«ԵՊՀ-ն բացառիկ հնարավորություն է ընձեռում ուսումնասիրելու բազմազան լանդշաֆտներ, որոնք արժեքավոր են մեր հետազոտական աշխատանքի համար». օտարերկրյա ուսանող

Երկշաբաթյա այցի ընթացքում Ղազախստանից ժամանած ուսանողներն ստանում են մասնագիտական խորհրդատվություն իրենց մագիստրոսական թեզերի վերաբերյալ: Աշխատանքներում ներգրավված են Ընդհանուր աշխարհագրության ամբիոնի 10 փորձառու դասախոսներ, որոնք ուղղորդում են օտարերկրյա ուսանողներին՝ ըստ նրանց ընտրած թեմաների:

Աստանայի Լ. Գումիլյովի անվան եվրասիական ազգային համալսարանի մագիստրանտ Դիդար Զաիտովը, անդրադառնալով Երևանի պետական համալսարանն ընտրելու իր որոշմանը, նշեց, որ ԵՊՀ-ն տարածաշրջանի առաջատար ակադեմիական հաստատություններից մեկն է և հատկապես խորացված ուսումնառություն է ապահովում աշխարհագրության և երկրաբանության ոլորտում։

«ԵՊՀ աշխարհագրության և երկրաբանության ֆակուլտետը բացառիկ հնարավորություն է ընձեռում ուսումնասիրելու բազմազան լանդշաֆտներ՝ լեռնային տեղանքներից մինչև հրաբխային կազմավորումներ, որոնք հատկապես արժեքավոր են մեր հետազոտական աշխատանքի համար»,- ընդգծեց նա: 

Ղազախստանից եկած ուսանողները համատեղում են տեսական և գործնական աշխատանքները։ 

«Ուսումնասիրում ենք ֆիզիկական աշխարհագրության այնպիսի առարկաներ, ինչպիսիք են գեոմորֆոլոգիան, կլիմայագիտությունը, տարածաշրջանային զարգացումը: Ծրագրի զգալի մասը նվիրված է աշխարհագրական տեղեկատվական համակարգերին (GIS), տարածական վերլուծությանը և շրջակա միջավայրի մշտադիտարկմանը: Մենք նաև ակտիվորեն մասնակցում ենք դաշտային հետազոտական աշխատանքներին, որոնք արժեքավոր են Հայաստանի բազմազան ռելիեֆի, երկրաբանական բարդ կառուցվածքի և եզակի բնական լանդշաֆտների շնորհիվ»,- մատնանշեց ուսանողը:

Աստանայի Լ. Գումիլյովի անվան եվրասիական ազգային համալսարանի մագիստրանտներն իրենց գոհունակությունը հայտնեցին ԵՊՀ կրթության որակից՝ բարձր գնահատելով ուսումնական գործընթացի արդյունավետ կազմակերպումը:

«Դասախոսներն ունեն մասնագիտական մեծ փորձառություն և բաց են քննարկումների համար, ինչը ստեղծում է աջակցող ակադեմիական միջավայր: Մենք հատկապես գնահատում ենք շեշտադրումը հետազոտական հմտությունների և ինքնուրույն աշխատանքի վրա: Ուսումնական գործընթացի մաս են կազմում նաև ժամանակակից գործիքները և մեթոդաբանությունները՝ ներառյալ GIS տեխնոլոգիաները, ինչը կրթությունը դարձնում է և՛ արդիական, և՛ գործնական»,-ասաց Դիդար Զաիտովը:

Մագիստրանտները ծրագրում են իրենց ստացած գիտելիքները կիրառել շրջակա միջավայրի պահպանության, բնական ռեսուրսների ռացիոնալ օգտագործման և GIS վերլուծությունների ոլորտում:

«Ապագայում մենք ծրագրում ենք մեր կարիերան կառուցել աշխարհագրության և շրջակա միջավայրի ուսումնասիրության հետ կապված ոլորտներում: Մեզանից շատերը հետաքրքրված են աշխատելու GIS վերլուծության և բնապահպանական խորհրդատվության ոլորտներում: Մեր նպատակն է օգտագործել ձեռք բերված գիտելիքները բնապահպանական մարտահրավերներին դիմակայելու, բնական պաշարների ռացիոնալ օգտագործմանը նպաստելու և տարածքային պլանավորման գործում հիմնավորված որոշումների կայացմանն աջակցելու համար»,- մատնանշեց Դիդար Զաիտովը:

ԵՊՀ ընդհանուր աշխարհագրության ամբիոնի դասախոս Կարինե Շախոյանի խոսքով՝ օտարերկրյա մագիստրանտները համալսարանի աջակցությամբ այցելել են Հայաստանի պատմամշակութային վայրեր։ 

«Այս տարվա երթուղիներն ընդգրկել են Խոր վիրապը, Արենի-1 և Մագելանի քարանձավները, ինչպես նաև Նորավանքը: Շատերի համար սա առաջին հանդիպումն է քրիստոնեական հնագույն մշակույթի, խաչքարերի և դարավոր պատմության հետ, ինչը օտարերկրյա ուսանողների շրջանում մեծ ոգևորություն է առաջացնում»,- ասաց նա:

Կարինե Շախոյանը հավելեց, որ ղազախ ուսանողների թիվը տարեցտարի աճում է. այս ուսումնական տարում սա արդեն երկրորդ խումբն է, որն այցելել է ԵՊՀ: