Արտերկրում ուսանելը՝ գիտելիքների և հմտությունների ամրապնդման հնարավորություն

«Արտերկրում ուսանելու որոշմանս հիմքում Գերմանիայի և գերմանական լեզվամշակույթի նկատմամբ իմ մեծ հետաքրքրությունն էր։ Դեռ դպրոցական տարիներից երազում էի Գերմանիայում ուսանելու մասին։ Իհարկե, կարևոր էր նաև առաջադիմությունը, սակայն այս հարցում մեծ դերակատարում ունեցավ նոր գիտելիքներ և միջազգային փորձ ձեռք բերելու իմ ձգտումը»,- ասում է Արմենուհին։

Մեկ կիսամյակի ընթացքում ԵՊՀ ուսանողը մասնակցել է երեք դասընթացի՝ «Գերմաներենի ոճաբանություն և քերականություն», «Միջմշակութային հաղորդակցություն» և «Ժամանակակից Գերմանիա և երկրագիտություն», որոնք անցկացվում էին բացառապես գերմաներենով։ Դրանցից երկուսը նոր էին նրա համար և հնարավորություն տվեցին ավելի խորությամբ հասկանալու իր մասնագիտության տարբեր ուղղությունները։

Ըստ նրա՝ դասերն առավելապես ինտերակտիվ էին․ ուսանողները հաճախ աշխատում էին խմբերով, մասնակցում քննարկումների և կատարում գործնական տարբեր առաջադրանքներ։ Արմենուհու խոսքով՝ այս ամենը նպաստել է իր լեզվական մտածողության զարգացմանը, թիմային աշխատանքի հմտությունների ձևավորմանը և գերմաներենի գիտելիքների խորացմանը։

«Համալսարանն ուներ շատ զարգացած ենթակառուցվածքներ՝ ժամանակակից լսարաններ, համակարգչային սրահներ, մեծ գրադարան և ուսանողական ճաշարան, որոնցից ես ևս հնարավորություն ունեցա օգտվելու։ Հատկապես գրադարանը մեծ աջակցություն էր ուսման ընթացքում․ այն մեզ հնարավորություն էր տալիս օգտվելու բազմաթիվ գրքերից, ինչպես նաև էլեկտրոնային և գիտական հոդվածներից, տվյալների բազաներից, որոնք շատ օգտակար էին ուսումնառության համար»,- պատմում է Արմենուհին, որի հիմնական հետաքրքրությունը գերմաներենի ուսումնասիրությունն է։ Նա նշում է, որ այս լեզուն իրեն հատկապես գրավում է, քանի որ արդեն մի քանի տարի է՝ ուսումնասիրում է այն և համարում է, որ գերմաներենը կարևոր է ոչ միայն լեզվական, այլև մշակութային առումով։

Բազմամշակութային միջավայրը Արմենուհուն մեծ հնարավորություն է տվել ճանաչելու տարբեր մշակույթներ և մտածելակերպեր։ Ըստ նրա՝ ամենամեծ առավելությունն այն էր, որ ծանոթացել է տարբեր երկրների ուսանողների տեսակետներին ու մտածելակերպին, ինչը նրան օգնեց դառնալու ավելի հանդուրժող և լայնախոհ։

Մշակութային տարբերությունները և լեզվական խոչընդոտները, նրա խոսքով, կարող են նաև մարտահրավեր լինել։ Ենայում գտնվելու ընթացքում նա շփվել է չինացի, անգլիացի, հունգարացի և հարավկորեացի ուսանողների հետ։ Արմենուհու համար հատկապես հետաքրքիր և որոշ չափով անսովոր էր տեսնել, թե ինչպես են տարբեր երկրների ուսանողները յուրովի սովորում և արտահայտում իրենց կարծիքը։

Անդրադառնալով համալսարանական կրթությանը՝ Արմենուհին նշում է, որ ԵՊՀ-ում կրթությունը շատ ամուր տեսական հիմք ունի, մինչդեռ արտասահմանյան համալսարանում ավելի մեծ ուշադրություն էր դարձվում պրակտիկ աշխատանքին, քննարկումներին և նախագծային գործունեությանը։ Նա հավելում է, որ երկու համակարգերն էլ իրենց առավելություններն ունեն և կարող են լրացնել միմյանց։

«Կրթության մեջ ամենակարևորը համարում եմ որակյալ գիտելիքների ձեռքբերումը, լեզվական մտածողության զարգացումը և ինքնուրույն աշխատելու կարողությունը։ Այս տեսանկյունից ԵՊՀ-ն մեծ դերակատարում ունի իմ մասնագիտական ձևավորման գործում, քանի որ այստեղ ստացել եմ ամուր գիտելիքներ և լավ հիմք հետագա զարգացման համար»,- շեշտում է ուսանողը, որն իր մեծ հաջողություներից է համարում Գերմանիայի առաջատար համալսարաններից մեկում ուսումնառելը։ 

Արտերկրում ուսանելու ընթացքում նա մեծ ակտիվություն է ցուցաբերել դասընթացների ժամանակ, ինչպես նաև ներկայացրել իր անհատական և հետազոտական աշխատանքները, որոնց շնորհիվ կարողացել է քննություններից վաստակել ամենաբարձր միավորները։

«Այս փորձը ոչ միայն ամրապնդեց իմ մասնագիտական գիտելիքները, այլև մեծացրեց վստահությունս սեփական ուժերի նկատմամբ և հնարավորություն տվեց սովորելու նոր մեթոդներ ու աշխատաոճ, որոնք անպայման օգտակար կլինեն իմ հետագա կրթության և աշխատանքի ընթացքում»,- ասում է Արմենուհին։

Ուսանողը ներկայում աշխատում է «Teleperformance Armenia» ընկերությունում, որտեղ փորձում է կիրառել համալսարանում ձեռք բերած գիտելիքներն ու հմտությունները, որոնք օգնում են մասնագիտական զարգացմանը։ Նա նաև նպատակ ունի շարունակելու բարձրագույն կրթությունը, ձեռք բերելու նոր ու հարուստ փորձ միջազգային հարթակում և շարունակաբար զարգանալու իր մասնագիտության մեջ։