ԵՊՀ-ն ընդլայնում է միջազգային գիտական համագործակցությունը. նոր գործընկերություն Չինաստանի առաջատար համալսարաններից մեկի հետ

ԵՊՀ գիտական արդյունքները՝ միջազգային հարթակում

Կարեն Թռչունյանը գիտաժողովում հանդես է եկել որպես հրավիրյալ զեկուցող՝ ներկայացնելով ԵՊՀ կենսաբանության գիտահետազոտական ինստիտուտում կատարվող ուսումնասիրությունների արդյունքները, որոնք վերաբերում են շաքարի ճակնդեղի և մելասի կենսաքիմիական արդյունավետ փոխակերպմանը, ինչպես նաև կենսաթափոններից ջրածնի և կենսաէներգիայի ստացման նորարարական տեխնոլոգիաներին։

Ներկայացված հետազոտությունները մեծ հետաքրքրություն են առաջացրել մասնակիցների շրջանում՝ ընդգծելով ԵՊՀ-ում կատարվող գիտական աշխատանքների արդիականությունն ու կիրառական նշանակությունը հատկապես կայուն կենսաարտադրության և շրջակա միջավայրի պահպանության համատեքստում։

ԵՊՀ-ն՝ նորաստեղծ միջազգային ընկերության հիմնադիր անդամ

Գիտաժողովի կարևորագույն իրադարձություններից մեկը Արդյունաբերական կենսաարտադրության միջազգային ընկերության (International Society of Industrial Biomanufacturing) հիմնադրումն էր։ Հիմնադիր անդամների շարքում է նաև ԵՊՀ-ն։

Կառույցը միավորելու է տարբեր երկրների առաջատար գիտական կենտրոններն ու համալսարանները՝ խթանելով համատեղ հետազոտությունները, միջազգային դրամաշնորհային ծրագրերը, փորձի փոխանակումն ու ոլորտի զարգացման նոր նախաձեռնությունները։ Ընկերությունը պաշտոնապես կսկսի գործունեությունը 2027 թվականից, իսկ ԵՊՀ-ն մասնակցելու է դրա հետագա գործունեության կազմակերպմանը։

Նոր գործընկերություն Չինաստանի առաջատար համալսարանի հետ

Չինաստան կատարած այցի շրջանակում ստորագրվել է համագործակցության հուշագիր ԵՊՀ-ի և Պեկինի քիմիական տեխնոլոգիաների համալսարանի միջև, ինչը նոր հեռանկարներ է բացում երկու բուհերի համագործակցության համար։

Հուշագիրը նախատեսում է ուսանողների, ասպիրանտների և հետազոտողների փոխանակման ծրագրեր, համատեղ գիտական նախագծերի իրականացում, վերապատրաստումներ, միջազգային դրամաշնորհային հայտերի մշակում, ինչպես նաև գիտակրթական նախաձեռնությունների համատեղ իրականացում։

Կողմերը քննարկել են նաև համատեղ գիտական կենտրոնի ստեղծման հնարավորությունը, որը կենտրոնանալու է կենսատեխնոլոգիայի և կենսաարտադրության ոլորտում նորարարական հետազոտությունների վրա։

Կարեն Թռչունյանի խոսքով՝ նման համագործակցությունները կարևոր են ոչ միայն փորձի փոխանակման, այլև համաշխարհային գիտական օրակարգում ԵՊՀ ներկայությունն ամրապնդելու տեսանկյունից։

«Այսօր գիտության զարգացումը հիմնված է միջազգային համագործակցության վրա։ Նման հարթակները հնարավորություն են տալիս ոչ միայն ներկայացնելու մեր գիտական ներուժը, այլև հասկանալու, թե ինչ ուղղությամբ է զարգանում աշխարհը, և ինչպիսի լուծումներ են պահանջում ժամանակակից մարտահրավերները։ Ամենակարևորը գաղափարն ու գիտական միտքն են, որոնք դառնում են նոր հետազոտությունների և գործընկերությունների հիմքը»,- ընդգծում է նա։

Այց գիտական նորարարական կենտրոններ

Պրոֆեսոր Թռչունյանն այցելել է նաև Չինաստանի նորաստեղծ գիտահետազոտական կենտրոններ, այդ թվում՝ Պեկինի սինթետիկ կենսաբանության ինովացիոն կլաստեր, որտեղ ներկայացվել են ժամանակակից լաբորատորիաները, կենսատեխնոլոգիական ենթակառուցվածքները և ոլորտի զարգացման պետական ծրագրերը։

«Վերջին մի քանի տարիներին այստեղ ստեղծվել են բարձր տեխնոլոգիական գիտական կենտրոններ, որոնք արդեն իսկ ձևավորում են սինթետիկ կենսաբանության զարգացման նոր ուղղություններ։ Այդ փորձը մեզ համար կարևոր հնարավորություն է գնահատելու միջազգային միտումները և ձևավորելու նոր համագործակցություններ»,- նշում է Կարեն Թռչունյանը։