Մայրության և գեղեցկության տոնը ԵՊՀ-ում՝ արվեստի և ստեղծարար մտքի համադրությամբ

Մայրության և գեղեցկության տոնը ևս մեկ առիթ է արժևորելու կանանց դերը, նրանց ներդրումն ու ստեղծարար ներուժը հասարակական և կրթական կյանքում։ 

ԵՊՀ ռեկտոր Հովհաննես Հովհաննիսյանը, կարևորելով կանանց դերակատարությունն ու ստեղծագործական գործունեությունը արվեստի և գիտության ոլորտներում, ասաց․ «Այսօրվա միջոցառումը կարևոր է նրանով, որ հնարավորություն է տալիս մեր կին աշխատակիցներին տեսնելու ոչ միայն իրենց պաշտոնական դերերում, այլև որպես ստեղծագործ անհատների։ Ներկայացված գործերը պարզապես գեղարվեստական աշխատանքներ չեն․ դրանք վկայում են այն անհատականությունների մասին, որոնք, իրենց ամենօրյա մասնագիտական գործունեությանը զուգահեռ, ձևավորում են նաև համալսարանի մշակութային միջավայրը։ Մեզ համար սկզբունքային է արժևորել յուրաքանչյուր աշխատակցի ներդրումը՝ անկախ նրա զբաղեցրած դիրքից կամ սոցիալական դերից, և ստեղծել միջավայր, որտեղ մարդը կարող է լիարժեք ներկայանալ իր կարողություններով, գաղափարներով ու ստեղծարարությամբ»։

Տոնական միջոցառման շրջանակում անցկացվեց ԵՊՀ կին աշխատակիցների ստեղծագործական աշխատանքների ցուցահանդես, որտեղ ներկայացված էին արվեստի տարբեր ճյուղերի աշխատանքներ՝ լուսանկարներ, գեղանկարներ, մանրանկարներ, ձեռագործ աշխատանքներ։ Ցուցահանդեսը հնարավորություն տվեց բացահայտելու համալսարանի կին աշխատակիցների ստեղծարար միտքը և գնահատելու նրանց ներդրումը մշակութային կյանքում։

ԵՊՀ աշխարհագրության և երկրաբանության ֆակուլտետի գրասենյակի վարչարարության մասնագետ Անժելա Այրիյանցը գրեթե 30 տարի է, ինչ աշխատում է  համալսարանում։ Ցուցահանդեսին ներկայացված էին նրա սիրողական լուսանկարները, որոնք արվել են տարբեր ժամանակներում և տարբեր տեղերում․ լուսանկարները պատկերում են կենդանիների ու թռչունների, ծաղիկների կյանքը: Դրանցում առանձնահատուկ է այն նրբությունը, որով Անժելան նկատում է մանրամասները, ինչը յուրահատուկ ու կենդանի է դարձնում յուրաքանչյուր լուսանկար։ Նրա աշխատանքներում հենց դա էլ բարձր գնահատեցին ինչպես գործընկերները, այնպես էլ այցելուները։

Նրա ընկերուհին՝ Արմինե Մկրտչյանը, որը դասավանդում է նույն ֆակուլտետի քարտեզագրության և գեոմորֆոլոգիայի ամբիոնում, պատմում է, որ երբ միասին քայլում են փողոցով, Անժելան նկատում է նույնիսկ խոտերի մեջ թաքնված փոքրիկ միջատներին, որոնք, սովորաբար, անցորդի աչքից վրիպում են։ 

«Ամեն անգամ ընկերներս ասում էին, որ հնարավորության դեպքում կարող եմ ունենալ առանձին ցուցահանդես, բայց ես հազվադեպ եմ ռիսկի դիմում և քայլ անում։ Իսկ երբ ստացա նամակը՝ ցուցահանդեսին սեփական ստեղծագործություններով մասնակցելու հրավերով, մտածեցի, որ սա հենց այդ առիթն է»,- ասաց Անժելան, որը լուսանկարչի իր կարողությունները առանձին բիզնեսի վերածելու մասին չի մտածում․ նա պարզապես պատկերում է կյանքը համալսարանական աշխատանքից դուրս:

