանիքներում ապրելու փորձի և Հայաստանի ու տարածաշրջանի սոցիալ-քաղաքական իրականությանը անմիջականորեն ծանոթանալու բացառիկ հնարավորության շնորհիվ։

- Ամերիկյան խորհրդի և ԵՊՀ-ի համագործակցության ի՞նչ հեռանկարներ ու ծրագրեր կան։

- Լիահույս ենք, որ սա ավելի լայն համագործակցության և ԵՊՀ-ի հետ համատեղ Հայաստանում հիմնավոր այլ ծրագրեր սկսելու սկիզբն է։