Կյանք փրկող մի քանի րոպե․ արյան հավաքագրում ԵՊՀ-ում

«Հանձնի՛ր արյուն, փրկի՛ր կյանքեր» բարեգործական նախաձեռնությունն իրականացվում է՝ հաշվի առնելով Հայաստանի Հանրապետությունում առկա արյան պաշարների դեֆիցիտը և դրա հաղթահարման անհրաժեշտությունը։ Ծրագրի հիմնական նպատակն է հավաքագրել արյուն՝ օգնելու այն մարդկանց, որոնք ունեն դրա կարիքը։

Համալսարանում կազմակերպված արյան հավաքագրմանը մասնակցում էին ուսանողներ, դասախոսներ, վարչական ստորաբաժանումների աշխատակիցներ, որոնց շնորհիվ հավաքագրված արյունը կուղղվի քաղցկեղով և արյան հիվանդություններով տառապող երեխաների ու մեծահասակների բուժմանը, բարդ ծննդաբերություն ունեցած կանանց օգնությանը, ծանր վիրահատությունների ենթարկվող հիվանդներին, ինչպես նաև արտակարգ իրավիճակների դեպքում անհրաժեշտ արյան անձեռնմխելի պաշարների ապահովմանը։

Խոսելով նախաձեռնության մասին՝ ՀՀ ԱՆ «Յոլյան» արյունաբանության և ուռուցքաբանության կենտրոնի արյան ծառայության բժիշկ Աստղիկ Խաչատրյանն ասաց, որ մարդկանց ժամանակը խնայելու համար պարբերաբար իրականացվում են այսօրինակ ծրագրեր, երբ մասնագետներն իրենք են այցելում համալսարաններ, նախարարություններ և այլ կազմակերպություններ։ Նրա խոսքով՝ նախաձեռնությունը միտված է լուծելու ամենակարևոր խնդիրներից մեկը՝ արյան պաշարների պակասը։

«Մենք շարունակաբար իրականացնելու ենք նման ծրագրեր։ Այս նախաձեռնությունը մեկնարկել է մոտ երկու տարի առաջ, և այդ ընթացքում արդեն բազմաթիվ կառույցներ ենք այցելել։ Կարևոր է, որ մարդիկ գիտակցեն արյունատվության թե՛ հոգեբանական, թե՛ ֆիզիկական օգուտը։ Մեկ դոնորությունից ստացվում է երեք բաղադրիչ, այսինքն՝ հնարավոր է օգնել մինչև երեք մարդու։ Բացի դրանից՝ պարբերաբար արյուն հանձնողներն ունենում են նաև առողջական առավելություններ՝ բարելավվում է արյան շրջանառությունը, մարզվում է սիրտ-անոթային համակարգը և այլն»,- ընդգծեց նա։

ԵՊՀ կենսաբանության ֆակուլտետի էկոլոգիայի և բնության պահպանության ամբիոնի վարիչ Սյուզաննա Եսոյանը նախաձեռնության մասին տեղեկացել է համալսարանական էլեկտրոնային փոստին ստացած նամակի միջոցով։ Խոսելով արյան դոնորության կարևորության մասին՝ նա շեշտեց, որ նման նախաձեռնությունները անմիջականորեն կապված են մարդկային կյանքեր փրկելու հետ և կարևոր դերակատարում ունեն համապատասխան մշակույթի ձևավորման գործում։

«Ֆրանսիայում ուսանելու տարիներին նկատեցի, որ մարդիկ շատ ուշադիր են նման հարցերի նկատմամբ, և այնտեղ առկա է մասնակցության մշակույթը։ Տեսնելով, թե որքան կարևոր ու օգտակար գործ են անում, ինձ համար ևս դա դարձավ օրինակելի։ Հիմա, երբ համալսարանում նման նախաձեռնություն է կազմակերպվում, ես միայն ողջունում եմ այն և սիրով մասնակցում»,- հավելեց նա։

«Ամեն անգամ, երբ նման միջոցառում է կազմակերպվում, մասնակցում եմ․ եթե կարող եմ օգնել, ինչո՞ւ չօգնեմ»,- ասաց ԵՊՀ ինֆորմատիկայի և կիրառական մաթեմատիկայի ֆակուլտետի ուսանող Կատարինա Առաքելյանը՝ մատնանշելով, որ արյան դոնորության նախաձեռնություններին մասնակցում է գրեթե ամեն տարի։

Կատարինան ընդգծեց նաև, որ փորձում է հնարավորինս օգտակար լինել շրջապատին թե՛ կամավորական գործունեության, թե՛ արյան դոնորության միջոցով։

«Խրախուսում եմ, որ ընկերներս նույնպես մասնակցեն, քանի որ նպատակը մեկն է՝ օգնել մարդկանց ու փրկել կյանքեր»,- եզրափակեց ուսանողը։