ԵՊՀ հաշվապահական հաշվառման վարչության ավագ հաշվապահ Աննա Վիրաբյանը ասեղնագործությամբ և հելյունագործությամբ զբաղվում է դեռևս 17 տարեկանից։ Նա իր աշխատանքները երբեմն նվիրում է ընկերներին կամ օգտագործում առօրյա իրերի գեղեցկացման համար:

«Ես նախապես չեմ մտածում նախշերի մասին, դրանք սովորաբար «ծնվում են» գործընթացի ժամանակ կամ ընտրվում համացանցից՝ ըստ տրամադրության»,- նշեց Աննա Վիրաբյանը, որի աշխատանքներում հաճախ հանդիպում են հելյունագործ օձիքներ՝ վերնաշապիկների հետ կրելու համար։ Հելյունագործությամբ ստացված նրբաճաշակ նախշերը համադրվում են ինչպես սպիտակ, այնպես էլ գունավոր հագուստների հետ:

Միջոցառման ընթացքում համալսարանականների ուշադրությունը գրավեց «Հորիզոնի կանչը» կտավը, որի հեղինակը՝ ԵՊՀ ուսումնական գործընթացների վերահսկման բաժնի ավագ վերահսկող Արաքս Գաբրիելյանը, ստեղծագործությունը կենդանացրել էր ակրիլով և գիպսով՝ յուրահատուկ գունային և տեքստուրային լուծումներով, ինչն էլ դարձրել է այն հատկապես ընդգծված ու հիշվող։

««Հորիզոնի կանչը» ինձ համար խորհրդանշում է ճանապարհորդության նոր սկիզբը՝ նոր կյանք, նոր գործունեություն և դեպի ապագա բացվող ճանապարհ, և կարծում եմ՝ յուրաքանչյուրը այն յուրովի է ընկալում»,- ասաց Արաքսը, որը հեղինակ է նաև մի շարք տարբեր թեմատիկ գեղանկարների։

ԵՊՀ մանկավարժության և կրթության զարգացման կենտրոնի գրասենյակի վարչարարության մասնագետ Անահիտ Խլոպուզյանը միջոցառման ընթացքում ներկայացրեց իր մանրանկարների շարքը, որը պատրաստել է մայրության թեմատիկայով։ Կտավներում հիմնականում պատկերված է Մարիամ Աստվածածինը, սակայն ցուցադրությունում ներկայացված են նաև Քրիստոսի և Գրիգոր Նարեկացու պատկերներով մանրանկարներ, որոնցից յուրաքանչյուրն ունի իր հատուկ ասելիքը։

«Քրիստոսն ասում էր՝ եթե գաս իմ հետևից, խավարը կդառնա լույս․ նկարում նրա շարժմանը զուգահեռ՝ սևը փոխվում է, ոսկեգույնը՝ շատանում, այսինքն՝ խավարը գնում է, լույսը՝ գալիս»,- ասում է հեղինակը և հավելում, որ իր մանրանկարների հիմնական ասելիքը սերն է, սերը՝ ցանկացած բանի մեջ։

ԵՊՀ իրավագիտության ֆակուլտետի գրասենյակի վարչարարության մասնագետ Հռիփսիմե Հակոբյանը, որը կրում էր իր ձեռքով պատրաստած կարդիգանը, ներկայացրել էր ուլունքագործ վզնոցներ՝ յուրահատուկ, գունավոր և համադրելի կանացի տարբեր հանդերձանքների հետ։ Նա պատմեց, որ հաճախ սկսում է աշխատել, երբ բարկացած է, քանի որ այդպես կարողանում է հանգստանալ և արտահայտել էմոցիաները ստեղծագործական ձևով։

ԵՊՀ անձնակազմի կառավարման բաժնի նախաձեռնությամբ կազմակերպված միջոցառման կարևոր և հիշարժան հատվածներից մեկը դարձավ համատեղ ստեղծագործական աշխատանքը, որի ընթացքում մասնակիցները միավորեցին իրենց ջանքերը՝ սեղանների վրա դասավորված պատկերազարդ սալիկների միջոցով հավաքելով ԵՊՀ գլխավոր մասնաշենքի պատկերը, որը կտեղադրվի համալսարանում և միշտ տեսանելի կլինի այցելուների համար։ Այն դարձավ ԵՊՀ-ի համար մնայուն արժեք՝ արտահայտելով ինչպես օրվա գեղեցիկ խորհուրդը, այնպես էլ համալսարանական համայնքի միասնականությունն ու համերաշխությունը։