ԵՊՀ-ում հյուրընկալվեց Հայաստանում ԱՄՆ գործերի ժամանակավոր հավատարմատար Դեյվիդ Ալենը. ուրվագծվեցին ընթացիկ և հետագա համագործակցության հեռանկարներ

Ռեկտորը ԱՄՆ գործերի ժամանակավոր հավատարմատարին ներկայացրեց համալսարանի ընթացիկ բարեփոխումները, գործող կրթական ծրագրերը, գիտական ներուժը և համագործակցության հնարավոր բնագավառները, որոնք կօժանդակեն գործընկերային կապերի խորացմանը:

Գիտակրթական նախաձեռնությունների իրագործման, ինչպես նաև այդ նպատակին ուղղված գործնական քայլերն ի կատար ածելու տեսանկյուններից՝ ռեկտոր Հովհաննես Հովհաննիսյանը հույս հայտնեց, որ երկու երկրների միջբուհական շփումներն այս համատեքստում համապատասխան ծրագրերով կկանոնակարգվեն և առավել համակարգային բնույթ կստանան:

Ռեկտոր Հ. Հովհաննիսյանը ընդգծեց նաև, որ միջազգային համագործակցության շրջանակում փոխշահավետ ծրագրեր են իրականացվել ԱՄՆ Սան Խոսեի պետական, Արիզոնայի պետական, Բերկլիի, Ջորջթաունի համալսարանների և մի շարք այլ բուհերի հետ: Ռեկտորն անհրաժեշտաբար անդրադարձավ հայկական սփյուռքի հետ համագործակցությանը՝ առանձնացնելով մասնավորապես «ԵՊՀ բարեկամներ» հիմնադրամի նախաձեռնությունը, այն է՝ համախմբել տարբեր ոլորտներում գործունեություն ծավալող ամերիկահայ մասնագետներին և աջակցել Երևանի պետական համալսարանում իրականացվող կրթահետազոտական, ենթակառուցվածքային (օրինակ՝ «ԵՊՀ բիզնես ինկուբատոր») ծրագրերին: Այս նպատակով ընդլայնվել է համագործակցությունը նաև «Իզմիրլյան» բարեգործական հիմնադրամի, Վարդանանց ասպետների միության, Կալիֆոռնիայի հայ արհեստագետների միության, Հայ կրթական հիմնադրամի (ԱՄՆ) հետ:

Միջազգային կապերի, զարգացման և նորարարությունների գծով պրոռեկտոր Միքայել Հովհաննիսյանը նշեց, որ ԵՊՀ ջանքերն ուղղված են գործընկեր հաստատությունների հետ ինչպես արհեստական բանականության ոլորտի գործակցությունների, այնպես էլ ուսումնահետազոտական գործընթացների խթանմանը:

ԵՊՀ միջազգային համագործակցության վարչության պետ Ալեքսանդր Մարգարովը նշեց՝ ներկայում ՀՀ ԿԳՄՍ նախարարությունը մեծ կարևորություն է տալիս համալսարանների միջազգայնացմանն ուղղված քայլերին։

«Մենք ակնկալում ենք, որ շուտով կունենանք նոր կանոնակարգեր կրկնակի դիպլոմով ծրագրերի համար, ինչը կխթանի նման ծրագրերի արդյունավետ իրականացումը։ Բացի գործընկեր համալսարանների հետ համագործակցությունից և օտարերկրյա ուսանողների համար բուհի գրավչությունը բարձրացնելուց՝ այդ նպատակով ձեռնարկում ենք այլ միջոցառումներ ևս միջազգայնացման ասպարեզում։ Ահավասիկ՝ վերջին 24 տարիների ընթացքում մի շարք ամերիկացի ուսանողներ ամերիկյան խորհուրդների միջոցով մեկ կիսամյակ ուսումնառել են ԵՊՀ-ում. նրանց մեծամասնությունը՝ մոտ 98%-ը, ոչ թե ամերիկահայեր, այլ հենց ամերիկացիներ են»,- ընդգծեց Ա. Մարգարովը։

ՀՀ-ում ԱՄՆ գործերի ժամանակավոր հավատարմատար Դեյվիդ Ալենը, բարձր գնահատելով տարիների ընթացքում կատարված համատեղ աշխատանքները, հույս հայտնեց, որ ապագայում էլ կիրականացվեն օգտակար և արդյունավետ համատեղ ծրագրեր:

ՀՀ-ում ԱՄՆ գործերի ժամանակավոր հավատարմատարը հետայդու հանդիպեց ԵՊՀ միջազգային հարաբերությունների, իրավագիտության ֆակուլտետների ուսանողների հետ: Ծավալված հետաքրքիր և արդյունավետ քննարկման ընթացքում ԱՄՆ գործերի ժամանակավոր հավատարմատարը պատասխանեց ԵՊՀ ուսանողների հարցերին: